ޔޫރަޕިއަން ޔޫނިއަން (އީޔޫ) އިން ޓެކްނޮލޮޖީގެ ދާއިރާގައި އެންމެ ބާރުގަދަ ކުންފުނިތަކުގެ ތެރެއިން ދެ ކުންފުންޏަކަށް ބޮޑެތި ޖޫރިމަނާތަކެއް ކޮށްފިއެވެ.
މިއީ ޑިޖިޓަލް މާކެޓްސް އެކްޓް (ޑީއެމްއޭ) ގެ ދަށުން އީޔޫއިން ކުރި ފުރަތަމަ ޖޫރިމަނާއެވެ. އެޕަލް ކުންފުންޏަށް 500 މިލިއަން ޔޫރޯ (570 މިލިއަން އެމެރިކާ ޑޮލަރު) އަދި މެޓާ ކުންފުންޏަށް 200 މިލިއަން ޔޫރޯ އިން ޖޫރިމަނާ ކުރުމަށް ބުދަ ދުވަހު ނިންމާފައިވެއެވެ.
އީޔޫގެ އެންޓިޓްރަސްޓް ރެގިއުލޭޓަރުން މި ޖޫރިމަނާތައް ނިންމީ އެއް އަހަރުދުވަހުގެ ތަހުގީގުތަކަށް ފަހުއެވެ. މި ތަހުގީގުތަކުގައި ބެލީ 2023 ވަނަ އަހަރު ތަޢާރަފްކުރެވުނު ޑީއެމްއޭ ގާނޫނާ އެއްގޮތަށް ކުންފުނިތަކުން ޢަމަލުކުރޭތޯއެވެ. ޑީއެމްއޭގެ މައިގަނޑު މަގުސަދަކީ ބޮޑެތި ޓެކްނޮލޮޖީ ކުންފުނިތަކުގެ ބާރުތައް ހިފެހެއްޓުމާއި، ކުދި ވާދަވެރިންނަށް އެ މާކެޓްތަކަށް ވަދެވޭނެ މަގުފަހިކޮށްދިނުމެވެ.
ޖޫރިމަނާކުރެވުނު ސަބަބުތަކުގެ ތެރޭގައި އެޕަލް އަށް ތުހުމަތުކުރެވެނީ އެޕް ޑެވެލޮޕަރުންނަށް އެޕް ސްޓޯއިން ބޭރުން އަގުހެޔޮ ޑީލްތަކަށް ބަދަލުވުމަށް ހުރަސްއެޅުމާއި، "ސައިޑްލޯޑިން" ކިޔާ އެޕް ސްޓޯތަކާއި އެޕްތައް ވެބްއިން ޑައުންލޯޑް ކުރުމަށް ހުރަސްއެޅުމެވެ. އެޕަލްއިން ތަޢާރަފްކޮށްފައިވާ "ކޯ ޓެކްނޮލޮޖީ ފީ" ކިޔާ އައު ފީއަކީ ޑެވެލޮޕަރުން އައިއޯއެސް ބޭނުންކުރުމަށް ހުރަސްއެޅޭ ގޮތަށް އޮތް އެއްޗެއްކަމަށް ޔޫރަޕިއަން ޔޫނިއަނުން ބުނެފައިވެއެވެ.
މެޓާއަށް ކުރެވުނު ޖޫރިމަނާއަކީ ފޭސްބުކް އަދި އިންސްޓަގްރާމްގައި 2023 ވަނަ އަހަރުގެ ނޮވެމްބަރ މަހު ތަޢާރަފްކުރި "ޕޭ-އޯ-ކޮންސެންޓް" މޮޑެލް ޑީއެމްއޭ އާ ހިލާފުވުމުގެ ސަބަބުންނެވެ. މި މޮޑެލްގެ ދަށުން ޔޫޒަރުންނަށް ދެ ގޮތެއް އޮވެއެވެ: އިޝްތިހާރުތަކުގެ އާމްދަނީއަށް ބަރޯސާވާ ހިލޭ ހިދުމަތެއް ނުވަތަ އިޝްތިހާރު ނުހިމެނޭ ހިދުމަތަކަށް ފައިސާ ދެއްކުމެވެ. މި މޮޑެލް މިހާރުވަނީ 2024 ވަނަ އަހަރުގެ ނޮވެމްބަރުގައި ބަދަލުކޮށްފައެވެ.
އެޕަލް އިން ވަނީ މި ޖޫރިމަނާ ދެކޮޅަށް ދަޢުވާ ކުރާނެކަމަށް ބުނެފައެވެ. އެޕަލްއިން ބުނާގޮތުގައި އީޔޫގެ މި ނިންމުމަކީ އެޕަލްގެ ޔޫޒަރުންގެ ޕްރައިވަސީއަށާއި ސަލާމަތަށް ގެއްލުންވެދާނެ ނިންމުމެކެވެ. އެހެންމެ، އެޕަލްގެ ޓެކްނޮލޮޖީ ހިލޭ ދޫކޮށްލުމަށް މަޖުބޫރު ކުރަނީކަމަށް އެ ކުންފުނިން ބުނެއެވެ.
