ދުނިޔޭގެ އީސްޕޯޓްސް މައިދާނަށް އައު ހަލަބޮލި ކަމެއް ގެނެސްދޭނެ ކަމަށް ބެލެވޭ، ގޭމަރުންނަށް ހާއްސަ އައު އޯވަލޭ ފީޗާއެއް ޑިސްކޯޑުން ތައާރަފުކޮށްފި އެވެ. މި ފީޗާއަކީ ގޭމަރުންނާއި ސްޓްރީމަރުންނަށް އެތައް ގޮތަކުން ފައިދާކުރާނެ ކަމަށް ބެލެވޭ އަޕްޑޭޓެކެވެ.
އަންގާރަ ދުވަހު ޑިސްކޯޑުން ކުރި އިއުލާނުގައި ބުނެފައިވަނީ މި އޯވަރލޭ ފީޗާ ފަރުމާކޮށްފައި ވަނީ "މުޅިން އަލުން" ކަމަށެވެ. މި ބަދަލާއެކު ގޭމް ސްޓްރީމްކުރުމުގެ ތަޖުރިބާ ވަރަށް ބޮޑަށް ރަނގަޅުވެގެންދާނެ ކަމަށް ޑިސްކޯޑުން ބުނެފައިވެއެވެ.
ކުރިން ބޭނުންކުރަމުން އައި އޯވަލޭގައި ހުރި އެންމެ ބޮޑު މައްސަލައަކީ މުޅި ޑިސްކޯޑް ކްލައިންޓް ސްކްރީނުގެ މެދުތެރެއަށް އައިސް ސްޓްރީމް ބްލޮކްވުމެވެ. ނަމަވެސް އާ އަޕްޑޭޓާއެކު ގޭމަރުންނަށް ވަކިވަކި ވިޖެޓްތައް ސްކްރީނުގެ ވަށައިގެން ބެހެއްޓޭނެ އެވެ. މިގޮތުން މެސެޖްތައް ފެނުމާއި، އަޑާއި ވީޑިއޯގެ ސެޓިންގްތައް ބަދަލުކުރުން ފަދަ ކަންކަން ކުރެވޭނެއެވެ.
ފޮޓޯ ކްރެޑިޓް: ޑިސްކޯޑް
އީސްޕޯޓްސް ދާއިރާގައި މުހިންމު ބަދަލެއް ގެނެސްދޭނެ ކަމަށް ބެލެވޭ އަނެއް ފީޗާއަކީ ޕިކްޗާ-އިން-ޕިކްޗާ ވިޖެޓެވެ. މި ވިޖެޓް މެދުވެރިކޮށް އެއް ގޭމަރަކަށް އެހެން ގޭމަރެއްގެ ސްޓްރީމް ބެލޭނެ އެވެ. މިއީ ޓީމް ގޭމްތަކުގައި ވަރަށް ބޮޑަށް ބޭނުންތެރިވާނެ ފީޗާ އެކެވެ. އަދި ލައިވް ޗެޓްތަކުގައި އެހެން ބައިވެރިންގެ ވެބްކެމް ވީޑިއޯވެސް މިފީޗާ މެދުވެރިކޮށް ފެންނާނެއެވެ.
ޑިސްކޯޑުން މަޢުލޫމާތު ދީފައިވާ ގޮތުގައި މި އައު އޯވަލޭ ފީޗާ އިތުރު ގިނަ ގޭމްތަކާ ގުޅި، ޕާފޯމަންސް ވެސް ރަނގަޅުވާނެ އެވެ. މިއީ އީސްޕޯޓްސް ކުޅުންތެރިންނާއި ސްޓްރީމަރުންނަށް ލިބޭ ވަރަށް ބޮޑު ކުރިއެރުމެއް ކަމަށް ގިނަ ފަރާތްތަކުން ދެކެއެވެ.
