ބެންކޮކް، ތައިލޭންޑް (މާޗު 26) - ތައިލޭންޑްގެ ބޮޑުވަޒީރު ޕެއިތޮންތާން ޝިނަވަޓްރާއާ ދެކޮޅަށް ނެގި އިތުބާރު ނެތް ކަމުގެ ވޯޓު ފެއިލް ކޮށްލައިފި އެވެ.
އެ ގައުމުގެ ތާރީހުގައި ބޮޑުވަޒީރު ކަމުގެ މަގާމު ފުރުއްވާ އެންމެ ހަގު ބޭފުޅާ ކަމަށްވާ ޕެއިތޮންތާންގެ އިތުބާރު އޮތް ކަމަށް ގާނޫނު ހަދާ މަޖިލީހުގެ 488 މެންބަރުންގެ ތެރެއިން 319 މެންބަރުން ވޯޓު ދެއްވި އެވެ. އޭނާއާ ދެކޮޅަށް މިފަދަ މައްސަލައެއް މި ހުށަހެޅުނީ މަގާމާ ހަވާލުވިތާ ހަތް މަސް ފަހުންނެވެ.
އިދިކޮޅު ފަރާތްތަކުން ތުހުމަތު ކުރާ ގޮތުގައި މަގާމުގެ މަސްއޫލިއްޔަތުތައް އަދާކުރުމަށް ބޭނުންވާ ތަޖުރިބާ އާއި އިލްމެއް އޭނާގެ ކިބައިގައި ނެތެވެ. އޭގެ އިތުރުން، ވެރިކަމުގެ ކަންކަމުގައި ބައްޕަ އަދި ބިލިއަނަރު ތަކްސިން ޝިނަވަޓްރާ އަންގާ ގޮތް ހަދަމުންދާ ކަމަށް ވެސް ތުހުމަތު ކުރެވެ އެވެ.
ޕެއިތޮންތާން ވަނީ އޭނާއާ ދެކޮޅަށް ކުރާ ހުރިހާ ތުހުމަތަކަށް އިންކާރު ކުރައްވާފަ އެވެ. އޭނާ ވެރިކަން ކުރައްވަމުން ގެންދަވަނީ 11 ޕާޓީ ހިމެނޭ ކޯލިޝަނަކުންނެވެ.
