އޮންލައިން ގޭމް އެލްޑެން ރިންގް 3 އަހަރު ތެރޭ 30 މިލިއަން ކޮޕީ ވިކިފައިވާ ކަމަށް އެގޭމް އުފެއްދި ކުންފުނި ޖަޕާނުގެ "ފްރޮމްސޮފްޓްވެއާ" އިން ހާމަކޮށްފި އެވެ.
އެލްޑެން ރިންގްގެ ޑިވެލޮޕަ ކުންފުނި ފްރޮމްސޮފްޓްވެއަރއިން ހޯމަ ދުވަހު ހާމަކުރި ގޮތުގައި، 2022 ވަނަ އަހަރު ނެރުނު އެކްޝަން-އާރްޕީޖީ ގޭމް "އެލްޑެން ރިންގް" ނެރުނުތާ 3 އަހަރު ފަހުން މި ކާމިޔާބީ ހާސިލުކުރުމުން، މި ގޭމް އަދިވެސް ކާމިޔާބުކަމާއެކު ކުރިއަށްދާކަން ހާމަވެ އެވެ.
އެލްޑެން ރިންގްއަކީ ޖަޕާނުގެ އޮންލައިން ގޭމް ސްޓޫޑިއޯއިން އެންމެ ގިނައިން ވިއްކުނު ގޭމެވެ. މިހާރު މި ކުންފުނިން ދަނީ "އެލްޑެން ރިންގް ނައިޓްރެއިން" ނަމަކަށް ކިޔާ ސްޕިންއޮފް ޓައިޓަލެއްގެ މަސައްކަތް ކުރަމުންނެވެ.
ފްރޮމްސޮފްޓްވެއަރއިން ހޯމަ ދުވަހު އެކްސްގައި ޕޯސްޓެއް ކުރުމަށްފަހު، އެލްޑެން ރިންގް 30 މިލިއަން ޔުނިޓް ވިއްކިފައިވާކަން ކަށަވަރުކޮށްދީފައިވެއެވެ.
2022 ވަނަ އަހަރުގެ ފެބްރުއަރީ މަހު ނެރުނު މި ގޭމް، 3 އަހަރާއި ކުޑަ ދުވަސްކޮޅެއްގެ ތެރޭގައި 30 މިލިއަން ކޮޕީ ވިއްކާލައިފައިވާއިރު، މީގެ ތެރެއިން 5 މިލިއަން ޔުނިޓް ވިއްކިފައިވަނީ ފާއިތުވި 10 މަސްދުވަހުގެ ތެރޭގައި ކަމަށް އެކުންފުނީން ބުނެ އެވެ. 2024 ވަނަ އަހަރުގެ ޖޫން މަހު، މި ގޭމްގެ ފުރަތަމަ އަދި ހަމައެކަނި ނެރުނު އެކްސްޕޭންޝަން "ޝެޑޯ އޮފް ދަ އަރޑްޓްރީ" ނެރުމުގެ ކުރިން، އެލްޑެން ރިންގް ވިއްކިފައިވަނީ 25 މިލިއަން ޔުނިޓެވެ.
އެލްޑެން ރިންގްގެ އެކްސްޕޭންޝަން "ޝެޑޯ އޮފް ދަ އަރޑްޓްރީ" އަކީ އާ ސްޓޯރީ ކޮންޓެންޓްއާއި، އާ މެޕް އޭރިއާއަކާއި، އާ ދުޝްމިނުންނާއި ބޮސް ފައިޓްތަކާއި އަދި އިތުރު ގިނަ ކަންތައްތަކެއް ހިމެނޭ އެކްސްޕޭންޝަނެކެވެ. މި އެކްސްޕޭންޝަން ނެރުނު އިރު ވަރަށް ބޮޑު ތައުރީފެއް ލިބި، މެޓަކްރިޓިކްގައި އެންމެ މަތީ ރޭޓިންގް ލިބުނު އެކްސްޕޭންޝަނަށް ވެފައިވެ އެވެ. މީގެ އިތުރުން، ޝެޑޯ އޮފް ދަ އަރޑްޓްރީ ވަނީ ދަ ގޭމް އެވޯޑްސް 2024 ގައި ގޭމް އޮފް ދަ އިޔަރގެ މައި އިނާމަށް ނޮމިނޭޓްވެފަ އެވެ. ނަމަވެސް މި އިނާމު ކާމިޔާބުކޮށްފައިވަނީ އެސްޓްރޯ ބޮޓްއިންނެވެ.
އެލްޑެން ރިންގްއަކީ ފްރޮމްސޮފްޓްވެއަރއަށް އެންމެ ފައިދާ ބޮޑު ފްރެންޗައިޒްއެވެ. 2016 ގައި ނެރުނު ޑާކް ސޯލްސް 3 އާއި 2019 ގައި ނެރުނު ސެކިރޯ: ޝެޑޯސް ޑައި ޓްވައިސް އަށްވުރެ މާ ގިނައިން ވިއްކިފައިވެއެވެ. މި ދެ ގޭމްވެސް ވަނީ 10 މިލިއަނަށްވުރެ ގިނައިން ވިއްކިފަ އެވެ. އަދި އެލްޑެން ރިންގް މިހާރު ވަނީ މުޅި ޑާކް ސޯލްސް ފްރެންޗައިޒްގެ ޖުމްލަ ވިއްކުންތައްވެސް ފަހަނައަޅާ ގޮސްފަ އެވެ. ޑާކް ސޯލްސްގެ 3 ގޭމް ޖުމްލަކޮށް 27 މިލިއަން ކޮޕީ ވިއްކިފައިވެ އެވެ.
