އީސްޕޯޓްސްގެ މަގުބޫލުކަން ދުނިޔޭގައި އިތުރުވެ، ގޭމިން މުބާރާތްތަކުގައި ކުޅޭ ކުޅުންތެރިންނަށް މިލިއަނުން ފައިސާ ލިބޭއިރު، ދުނިޔޭގެ އެކި ކަންކޮޅުތަކުގައި ގޭމިން އޯގަނައިޒޭޝަންތައް ދަނީ އިތުރަށް އުފެދެމުންނެވެ. މިފަދަ އޯގަނައިޒޭޝަންތަކާއި އިދާރާތައް މެދުވެރިކޮށް ޕްރޮފެޝަނަލް ކުޅުންތެރިން، ހަމަ ކޮންމެ ދުވަހަކު ވެސް އަންނަނީ އިތުރުވަމުންނެވެ. ނަމަވެސް މިފަދަ ކުޅިވަރެއްގައި ވެސް ކުޅުންތެރިންނަށް ސިއްހީ ގޮތުން ގެއްލުން ލިބޭ ކަންތައްތަކެއް ހުރެއެވެ.
މިކަމުގައި އެންމެ އާންމުކޮށް ފެންނަ ގެއްލުމަކީ އަތާއި އުޅަނބޮށި، އަދި މުޅި އަތްދަނޑީގެ މައްސަލަތަކެވެ. ޕްރޮފެޝަނަލް ކުޅުންތެރިން ދުވާލަކު 8-12 ގަޑިއިރަށްވުރެ ގިނައިރު ގޭމްކުޅުމުގެ ސަބަބުން (ވަކި ހަރަކާތްތަކެއް ތަކުރާރުކޮށް ކުރުމުން) އެ ހަރަކާތަށް ބޭނުންކުރާ ހަށިގަނޑުގެ ބައިތަކަށް ބޮޑެތި ގެއްލުންތައް ލިބެ އެވެ.
މީގެތެރޭގައި ރިޕެޓިޓިވް ސްޓްރެއިން އިންޖަރީއާއި (RSI)، ކާޕަލް ޓަނަލް ސިންޑްރޯމް، ޓެނިސް އެލްބޯ އަދި ގޭމާސް ތަމްފަދަ ހާލަތްތައް ހިމެނެއެވެ. މިފަދަ ހާލަތްތަކުގައި އަތުގައި ވޭން އިހުސާސްވުމާއި، ހަންގަނޑު ކުރަކިވުމާއި، ބާރު ދެރަވުންފަދަ ކަންކަން ތަޙައްމަލުކުރަން ޖެހެއެވެ.
އަދި ހަމައެހެންމެ ދިގު މުއްދަތަކަށް ގޭމްކުޅުމުގެ ސަބަބުން ބުރަކައްޓާއި ކަނދުރާގައި ރިހުމާއި، ލޮލުގެ މައްސަލަތައް ކުރިމަތިވުމަކީ ޕްރޮފެޝަނަލް ކުޅުންތެރިންގެ މެދުގައި އާންމުކޮށް ދިމާވާ ކަމެކެވެ.
ކޮންމެ ގަޑިއިރަކުން ހުސް ވަގުތުކޮޅެއް ނުނަގައި، ސްކްރީނަށް އެއްކޮށް އަބަދު ބަލައިގެން، އެއްތަނެއްގައި ގިނަ ވަގުތު ހޭދަކުރުމަކީ ވެސް ލޮލަށް ގެއްލުން ލިބިދާނެ ނުރަނގަޅު އާދައެކެވެ.
މީގެ އިތުރުން ނިދުމުގައި ދަތިތަކާދިމާވެ، ކަންބޮޑުވުމާއި ނަފުސާނީ ގެއްލުންތައް ލިބުމަކީ ވެސް މިފަދަ ކުޅުންތެރިންގެ މެދުގައި އާންމުކޮށް ދިމާވާ ކަމެކެވެ.
ގިނަ ދިރާސާތަކުން ދައްކާގޮތުގައި މިފަދަ މައްސަލަތަކުން ސަލާމަތްވުމަކީ އޭގެ ޒާތުގައި އުނދަގޫ ކަމެއް ނޫނެވެ. އެގޮތުން މި މައްސަލަތަކުން ސަލާމަތްވުމަށްޓަކައި ގޭމް ކުޅުމުގެ ކުރިއާއި ފަހުން ބައެއް ކަސްރަތުތައް ކުރުމަކީ ކެރިއާ ދިގުމުއްދަތަކަށް ދެމެހެއްޓުމަށް އެހީވެދޭނެ ކަމެކެވެ.
