މާލޭ ދަތުރުވެރިންގެ މާރުކޭޓުގައި ކުރުނބާ ސަޕްލައި ވަރަށް ބޮޑަށް މަދުވެ، ކުރުނބައެއްގެ އަގު 60ރ. އަށް އުފުލިއްޖެ އެވެ.
މި ރޯދަ މަސް ފެށުނުއިރު ރަނގަޅު ކުރުނބައެއްގެ އަގު ހުރީ 25ރ. އާއި 35ރ. އާ ދެމެދުގަ އެވެ. ނަމަވެސް މިއަދު ބާޒާރުގައި ކުޑަ ކުރުނބައެއްގެ އަގު ހުރީ 45ރ. އާއި 60ރ. އާ ދެމެދުގަ އެވެ.
ކުރުނބާ ފުޅިއެއްގެ އަގު މި ރޯދަ މަސް ފެށުނު ފަހުން އެންމެ މައްޗަށް ވެސް އަރައިގެންދިޔައީ 160ރ. އަށެވެ. ނަމަވެސް މިއަދު ބާޒާރުގައި ކުރުނބާ ފުޅިއެއްގެ އަގު ވެސް ވަނީ 180ރ. އަށް އަރައިފަ އެވެ.
ކުރުނބާ ސަޕްލައި ދަށްވުމާ ގުޅިގެން ލަންކާއިން ވެސް ކުރުނބާ ގެނެސްގެން މިފަހަރު ބާޒާރުގައި ވިއްކާފައިވެ އެވެ. އެކަމަކު ލަންކާ އިން ގެނައި ޝިޕްމަންޓު ވެސް ބާޒާރުން މިހާރު ވަނީ ހުސްވެފަ އެވެ.
ބާޒާރުގައި ކުރުނބާ ފުޅި ވަކިން ވިއްކާ ވިޔަފާރިވެރިއަކު އަދަދު އާ ވާހަކަދައްކަމުން ބުނީ މިއަދު ކުރުނބާ ފުޅި ނުވިއްކާ ކަމަށާއި އެއީ ކުރުނބާ ވަކިން ލިބޭ އަގު އިންތިހާއަށް ބޮޑުވުމުން ކަމަށެވެ.
"ކުރުނބައެއް މި ލިބެނީ 50ރ. ނުވަތަ 60ރ. އަށް. ކިހިނެއް އެވަރުން ފުޅި ހަދައިގެން ވިއްކަނީ. ކުރުނބާ ހަމަ އެއްގޮތަކަށް ވެސް ނުލިބިގެން މިއުޅެނީ،" އޭނާ ބުންޏެވެ.
ބާޒާރުން ވާހަކަ ދެއްކި އިތުރު މީހަކު މި ނޫހަށް ބުނީ މާދަމާ ވެސް ކުރުނބާގެ އަގު އިތުރަށް އުފުލޭނެ ކަމަށާއި ކުރުނބާ ލިބޭނެ މަގެއް މިހާތަނަށް ފަހި ކުރެވިފައި ނުވާ ކަމަށެވެ.
އާންމުކޮށް ރޯދަ މަހު މީހުން ބޭނުންކުރާ ބާވަތްތަކުގެ ތެރޭގައި ހިމެނޭ ކަރާ ކިލޯއެއްގެ އަގު 30ރ. އަށް ވަނީ އުފުލިފަ އެވެ. އަދި ކާއްޓެއް 10ރ. އިން ފެށިގެން 30ރ. އަށް ލިބެން ހުއްޓެވެ.
ބާޒާރުގައި މިއަދު އެންމެ އަގު ކުޑަކޮށް ހުރީ މިރުހުގަ އެވެ. އެގޮތުން 100 ގްރާމް މިރުސް ލިބެން ހުރީ 10ރ. އާއި 15ރ. އަށެވެ. ކިލޯއެއްގެ އަގު 100ރ. އަށް ވެސް ލިބެން އެބަހުއްޓެވެ.
