އއ. ރަސްދޫގައި ރޭ ހިނގި އަލިފާނުގެ ހާދިސާގައި ފިހުނު ޒުވާން ދެމަފިރިންގެ ހާލު ގޯސްވެ، ވެންޓިލޭޓަރަށް ލައިފި އެވެ.
އައިޖީއެމްއެޗްގެ މީޑިއާ އޮފިޝަލް ހައްވާ އަފީފާ އަދަދު އަށް ވިދާޅުވީ ފިހިގެން އެ ހޮސްޕިޓަލަށް ގެނައީ 31 އަހަރުގެ ދެމަފިރިންގެ ހާލު ސީރިއަސްކަމުން ފަރުވާ ދެމުންދަނީ ވެންޓިލޭޓަރުގައި ކަމަށެވެ.
ފިހުނު އަންހެން މީހާ މި ވަގުތު އައިސީޔޫއަށް ބަދަލުކޮށްފައިވާއިރު، ފިރިހެން މީހާ އައިސީޔޫއަށް ބަދަލު ކުރުމުގެ މަސައްކަތް ކުރަމުންދާ ކަމަށް އަފީފާ ވިދާޅުވި އެވެ.
"މިއަދު ހެނދުނު ބެލިއިރު އެމަޖެންސީގައި ފަރުވާ ދެމުންދިޔައީ. އެއީ 31 އަހަރު އަންހެން ބޭފުޅަކާއި ފިރިހެން ބޭފުޅެއް. އަންހެން ބޭފުޅާ އައިސީޔޫއަށް ލާފައި ވަނީ. ފިރިހެން ބޭފުޅާ އައިސީޔޫއަށް ޓްރާންސްފާ ކުރުމުގެ މަސައްކަތް ދަނީ ކުރިއަށް. ދެބޭފުޅުންނަށް ފަރުވާ ދެނީ ވެންޓިލޭޓަރުގައި،" އޭނާ ވިދާޅުވި އެވެ.
ރަސްދޫ ކައުންސިލްގެ ރައީސް މުހައްމަދު ނާހިދު މި ނޫހަށް ވިދާޅުވީ އެ ދެމަފިރިން ދިރިއުޅެމުންދިޔަ ގޭގެ ކޮޓަރީގައި ރޭ ހިނގި އަލިފާނުގެ ހާދިސާގައި ފިހުނީ އެ ދެމަފިރިން އެކަނި ކަމަށެވެ.
އެ ދެމަފިރިންގެ ފަސް އަހަރުގެ ތުއްތު ކުއްޖަކު ހުންނައިރު، އަލިފާނުގެ ހާދިސާ ހިނގި ވަގުތު އެ ކުއްޖާ ކޮޓަރީގައި ނޫޅޭ ކަމަށް ވެސް އޭނާ ބުންޏެވެ.
އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެ އެވެ. އަދި މިކަމާ ގުޅިގެން ފުލުހުން ވެސް އަދި މިހާތަނަށް އެއްޗެއް ބުނެފައެއް ނުވެ އެވެ.
