ހަފުތާއަކު ހަތަރު ފަހަރު ކުކުޅު ކެއުމުން ކެންސަރުޖެހުމުގެ ފުރުސަތު ދެގުނަ އިތުރުވެދާނެކަމަށް އިޓަލީގެ ސައިންޓިސްޓުން ކުރި ދިރާސާއަކުން ދައްކައިފި އެވެ.
މި ދިރާސާގައި ގާތްގަނޑަކަށް 5،000 މީހުންގެ ކާނާ އާއި ސިއްހަތާ ގުޅޭ މައުލޫމާތު 20 އަހަރުގެ މުއްދަތަކަށް ދިރާސާކޮށްފައިވެ އެވެ.
ދިރާސާގެ ނަތީޖާއިން ދައްކާ ގޮތުގައި ހަފުތާއަކު 300 ގްރާމަށްވުރެ ގިނައިން ކުކުޅު ކައިފިނަމަ، ހަޖަމީ ނިޒާމުގެ ކެންސަރު ޖެހި ފުރާނައަށް ނުރައްކާވުމުގެ ފުރުސަތު ދެގުނަ އިތުރުވެ އެވެ. މީގެ ތެރޭގައި ގޮހޮރުގެ ކެންސަރު ހިމެނެ އެވެ. މީގެ އިތުރުން، ހަފުތާއަކު ހަތަރު ފަހަރަށްވުރެ ގިނައިން ކުކުޅު ކެއުމުން ކޮންމެ ވެސް ސަބަބަކާ ހުރެ މަރުވުމުގެ ފުރުސަތު 27 ޕަސެންޓު އިތުރުވާކަމަށް ވެސް ދިރާސާއިން ދައްކައެވެ.
ދިރާސާގެ ނަތީޖާ "ނިއުޓްރިއަންޓްސް" ޖާނަލްގައި ޝާއިއުކޮށްފައި ވާއިރު، މި ނަތީޖާ ނުކުތުމުގެ ސަބަބާ މެދު ގިނަ ނަޒަރިއްޔާތުތަކެއް ހުށަހަޅާފައިވެ އެވެ.
އޭގެ ތެރޭގައި ކުކުޅު މާބޮޑަށް ފިހުމުން އުފެދޭ ކެމިކަލްތަކުން އިންސާނުންގެ ސެލްތަކަށް ގެއްލުން ލިބި، ކެންސަރަށް މަގުފަހިވުން ހިމެނެއެވެ. އަދި ކުކުޅަށް ދެވޭ ކާނާ އަދި ކުކުޅު ގެންގުޅުމުގައި ބޭނުންކުރާ ހޯމޯނުތަކާއި ބޭސްތަކުގެ ސަބަބުން ވެސް މިކަން ދިމާވެދާނެކަމަށް ދިރާސާގެ ލިޔުންތެރިން ފާހަގަކޮށްފައިވެ އެވެ.
މި ދިރާސާއިން ދައްކާ ގޮތުގައި ގިނައިން ކުކުޅު މަސް ކެއުމުގެ ސަބަބުން އަންހެނުންނަށްވުރެ ބޮޑަށް ފިރިހެނުންނަށް ނުރަނގަޅު އަސަރުކުރާކަން ފާހަގަކުރެވެއެވެ. ނަމަވެސް، މި ދިރާސާގެ ނަތީޖާ ކަށަވަރުކުރުމަށް އިތުރު ދިރާސާތައް ކުރަން ޖެހޭނެކަމަށް ސައިންޓިސްޓުން ބުނެފައިވެއެވެ.
ދިރާސާގެ ލިޔުންތެރިން އިތުރަށް ފާހަގަކޮށްފައިވަނީ ފިރިހެނުންނަށް ކުކުޅުގެ ސަބަބުން އިތުރު ނުރައްކާ ކުރިމަތިވާ ސަބަބު އަދިވެސް ސާފުނުވާކަމަށެވެ. މިކަން އިތުރަށް ދިރާސާކުރަން ޖެހޭކަމަށް އެ ފަރާތްތަކުން ބުނެފައިވެއެވެ.
