ދުނިޔޭގެ ފުޓްބޯޅައިގެ މައި އިދާރާ، ފީފާގެ ސަސްޕެންޝަނަކުން ރާއްޖެ ސަލާމަތްކުރުމުގެ ބާރު މި ވަގުތަށް ބަލާއިރު އޮތީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މެމްބަރު ކްލަބްތަކުގެ އަތްމަތީގައި ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން މިނިސްޓަރު ރާފިއު ވިދާޅުވީ، އޭނާ އެ މަގާމާ ހަވާލުވިއިރު ވެސް ރާއްޖޭގެ ފުޓްބޯޅަ އޮތީ "އައިސީޔޫގައި" ކަމަށެވެ. އެ ގޮތުން، ހާލަތު ބަދަލުކުރަން ކުރެވުނު މަސައްކަތްތަކުން ފުޓްބޯޅައިގެ ކަންކަމުގައި ކުރިއެރުންތަކެއް ވެސް ހޯދުނު ކަމަށާއި އެކަމަކު، އަދިވެސް ބޮޑެތި ގޮންޖެހުންތައް އެބަހުރި ކަަމަށް ރާފިއު ވިދާޅުވި އެވެ.
ގައުމީ ފުޓްބޯޅަ ޓީމުގެ ޑޮކްޓަރު ކަމާއި މެނޭޖަރުގެ ޒިންމާ ވެސް އަދާކުރެއްވި ރާފިއު ވިދާޅުވީ، އެފްއޭއެމް ހިންގުން ވަރަށް ދަށްވެފައި އޮތް ހާލަތެއްގައި މަގާމަށް އައިސް، މިނިސްޓްރީގެ ފަރާތުން ކަންކަން ރަނގަޅުކުރަން ދޭން ޖެހޭ ސަޕޯޓް ދީފައިވާނެ ކަމަށެވެ.
އެ ގޮތުން، ރާއްޖޭގެ އިގްތިސާދީ ހާލަތު އެންމެ ރަނގަޅަށް ނެތް ދަނޑިވަޅެއްގައި ވެސް ފުޓްބޯޅަ އަށް ހަރަދުކުރިކަން ރާފިއު ފާހަގަކުރެއްވި އެވެ.
އެއީ، މިދިޔަ އަހަރު ފުޓްބޯޅައިގެ ހަރަދުތަކަށް ތިން މިލިއަން ރުފިިޔާ އަށް ވުރެ ގިނައިން ހަރަދުކުރުމާއި ދާދި ފަހުން .ފުރަތަމަ ޑިވިޝަންގެ ކްލަބްތަކަށް (އެއް ކްލަބް ފިޔަވައި) އެތައް މިލިއަން ރުފިޔާ ހަރަދުކުރުމެވެ.
ރާއްޖޭގެ ފުރަަތަމަ ޑިވިޝަން މި މަހު އަށް ވަނަ ދުވަހު ފަށަން އެކި ގޮތްގޮތަށް މަސައްކަތްކުރެވުނުއިރު، ސަރުކާރުން ފައިސާ ދިނީ ވެސް އެ އަށް ބަލައިފަ އެވެ. އެކަމަކު، ސީޒަން ފެށުން އޮގަސްޓަށް ފަސްކުރަން ފީފާ އިން އެންގިއިރު، ފީފާ/އޭއެފްސީގެ ރުހުމާ އެކު ބާއްވަން މަސައްކަތް ކުރާ ވާދަވެރި މުބާރާތުގައި ވެސް ބައިވެރިވީ މަދު ޓީމުތަކެކެވެ.
"ބައެއް ޓީމުތަކުން އެދުނީ ސީޒަން ލަސްކުރަން. އެ ގޮތަށް ފީފާ އިން ވެސް އެ ނިންމީ އަޅުގަނޑު ދެކޭގޮތުގައި. އަޅުގަނޑުމެން އެންމެން މެޖޯރިޓީ ގޮތެއް ނުނިންމިއްޖިއްޔާ ގިނަ ފަހަރު ފީފާ އިން ނިންމާނީ ކަންތައްތައް. އެހެންމަ ރެސްޕޮންސިބިލިޓީ މިއޮތީ ކްލަބްތަކުގެ އަތުގައި، ފުޓްބޯޅައިގެ ކުރިއެރުން، ފުޓްބޯޅައިގެ ފިއުޗާ މި އޮތީ ފުޓްބޯޅައިގެ މެމްބަރު ކްލަބްތަކުގެ އަތުގައި، މެމްބަރު ކްލަބްތަކުން އެއްބަސްކިޔާފައި މެޖޯރިޓީ ކްލަބްތަކުން ބޭނުން ގޮތަކަށް ގެންދެވެން މި އޮތީ. ފުޓްބޯޅަ ކޮޅަށް ޖަހަން ކްލަބްތަކުން ބޭނުންވިއްޔާ އެއީ ވަރަށް ފަސޭހަކަމެއް،" ރާފިއު ވިދާޅުވި އެވެ.
ރާއްޖޭގެ ފުޓްބޯޅައިގެ ހާލަތު ބަދަލުކުރަން ކުރެވުނު މަސައްކަތުގެ އަލީގައި، ފީފާ/އޭއެފްސީގެ ވަފުދެއް ރާއްޖެ ވަޑައިގެންނެވި ކަމަށް ވެސް މިނިސްޓަރު ވިދާޅުވި އެވެ.