ޑިސްކޯޑުން އޭގެ ޑެސްކްޓޮޕް އެޕްލިކޭޝަނަށްވެސް ބައެއް އަޕްޑޭޓްތައް ތައާރަފުކުރަމުންދާ ކަމަށް ވަނީ ހާމަކޮށްފަ އެވެ. އެގޮތުން ޑާކް މޯޑް ބޭނުންކުރުމަށް ޝައުޤުވެރިވާ ފަރާތްތަކަށް އުފާވެރި ހަބަރެއްގެ ގޮތުގައި، އިތުރު ހިލޭ ޑާކް ތީމްތަކެއް ލިބެން ފަށާނެ އެވެ. މިގޮތުން ކަޅު އަދި ގްރޭ ކުލައިގެ ތަފާތު ޝޭޑްތަކުގެ މެދުގައި ބަދަލުކުރެވޭނެ އެވެ. މީގެ ތެރޭގައި އޭޝް، ޑާކް އަދި އޮނިކްސް ހިމެނެ އެވެ. މީގެ އިތުރުން، އައު ޔޫއައި ޑެންސިޓީ އޮޕްޝަންތަކުން ޔޫޒަރުންނަށް ލަފުޒުތަކުގެ ދެމެދުގައި ހުންނަ ޖާގަ ބަދަލުކުރެވޭނެ އެވެ.
ފޮޓޯ ކްރެޑިޓް: ޑިސްކޯޑް
މި އަޕްޑޭޓްތައް އަމާޒުކުރެވިފައިވަނީ ގިނައިން ބޭނުންކުރާ ފަރާތްތަކަށެވެ. ހާއްސަކޮށް ސާވާ ތެރޭގައި ލައިވްސްޓްރީމްތައް ކޮށްގެން ފައިސާ ހޯދާ ކްރިއޭޓަރުންނަށެވެ. ނަމަވެސް، ރައްޓެހިންނާއެކު ގޭމް ކުޅޭ އާންމު ޔޫޒަރުންނަށްވެސް މި ފެންވަރު މަތިކޮށްދޭ އަޕްގްރޭޑްތައް މަރުހަބާ ކިޔާނެ ކަމަށް ބެލެވެ އެވެ.
ޑިސްކޯޑަކީ މައިގަނޑު ގޮތެއްގައި ގޭމަރުންނަށް އަމާޒުކޮށްގެން ހަދާފައިވާ 2015 ވަނަ އަހަރު ތައާރަފު ކުރެވުނު، މުވާސަލާތީ ޕްލެޓްފޯމެކެވެ. މި ޕްލެޓްފޯމް އުފެއްދި ފަހުން، އޭގެ މަގުބޫލުކަން އަވަސް ދުވެއްޔެއްގައި އިތުރުވެ، މިހާރު ވަނީ ގޭމިން ކޮމިއުނިޓީގެ އިތުރުން އެހެނިހެން އޮންލައިން ކޮމިއުނިޓީތަކުގެ މެދުގައިވެސް ވަރަށް މަގުބޫލު ވެފަ އެވެ.
ޑިސްކޯޑްގެ ހާއްސަ ކަންތައްތަކުގެ ތެރޭގައި ޓެކްސްޓް، ވޮއިސް އަދި ވީޑިއޯ ޗެޓް، ސާވާތައް ހެދުމުގެ ގާބިލުކަން، އަދި ސްކްރީން ޝެއަރިން ފަދަ ކަންކަން ހިމެނެ އެވެ.
ޑިސްކޯޑުން އަބަދުވެސް މަސައްކަތް ކުރަމުންދަނީ އޭގެ ފީޗާތައް އިތުރަށް ފުރިހަމަކޮށް، ބޭނުންކުރާ ފަރާތްތަކަށް އިތުރު ފަސޭހަތަކެއް ހޯދައިދިނުމަށެވެ. މިފަހަރު ތަޢާރަފުކޮށްފައިވާ އައު އޯވަރލޭ ފީޗާއަކީ މި މަސައްކަތުގެ އެއް ނަތީޖާއެވެ.
