އެމެރިކާގެ އެލަބާމާ އަށް ނިސްބަތްވާ އަންހެނަކަށް ޓްރާންސްޕްލާންޓް ކުރި އޫރެއްގެ ކިޑްނީ 130 ދުވަހަށް ފަހު ނަގަން ޖެހިއްޖެ އެވެ.
މި އަންހެން މީހާގެ ހަށިގަނޑުން އެ ކިޑްނީ ނެގުމަށް ފަހު އޭނާ މިހާރު ވަނީ އަލުން ޑައިލިސިސް ފަށައިފަ އެވެ.
ޓަވާނާ ލޫނީ އަކީ މި އޮޕަރޭޝަން ހެދި އަންހެން މީހާއެވެ. އޭޕްރިލް 4 ވަނަ ދުވަހު އެންވައިޔޫ ލެންގޯން ހެލްތުގައި ކުރި އޮޕަރޭޝަނުން އޭނާގެ ހާލު ރަނގަޅުވަމުން އަންނައިރު، މިހާރު އޭނާ ވަނީ އެލަބާމާގެ ގެޑްސްޑެންއަށް އެނބުރި ގޮސްފައެވެ.
އޭނާ ދީފައިވާ ބަޔާނެއްގައި ވަނީ މި "އިންކްރެޑިބަލް ރިސާޗް" ގައި ބައިވެރިވުމުގެ ފުރުސަތު ދިން ކަމަށްޓަކައި ޑޮކްޓަރުންނަށް ޝުކުރު އަދާކޮށްފައެވެ.
"ނަތީޖާ އަކީ އެއްވެސް މީހަކު އެދުނު ގޮތް ނޫން ނަމަވެސް، އޫރެއްގެ ކިޑްނީއަކާއެކު އުޅުނު 130 ދުވަހުން ވަރަށް ގިނަ ކަންތައްތަކެއް ދަސްވެއްޖެކަން އަހަރެންނަށް އެނގޭ. އަދި މިއީ ކިޑްނީގެ ބަލިތަކާ ކުރިމަތިލާ އެތައް ބަޔަކަށް އެހީތެރިވެ، ހިތްވަރު ދޭނެ ކަމެއް،" ލޫނީ ވަނީ ބުނެފައެވެ.
ސައިންޓިސްޓުން މިހާރު މަސައްކަތް ކުރަމުންދަނީ އޫރުގެ ގުނަވަންތައް އިންސާނުންގެ ގުނަވަންތަކާ ވީހާވެސް އެއްގޮތް ކުރުމަށް ޖެނެޓިކް ބަދަލުތަކެއް ގެނައުމަށެވެ. މިއީ ޓްރާންސްޕްލާންޓް ކުރެވޭނެ އިންސާނުންގެ ގުނަވަންތައް ލިބުމުގައި ދިމާވެފައިވާ ބޮޑު ދަތިކަމަށް ހައްލެއް ހޯދުމަށް ކުރެވޭ މަސައްކަތެކެވެ.
އެމެރިކާގައި 100،000 އަށް ވުރެ ގިނަ މީހުން ޓްރާންސްޕްލާންޓް ލިސްޓުގައި ތިބިއިރު، އޭގެ ތެރެއިން ގިނަ މީހުންނަށް ބޭނުންވަނީ ކިޑްނީ އެވެ. އަދި ކޮންމެ އަހަރަކު އެތައްހާސް މީހުން ޓްރާންސްޕްލާންޓަށް އިންތިޒާރު ކުރަމުން ދަނިކޮށް މަރުވެ އެވެ.
ލޫނީގެ ޓްރާންސްޕްލާންޓުގެ ކުރިން، ޖެނެޓިކް ބަދަލު ގެނެވިފައިވާ އޫރުގެ ގުނަވަންތައް ޓްރާންސްޕްލާންޓް ކުރެވިފައިވަނީ އެމެރިކާގެ ހަތަރު މީހުންނަށެވެ. އެއީ ދެ ހިތާއި ދެ ކިޑްނީއެވެ. މި ގުނަވަންތައް ދެމިހުރީ ގިނަވެގެން ދެ މަސް ދުވަހު އެވެ. އެ ހަތަރު މީހުންނަކީ ވެސް ޓްރާންސްޕްލާންޓް ކުރުމުގެ ކުރިން ވަރަށް ބޮޑަށް ބަލިވެ އުޅުނު ބައެކެވެ.
