ގޭމިން ދުނިޔެއަށް ގުޑުން އަރުވާލައި، ނިންޓެންޑޯ ސްވިޗް 2 ބާޒާރަށް ނެރުނުތާ އެންމެ ހަތަރު ދުވަހުގެ ތެރޭގައި 3.5 މިލިއަނަށްވުރެ ގިނަ ޔުނިޓް ވިއްކައިގެން މުޅިން އާ ރެކޯޑެއް ހަދައިފި އެވެ.
މިއީ މިހާތަނަށް އެންމެ އަވަހަށް ވިކުނު ގޭމިން ކޮންސޯލްގެ ރެކޯޑް އެވެ. މި ބޮޑު ކާމިޔާބީއަކީ ގޭމިން ދާއިރާގެ ތަޖުރިބާކާރުން ކުރިންވެސް އަންދާޒާކޮށްފައިވާ ކަމެކެވެ.
މަޝްހޫރު އެނަލިސްޓެއް ކަމަށްވާ ކަންޓަން ގޭމްސްގެ ސީއީއޯ، ޑރ. ސާކަން ޓޯޓޯ ވަނީ ސްވިޗް 2 ނެރުމުގެ ކުރިންވެސް، އެއިން މިފަދަ ރެކޯޑެއް މުގުރާލާނެ ކަމަށް ލަފާކޮށްފަ އެވެ. އޭނާގެ އަންދާޒާތައް މިވަނީ ސީދާ ހަގީގަތަކަށް ވެފަ އެވެ.
މިހާ ބޮޑު ތަރުހީބެއް ލިބުމުގެ ފަހަތުގައިވާ އެންމެ ބޮޑު އެއް ސަބަބަކީ، ކުރީގެ ނިންޓެންޑޯ ސްވިޗް ބޭނުންކުރާ 140 މިލިއަނަށްވުރެ ގިނަ ޔޫޒަރުން ތުބުމެވެ. އޭގެ ތެރެއިން ގިނަ ބަޔަކު ވަނީ އާ ކޮންސޯލްއަށް އަޕްގްރޭޑްކޮށްފަ އެވެ.
ސްވިޗް 2 ގެ ރަސްމީ އަގަކީ 400 ޑޮލަރު ކަމަށްވާއިރު، އޭގެ ގޭމްތައް ވިއްކަމުން އަންނަނީ 70 ޑޮލަރުގައެވެ.
އާ ކޮންސޯލްގައި ކުރީގެ ސްވިޗްއާ ހިލާފު، ފާހަގަކޮށްލެވޭ ފީޗާތަކެއް އެކުލެވެއެވެ. އޭގެ ތެރޭގައި 8 އިންޗީގެ ބޮޑު އެލްސީޑީ ސްކްރީނަކާއި، ޖޮއި-ކޮން ކޮންޓްރޯލާތައް މެގްނެޓިކް ނިޒާމަކުން ކޮންސޯލާ ގުޅޭ ގޮތް ހިމެނެއެވެ. ނިންޓެންޑޯ ސްވިޗް 2 ގެ މި އާދަޔާޚިލާފު ކާމިޔާބީއާއެކު، ގޭމަރުން އަންނަނީ އުފާފާޅުކުރަމުންނެވެ.
2017 ވަނަ އަހަރު ބާޒާރަށް ނެރުނު ނިންޓެންޑޯ ސްވިޗް އަކީ ގޭމިން އިންޑަސްޓްރީއަށް މުޅިން އާ އުސްމިނެއް ގެނެސްދިން އުފެއްދުމެކެވެ. މީގެ އެންމެ ހާއްސަ ސިފައަކީ، ގޭގައި ޓީވީއަށް ގުޅައިގެން ކުޅޭ 'ހޯމް ކޮންސޯލެއް' ގެ ގޮތުގަޔާއި، ގެއިން ބޭރުގައި ހިފާގެންގުޅޭ 'ހޭންޑްހެލްޑް' ކޮންސޯލެއްގެ ގޮތުގައިވެސް ބޭނުންކުރެވުމެވެ.
މި 'ހައިބްރިޑް' ކޮންސެޕްޓަށް ވަރަށް ބޮޑު މަގުބޫލުކަމެއް ލިބި، މުޅި ދުނިޔޭގައި 141 މިލިއަނަށްވުރެ ގިނަ ޔުނިޓް ވިކިފައިވެ އެވެ. މިއާއެކު، ސްވިޗް ވެފައިވަނީ ތާރީހުގައިވެސް އެންމެ ގިނައިން ވިކުނު ކޮންސޯލްތަކުގެ ތެރޭގައި ހިމެނޭ އުފެއްދުމަކަށެވެ.