ރާފިއު ވިދާޅުވީ އެ ވަފުދު، ރާއްޖެ ވަޑައިގެން، އެކްސްޓްރާ އޯޑިނަރީ ކޮންގްރެސް އެއް ކުރިއަށްދިޔައިރު، އެ ބައްދަލުވުމަށް ވެސް ހާޒިރުނުވާ ކްލަބްތަކެއް އޮތުމަކީ ކަންބޮޑުވުމެއް ކަމަށެވެ.
"މިއީ ވޯޓާ ވެސް ގުޅުން ހުރި ކަމެއް ނޫން. މި އުޅެނީ ވޯޓާ ހަމައަށް ދާން ކުރަން ޖެހޭ ކަންކަން ކުރުމަށް، އެ މަރުހަލާ ވެސް ނިމިގެން އެ ދިޔައީ، ދެން، އޮތީ ހިންގާ ގަވާއިދު ބަދަލުކޮށް، ދެން އެ އަށް ފަހު ވޯޓިން މަރުހަލާ އަށް ދިއުން. މިއީ ފުޓްބޯޅައިގެ މުސްތަގުބަލާއި އޮނިގަނޑު ބިނާކުރާނެ ގޮތް ކަނޑައެޅުމުގެ މަރުހަލާ މި ކަމުގައި އެންމެ އިސް މަސައްކަތެއް ކުރެވޭނީ މެމްބަރު ކްލަބްތަކަށް،" ރާފިއު ވިދާޅުވި އެވެ.
ރާއްޖޭގެ ފުޓްބޯޅައިގެ ހާލަތު ބަދަލުކުރުމުގެ ގޮތުން، ތިން މަރުހަލާއެއްގައި ކަންކަން ފުރިހަމަވާން ޖެހޭ ކަމަށް ރާފިއު ވިދާޅުވި އެވެ. އެ ގޮތުން، ފީފާ އިން ދީފައިވާ އިރުޝާދުގެ ތެރެއިން، ކަންކަން ކުރިއަށްގެންދިއުން މުހިންމު ކަމަށް ވިދާޅުވި އެވެ.
"ހަގީގަތަކީ އަހަރެމެންގެ އެސޯސިއޭޝަން ދެ ވަަނަ ފަހަރަށް މި ސްޓޭޖަށް އައިސްފައި މި އޮތީ. އެސޯސިއޭޝަނަކަށް ދިމާވާނެ އެންމެ ބޮޑު އެއް ހިތްދަތިކަމަކީ، މި ސިޓުއޭޝަނަށް އައުން، ނޯމަލައިޒް ކުރުން. އެ އަށް ވުރެ ބޮޑަށް މި އޮންނަނީ އެއްކޮށް ސަސްޕެންޑްވުން، އެހެންވެއްޖިއްޔާ، ހުރިހާ ކްލަބްތަކެއް ޑިސޯލްވްވެގެންދިޔައީ. އެހެންމަ، ފުޓްބޯޅަ ރާއްޖޭގައި ކުރިއަރުވާނީތޯ ނޫނީ ފުޓްބޯޅަ ސަސްޕެންޑްކުރާނީތޯ، ނޫނީ ސަސްޕެންޝަނާ ހަމައަށް ދާނީތޯ މި އޮތީ (މެމްބަރު) ކްލަބްތަކުގެ އަތުގައި،" ރާފިއު ވިދާޅުވި އެވެ.
ފީފާ އިން ވަނީ އެފްއޭއެމްގެ ހިންގާ ގަވާއިދުގަައި ހުރި މެމްބަރު ކްލަބްތަކަށް ވޯޓު ދިނުމުގެ ހައްގު ލިބޭ ގޮތަށް ބަދަލު ގެނައުމަށާއި ކްލަބަކަށް ފުލް މެމްބަރުކަން ލިބޭނެ ގޮތް ކަނޑައެޅުމާއި އެފްއޭއެމް އިންތިހާބުގައި ވާދަކުރަން ކެންޑިޑެސީ ހުށަހަޅާއިރު، ހުރިހާ މެމްބަރު ކްލަބެއްގެ ހައްގުތައް ކަށަވަރުވާނެހެން ކަންކަން ބަދަލުކުރަން ލަފާދީފަ އެވެ.
ރާފިއު ވިދާޅުވީ، ފީފާ އިން އެފްއޭއެމްގެ އަސާސީ ގަވާއިދަށް ގެންނަން ދޭ ލަފާތައް އަޑުއަހައި، އެ ގޮތަށް އަމަލުނުކޮށްފިނަމަ، ދާދި ފަހުން ޕާކިސްތާނަށް ދިން ފަދަ ސަސްޕެންޝަނެއް އައުމުގެ ފުރުސަތު އެބައޮތް ކަމަށެވެ.
އެފްއޭއެމްގެ ރައީސް ކަމަށް އަންނާނެ ފަރާތެއްގެ ވޯޓު ނެގުން އޮތީ އަދި ފަހުން ކަމަށާއި، މި ވަގުުތު ރާއްޖޭގެ ފުޓްބޯޅަ ސަލާމަތްކުރަން އިސްކަންދީގެން، އަސާސީ ގަވާއިދުގެ ބަދަލުތަކަށް މެމްބަރު ކްލަބްތަކުން ކަންކަން ކުރުމަކީ އެންމެ މުހިންމު ކަންތައް ކަމުގައި ދެކިގެން މަސައްކަތް ކުރަން ޖެހޭ ކަންތައް ކަމަށް މިނިސްޓަރު ވިދާޅުވި އެވެ.