މިގޮތުން އަތުގެ ކަސްރަތު ތަކާއި، ކަރާއި ބުރަކަށީގެ މައްސަލަތަކުން ސަލާމަތްވުމަށް ބޭނުންވާ ކަސްރަތު ތައް ދާއިމީކޮށް ހުއްޓައިނުލައި ކުރުމާއި، އަދި ލޮލުގެ މައްސަލަތަކުން ސަލާމަތްވުމަށް 20-20-20 ގަވާއިދު ފަދަ ގޮތްތައް ބޭނުންކުރެވިދާނެއެވެ. އެއީ ކޮންމެ 20 މިނެޓަކުން، 20 ފޫޓު ދުރުގައި ހުރި އެއްޗަކަށް 20 ސިކުންތު ބެލުމެވެ. މިއީ ލޮލަށް ހުސްވަގުތުކޮޅެއް ދިނުމަށް އެންމެ ރަނގަޅު އެއް ގޮތެވެ.
ގޭމިން ސެޓަޕް ރަނގަޅުކުރުމަކީ ވެސް މިފަދަ މައްސަލަތައް ހުއްޓުވުމަށް ވަރަށް މުހިންމު ކަމެކެވެ. މީގެތެރޭގައި މޮނިޓަރުގެ މަތީކައިރި ލޮލާ އެއްލެވެލްގައި ބެހެއްޓުމާއި، ކޮނޑު ވެސް ސީދާކޮށް ބެހެއްޓުމާއި، ގޮނޑީގައި އިންނައިރު، ބުރަކަށްޓަށް ސަޕޯޓް ލިބޭގޮތަށް އިށީނުމާއި، ފައިތިލަ ބިމުގައި ޖެހޭގޮތަށް ބެހެއްޓުން ހިމެނެއެވެ.
ޕްރޮފެޝަނަލް ގޭމިންގ ދުނިޔެއަށް ނިކުންނަން ބޭނުންވާ ހުރިހާ ފަރާތްތަކުން ވެސް މިފަދަ ކަންކަމަށް ސަމާލުކަން ދެއްވުން އެދެވިގެންވެއެވެ. މިގޮތަށް ސަމާލުކަން ދިނުމަކީ ކެރިއަރ ދިގުމުއްދަތަކަށް ދެމެހެއްޓުމަށް އެހީވެދޭނެ ކަމެއް ކަމުގައި ފާހަގަކުރެވެއެވެ.
އެހެނީ މިފަދަ ސިއްހީ ދަތިތަކަކީ ޕްރޮފެޝަނަލް ކުޅުންތެރިންގެ ކެރިއާ އަވަހަށް ނިމުމަކަށް ގެނެސްދޭ އެންމެ ބޮޑު ސަބަބުކަމުގައި ފާހަގަކުރެއެވެ. އަދި އެއްވެސް ވޭނެއް ނުވަތަ ރިހުމެއް ގިނަ ދުވަސްވަންދެން ނުފިލާ ހުރެއްޖެނަމަ، ނުވަތަ އަތާއި އަތްތިލައަށް ނާޒުކު ވޭންތަކެއް ނުވަތަ ކުރަކިވުން އިހުސާސްވާނަމަ، ވަގުތުން ޑޮކްޓަރަކަށް ދެއްކުމަކީ މުހިންމު ކަމެކެވެ. އަދި މިފަދަ ކަސްރަތު ތައް ކުރުމުގެ ކުރިން އެންމެ ރަނގަޅީ ދާއިރާގެ އެކްސްޕާޓެއް ނުވަތަ ސިއްހީ އެހީތެރިއެއްގެ އެހީހޯދުމެވެ.
އީސްޕޯޓްސްއަކީ މިހާރު ވަރަށް މުހިންމު ވާދަވެރި ކުޅިވަރަކަށް ވެފައިވާއިރު، ގޭމަރުންނަށް މަދުން ނަމަވެސް ސިއްހީ މައްސަލަތައް ދިމާވެއެވެ. މިފަދަ މައްސަލަތަކުން ސަލާމަތްވެ ދެމެހެއްޓެނިވި ގޮތެއްގައި ކުޅުންތެރިއެއްގެ ގޮތުގައި ދެމިހުރުމަށް އެކަށީގެންވާ ކަސްރަތުތައް ކުރުމާއި، ގޭމިންގ ސެޓަޕް ރަނގަޅުކުރުމާއި އަދި ހަށިގަނޑަށް އިހުސާސްވާ ވޭންތަކަށް ސަމާލުކަން ދިނުން ވަރަށް މުހިންމެވެ.
މިކަންކަމަށް ސަމާލުކަން ދީފިނަމަ އިސްޕޯޓްސްގައި ކުރިއަށް ދާން ބޭނުން ފަރާތްތަކަށް އޮތީ އުފާވެރި އުއްމީދީ މުސްތަގުބަލެކެވެ.
