އެންމެ ކަޑަ ނުވަތަ ކަމުނުދާ ގޭމުގެ ގޮތުގައި ފާހަގަކުރެވިފައިވާ "ބިގް ރިގްސް: އޯވާ ދަ ރޯޑް ރޭސިން" އަލުން ނެރުމަށް ތައްޔާރުވާން ފަށައިފި އެވެ.
މީގެ 22 އަހަރު ކުރިން 2003 ނެރުނު މި ގޭމަކީ ވަރަށް ދަށް ފެންވަރުގެ ގޭމެއްގެ ގޮތުގައި ވަނީ މަޝްހޫރުވެފަ އެވެ.
ސްޓީމްޑީބީގެ ޑޭޓާބޭސްގައި މިއަދު ބުނެފައިވާ ގޮތުގައި މި ގޭމް 2025 ވަނަ އަހަރުގެ ދެވަނަ ކުއާޓަރުގައި އަލުން ނެރުމަށް ރޭވިފައި ވިޔަސް މިގޭމް ދެވަނަ ފަހަރަށް ނެރެނީ އިތުރު އަޕްޑޭޓްތަކާ އެކުގައި ކަމެއް އަދި ނޭނގެ އެވެ.
ސްޓީމްގައި މި ގޭމުގެ ތަފްސީލުގައި ބަޔާންކޮށްފައިވާ ގޮތުން، މި ގޭމަކީ އެމެރިކާގެ އެކި ސަރަހައްދުތަކުގައި ބޮޑެތި ޓްރަކުތައް ދުއްވައިގެން މުދާ އުފުލުމާއި ރޭސް ކުރުމުގެ މައްޗަށް ބިނާކޮށްފައިވާ ގޭމެކެވެ.
މި ގޭމް ތަރައްގީކުރި ކުންފުންޏަކީ ސްޓެލާ ސްޓޯން ކަމަށްވާއިރު، ޕަބްލިޝްކުރާ ފަރާތަކީ މާގަރީޓް އެންޓަޓެއިންމަންޓް ކަމަށް ބަޔާންކޮށްފައިވެ އެވެ. ނަމަވެސް މާގަރީޓް އެންޓަޓެއިންމަންޓްގެ މައުލޫމާތު އިންޓަނެޓުން ލިބެން ނެތެވެ.
މި ގޭމް އަލުން ނެރުމަށް ރޭވިފައިވާކަމުގެ މައުލޫމާތު ހާމަވެފައި މިވަނީ އޭޕްރިލް ފޫލްސް ޑޭއާ ކައިރިވަމުންދާ ދުވަސްވަރެއްގައި ކަމަށްވުމާއެކު، މިއީ މަޖަލަކަށް ބަޔަކު ފަތުރައިގެން އުޅޭ މައުލޫމާތެއް ކަމަށްވުމުގެ ފުރުސަތު އޮތްކަމަށް ވެސް ބައެއް ފަރާތްތަކުން ބުނެ އެވެ.
ނަމަވެސް މިއީ ތެދު މައުލޫމާތެއް ކަމުގައިވާނަމަ، މެޓަކްރިޓިކްގައި ސައްތައަކުން އެންމެ 8 ޕޮއިންޓް ލިބި، އެންމެ ދަށް ރޭޓިންގެ ގޭމުތަކުގެ ތެރޭގައި ހިމެނޭ ގޭމެއް އަލުން ނެރުމަށް ތައްޔާރުވަމުންދާކަން ފާހަގަކުރެވެ އެވެ.
ބިގް ރިގްސް: އޯވާ ދަ ރޯޑް ރޭސިން" ގޭމް 2003 ވަނަ އަހަރު ނެރުނު އިރު، ގޭމްސްޕޮޓުން މި ގޭމަށް ދިނީ 10 ން 1 ޕޮއިންޓެވެ. މި ގޭމުގައި ކޮލިޝަން ޑިޓެކްޝަން ނެތުމާއި، ސީޕީޔޫ އޮޕޮނަންޓުން ރޭސް ފެށޭ ހިސާބުން ކުރިއަށް ނުދިއުމާއި، ގޭމް ކޮންޓްރޯލް ކުރުމުގައި ހުރި މައްސަލަތަކުގެ ސަބަބުން މި ގޭމަށް ވަރަށް ބޮޑަށް ފާޑުކިޔާފައިވެއެވެ.
މީގެ އިތުރުން، މި ގޭމުގައި ރޭސް ކާމިޔާބުކުރުމުން ދައްކާ ސްކްރީނުގައި "ޔޫ އާ ވިނަ" މިހެން ލިޔެފައި ހުންނަ ގޮތުން، މި ގޭމަކީ އިންޓަނެޓުގައި މަޖާ މީމްއަކަށްވެސް ވެފައިވާ ގޭމެކެވެ.
ގޭމްސްޕޮޓުން 2003 ވަނަ އަހަރު މި ގޭމަށް ދިން ރިވިއުގައި ބުނެފައިވަނީ މިއީ ވަރަށް ދަށް ފެންވަރުގެ ގޭމެއް ކަމަށެވެ. އެހެން ކަމުން މި ގޭމުގެ އަގު ވެސް ވަނީ ވަރަށް ބޮޑަށް ދަށްކޮށްފައެވެ. އަދި މި ގޭމް ނެރުނު ކުންފުނިން މި ގޭމް ރަނގަޅަށް ޓެސްޓުކޮށްފައިވާކަމަށް ބުނެފައިވީ ނަމަވެސް، ގޭމުގެ ފެންވަރުން ވަރަށްބޮޑަށް ދަށް ކަމަށް ގޭމްސްޕޮޓުން ފާހަގަކޮށްފައިވެއެވެ.