މެޓާއިންވެސް މި ނިންމުމަށް ފާޑުކިޔައި، ޔޫރަޕިއަން ކޮމިޝަނުން އެމެރިކާގެ ކާމިޔާބު ވިޔަފާރިތަކަށް އަމާޒުކޮށް ގޯނާކުރާ ކަމަށާއި، ޗައިނާގެ އަދި ޔޫރަޕްގެ ކުންފުނިތަކަށް ތަފާތު މިންގަނޑުތަކުން ހިންގުމަށް ހުއްދަ ދީފައިވާކަމަށް ބުނެފައިވެއެވެ. މެޓާގެ ޗީފް ގްލޯބަލް އެފެއާޒް އޮފިސަރު ޖޮއެލް ކަޕްލަން ވިދާޅުވީ މިއީ ހަމައެކަނި ޖޫރިމަނާއެއް ނޫންކަމަށާއި، ކޮމިޝަނުން މެޓާގެވިޔަފާރީގެ މޮޑެލް ބަދަލުކުރުމަށް މަޖުބޫރުކުރުމަކީ މެޓާއަށް ބިލިއަނުން ޓެރިފް ނެގުން ކަމަށެވެ.
މި ޖޫރިމަނާތަކަކީ އެމެރިކާގެ ރައީސް ޑޮނަލްޑް ޓްރަމްޕާއި އީޔޫއާ ދެމެދު ދެބަސްވުން އުފެދިދާނެ ކަމެއް ކަމަށް ބެލެވެއެވެ. ކުރިން، ފެބްރުއަރީ މަހު، ޓްރަމްޕް ވަނީ އެމެރިކާގެ ކުންފުނިތަކާއި އުފެއްދުންތެރިންނަށް އެހެން ގައުމުތަކުން އަނިޔާވެރިވެގެން ދާނަމަ އެ ގައުމުތަކާ ދެކޮޅަށް ފިޔަވަޅު އަޅާނެކަމަށް ބުނެފައެވެ.
އެއާއެކު، އީޔޫގެ މި ނިންމުންތަކުން އެނގެނީ ޓެކްނޮލޮޖީ ކުންފުނިތަކާ ދެކޮޅަށް 2023 ވަނަ އަހަރު ތަޢާރަފްކުރި ގާނޫނުތައް ތަންފީޒުކުރުމުގައި އީޔޫ ދެމިއޮންނާނެކަމެވެ. އަލްފާބެޓް (ގޫގުލް) އަދި އެލޮން މަސްކްގެ އެކްސްގައި ވެސް މިހާރު އީޔޫ ރެގިއުލޭޓަރުންގެ ޖޫރިމަނާތަކާ ކުރިމަތިލާން ޖެހިދާނެއެވެ.
އީޔޫގެ އެންޓިޓްރަސްޓް ޗީފް ޓެރެސާ ރިބެރާ ވިދާޅުވީ މީ ދެ ކުންފުންޏާމެދު ކަނޑައެޅި، ވަޒަންކުރެވޭ ފިޔަވަޅުތަކެއް ކަމަށާއި، މި ފިޔަވަޅުތައް ކަނޑައެޅިފައިވަނީ ސާފު އަދި ލަފާކުރެވޭ ގަވާއިދުތަކަށް ބިނާކޮށްކަމަށެވެ. އީޔޫގައި މަސައްކަތްކުރާ ހުރިހާ ކުންފުނިތަކުން އީޔޫގެ ގަވާއިދުތަކަށް ހުރުމަތްތެރިކޮށް ހިތަންވާނެ ކަމަށާއި، ޔޫރަޕިއަން އަގުތަކަށް އިހުތިރާމްކުރަންވާނެކަމަށް އޭނާ ވިދާޅުވިއެވެ.
ޔޫރަޕިއަން ޔޫނިއަންގެ މެމްބަރެއްކަމަށްވާ އެންޑްރިއާސް ޝްވާބް ކޮމިޝަނަށް ގޮވާލާފައިވަނީ ގޫގުލްގެ ފައިދާބޮޑު އެޑްޓެކް ވިޔަފާރިއާއި އެލޮން މަސްކްގެ އެކްސްއާ ދެކޮޅަށް ކުރިއަށްގެންދާ ތަހުގީގުތައް ދެމެހެއްޓުމަށެވެ. އޭނާ ވިދާޅުވި ގޮތުގައި ހުކުމް ތަންފީޒުކުރުމުގައި ލުއިތައް ދިނުމުން ޖުމްލަކޮށް ވާދަވެރިކަމުގެ ސިޔާސަތުގެ މުހިންމުކަމަށް އަސަރުކޮށްފާނެކަމަށެވެ.