ލޫނީއަކީ 2016 އިން ފެށިގެން ޑަޔަލިސިސް ހަދަމުންދިޔަ އަދި އާންމު ޓްރާންސްޕްލާންޓަކަށް ޝަރުތު ހަމަނުވާ މީހެކެވެ. އޭނާއަށް ނޮވެމްބަރު 25 ގައި އޫރެއްގެ ކިޑްނީއެއް ޓްރާންސްޕްލާންޓް ކުރެވުނެވެ. މިކަން ގާތްގަނޑަކަށް ހަތަރު މަހާއި ބައި ދުވަހު ކާމިޔާބުވި އެވެ. އެހެންނަމަވެސް މި އޭޕްރީލްގެ ކުރީކޮޅު އޭނާގެ ހަށިގަނޑުން އެ ގުނަވަން ރިޖެކްޓްކުރަން ފެށި އެވެ.
ކަމާބެހޭ ފަރާތަކުން ހާމަކޮށްފައިވާ ގޮތުގައި މިއީ އޫރެއްގެ ކިޑްނީ އެންމެ ގިނަ ދުވަހު އިންސާނެއްގެ ހަށިގަނޑުގައި މަސައްކަތް ކުރި ފަހަރެވެ.
ރިޖެކްޝަން ފެށުމުގެ ކުރިން ލޫނީއަށް އިންފެކްޝަނެއް ޖެހި އޭނާގެ އިމިއުން-ސަޕްރެސިން ބޭސް މަދުކޮށް ދަށްކުރަން ޖެހުނެވެ.
އޭނާގެ ޑޮކްޓަރު ބުނިގޮތުގައި އޫރުގެ ކިޑްނީ ނެގުމަކީ ބާރުގަދަ ބޭސް ދިނުމަށް ވުރެ ރައްކާތެރި ގޮތް ކަމަށެވެ.
ޓްރާންސްޕްލާންޓަށްފަހު ޑޮކްޓަރުން ދެ ގޮތެއްގެ ރިސްކާ ކުރިމަތިވެ އެވެ. ހަށިގަނޑުން ޓްރާންސްޕްލާންޓް ރިޖެކްޓްކުރުމާއި އިންފެކްޝަންއާ ދެކޮޅަށް ހަނގުރާމަކުރުމާ ދެމެދު ހަމަހަމަކަމެއް ބޭއްވުމެވެ.
ޑޮކްޓަރުން ދެން ކުރާ ތަޖުރިބާތަކަށް ލޫނީގެ މި ހާއްސަ ތަޖުރިބާއިން ފިލާވަޅުތަކެއް ލިބޭނެ ކަމަށް ޑރ. މޮންޓްގޮމަރީ ބުނެފައިވެ އެވެ.
ޒީނޯޓްރާންސްޕްލާންޓޭޝަންއަކީ (ޖަނަވާރުގެ ގުނަވަން އިންސާނުންނަށް ބަދަލުކުރުމުގެ) ސައިންސްގެ ދާއިރާގައި އެންމެ ކުރިއަރަމުން އަންނަ ދާއިރާ އެވެ. މީގެ މައިގަނޑު މަގުސަދަކީ، އިންސާނީ ގުނަވަންތަކުގެ ދަތިކަން ހައްލުކުރުމެވެ. ހާއްސަކޮށް ކިޑްނީ ޓްރާންސްޕްލާންޓްތަކުގެ ދިގު ވެއިޓިން ލިސްޓްތަކާއި ގުޅިގެންނެވެ.
އޫރުގެ ގުނަވަންތައް ބޭނުންކުރެވެނީ އިންސާނީ ގުނަވަންތަކާ އެއްގޮތްކަންތައް ގިނަވުމާއެކު ޖީން ޓެކްނޮލޮޖީއާއެކު ހާއްސަ ބަދަލުތަކެއް ގެނެސް، އިންސާނީ ހަށިގަނޑުން އަވަހަށް ރިޖެކްޓްކުރުން ހުއްޓުވުމަށެވެ.
ޔުނައިޓެޑް ނޭޝަންސް ޔުނިވާސިޓީ (އެންވައިޔޫ) ފަދަ ހޮސްޕިޓަލްތަކުން މީހުންނަށް ޓްރަޔަލްގެ ގޮތުގައި ޒީނޯޓްރާންސްޕްލާންޓް ކުރުމަށް ހުއްދަދީފައިވާއިރު، ޑަބްލިއުއެޗްއޯއިން ފާހަގަކޮށްފައިވާ ގޮތުގައި ދުނިޔޭގައި ކޮންމެ ދުވަހަކު 12 މީހުން މަރުވަނީ ޓްރާންސްޕްލާންޓަށް ބޭނުންވާ ގުނަވަން ނުލިބިގެންނެވެ.
ލޫނީގެ ހާލަތް ދިރާސާކުރުމަކީ ބަލިމީހުންގެ ފުރާނަ ސަލާމަތްކުރުމާއި އިންސާނީ ޓްރާންސްޕްލާންޓްގެ ދަތިކަން ނިމުމަކަށް ގެނައުމަށް އެޅޭ ހަރުދަނާ ފިޔަވަޅެކެވެ.