ނަމަވެސް، ފިރިހެނުންނާއި އަންހެނުންގެ ހަށިގަނޑުގައި ހުންނަ ތަފާތު ހޯމޯނުތަކާ މިކަމާ ގުޅުން ހުރެދާނެކަމަށް އެ ފަރާތްތަކުން ލަފާކުރެއެވެ. އަދި އެއް ފަހަރާ ކާ މިންވަރުގައި ފިރިހެނުން އާންމުކޮށް އަންހެނުންނަށްވުރެ ގިނައިން ކާތީ، އޭގެ ސަބަބުން ނޭދެވޭ އަސަރު ކުރުމުގެ ފުރުސަތު އިތުރުވެދާނެކަމަށްވެސް ބެލެވެއެވެ.
ގިނައިން ކުކުޅު ކެއުމުން ކެންސަރު ޖެހުމުގެ ފުރުސަތު އޮތްކަމަށް މި ދިރާސާއިން ދެއްކިޔަސް ހުރިހާ ބާވަތެއްގެ ކެންސަރު ޖެހުމުގެ ފުރުސަތު އޮތްކަމަކަށް ދިރާސާއިން ދައްކާފައެއް ނުވެއެވެ. ނަމަވެސް، ހަޖަމީ ނިޒާމާ ގުޅުންހުރި 11 ބާވަތެއްގެ ކެންސަރުން ފުރާނައަށް ނުރައްކާވުމުގެ ފުރުސަތު އިތުރުވާކަމަށް ދައްކައެވެ. މީގެ ތެރޭގައި މަޑު، ގޮހޮރު، ބައިލް ޑަކްޓް، އެނަސް، ގޯލްބްލެޑަރ، ލިވަރ، ޕެންކްރިއަސް، ރެކްޓަމް، ކުޑަ ގޮހޮރު އަދި ބަނޑުގެ ޓިޝޫގެ ކެންސަރު ހިމެނެއެވެ.
ދިރާސާގެ ލިޔުންތެރިން އިޢުތިރާފުވާ ގޮތުގައި މި ދިރާސާގައި ބައެއް ލިމިޓޭޝަންތައް އެބަހުއްޓެވެ. އޭގެ ތެރޭގައި ކުކުޅު ކައްކާ އަދި ކާ ގޮތުގެ މަޢުލޫމާތު ދިރާސާގައި ހިމެނިފައި ނުވުން ހިމެނެއެވެ.
މި ހޯދުންތަކުން ދޭހަވަނީ ކުކުޅު ކެއުމުގައި ވަކި މިންވަރެއް ގެންގުޅުމުގެ މުހިންމުކަމެވެ. ނަމަވެސް، މި ދިރާސާގެ ނަތީޖާ އިތުރަށް ކަށަވަރުކުރުމަށް އިތުރު ދިރާސާތައް ކުރަން ޖެހޭކަމަށް ސައިންޓިސްޓުން ފާހަގަކޮށްފައިވެއެވެ. އެހެންކަމުން، ކެންސަރު ޖެހުމުގެ ރިސްކު ކުޑަކުރުމަށްޓަކައި، އެކަށީގެންވާ މިންވަރަކަށް ކުކުޅު ކެއުމަށް ސަމާލުކަން ދިނުމާއެކު، އެހެނިހެން ކާނާވެސް ހަމަހަމަ ގޮތެއްގައި ކެއުމަށް އާންމުންނަށް ލަފާދެވެއެވެ. އަދި ސިއްހީ ދުޅަހެޔޮކަން ދެމެހެއްޓުމަށް ޑޮކްޓަރުންގެ ލަފާ ހޯދުމަކީވެސް މުހިންމު ކަމެކެވެ.
