ރޯދަ ހަދިޔާގެ ގޮތުގައި ދައުލަތުގެ ބަޖެޓުން ހަރަދުކޮށްގެން ރައްޔިތުންނަށް ދޭ މަސްދަޅު ކޭސް މާލޭ ސަރަހައްދުން ދޫކުރާނެ މަރުކަޒުތައް އިތުރުކޮށް، އޮންލައިންކޮށް ނަންބަރު ނެގޭ ގޮތް ހަދައިފި އެވެ.
ބުރާސްފަތި ދުވަހުގެ ރޭ މާލޭގައި މަސްދަޅު ބަހަން ފެށީ ދެ މަރުކަޒަކުންނާއި ހުޅުމާލޭގައި ދެ މަރުކަޒަކުން އަދި ވިލިމާލެއިންނެވެ.
އެ މަރުކަޒުތަކުގައި އެރޭ ދަމައިލި ދިގު ކިޔޫ ނިމުނީ މެންދަންވި ފަހުންނެވެ. އެކަމާގުޅިގެން ރައީސް ޑރ. މުހައްމަދު މުއިއްޒަށް ވަރަށް ބޮޑަށް ފާޑުކިޔުން އަމާޒުވި އެވެ..
އެހެންވެ، މަރުކަޒުތައް އިތުރުކޮށް އިންތިޒާމުތައް ރަނގަޅުކުރުމަށް ފަހު، މިރޭ އަލުން މަސްދަޅު ދޫކުރަން ފަށާނެވެ.
ލޯކަލް ގަވާމެންޓު މިނިސްޓްރީން ނެރުނު ބަޔާނެއްގައި ބުނީ މާލޭ ސަރަހައްދުގައި ޖުމުލަ 13 ސެންޓަރަކުން މަސްދަޅު ބަހާނެ ކަމަށެވެ.
މަސްދަޅު ބަހާ މަރުކަޒުތައް އަދި ދޫކުރާ ނަންބަރުގެ އަދަދު
- މިފްކޯ ކޮމްޕްލެކްސް (މާފަންނު) - 200 ނަންބަރު
- އެމްޓީސީސީ ސޯމިލް - 200 ނަންބަރު
- ހެންވޭރު ދަނޑު - 100 ނަންބަރު
- ގަލޮޅު ދަނޑު (ސެޓަޕް 1) - 50 ނަންބަރު
- ގަލޮޅު ދަނޑު (ސެޓަޕް 2) 50 ނަންބަރު
- ގަލޮޅު ދަނޑު (ސެޓަޕް 3) 50 ނަންބަރު
- ގަލޮޅު ދަނޑު (ސެޓަޕް 4) 50 ނަންބަރު
- ސޯޝަލް ސެންޓަރު - 100 ނަންބަރު
- ވިލިމާލޭގެ ވެމްކޯ ސައިޓު - 100 ނަންބަރު
- އުމަރު ޒާހިރު ބިލްޑިން - 100 ނަންބަރު
- ޕޮލްކޯ ޓަވަރު (ސީ ބްލޮކް) - 100 ނަންބަރު
- ހިޔާ ޓަވަރު 10 - 100 ނަންބަރު
- ކާމިލްދީދީ ޕްރީސްކޫލް - 100 ނަންބަރު
ކިޔޫ ނަންބަރު ދޫކުރާނީ އޮންލައިން ސިސްޓަމަކުންނެވެ.
"މި ނިޒާމުގެ ތެރެއިން ވަކި ރެޔަކަށް ވަކި މަރުކަޒަކުން ޓޯކަން ނެގުމުން، އެ ރެއެއްގައި އެ މަރުކަޒަކަށް އެ ބޭފުޅަކަށް މަސްދަޅު ލިބޭނެ އިންތިޒާމު ހަމަޖެހިގެންދާނެ އެވެ،" މިއަދު ނެރުނު ބަޔާނުގައިވެ އެވެ.
ނަމަވެސް ނަންބަރު ދޫކުރަން ހުޅުވާ ނުލަ އެވެ.
އޮންލައިންކޮށް ނަންބަރު ނުނެގޭ ފަރާތްތަކުން މަސްދަޅު ދޫކުރާ މަރުކަޒަކަށް ދިޔުމުން، ނަންބަރު ނެގުމަށް އެހީތެރިވެދޭނެ އެވެ.
ކޮންމެ ނަންބަރަކަށް ދޫކުރާނީ ގިނަވެގެން 3 ކޭސް މަހެވެ.
މާލޭގެ ހުރިހާ ގޭބިސީއަކަށް މަސްދަޅު ލިބެންދެން މަސްދަޅު ބެހުން ކުރިއަށް ދާނެ ކަމަށް ސަރުކާރުން ވަނީ ބުނެފަ އެވެ.
ރައީސް ޑރ. މުހައްމަދު މުއިއްޒުގެ ނިންމެވުމަށް މި އަހަރު މަސްދަޅު ދޫކުރާއިރު، މިދިޔަ އަހަރު ރޯދަ ހަދިޔާ އަށް ދޫކުރީ 10 ކިލޯ ގޮދަންފުށެވެ.
