ގޯލްޑަން ފުޓްސަލް ޗެލެންޖް 2025 ގެ ކުއާޓާ ފައިނަލުގައި އެންމެ ފަހުގެ ޗެމްޕިއަން އޭދަފުށި 5-6 ގެ ނަތީޖާ އަކުން ބަލިކޮށް ރަނަރަޕް ގަމުން ސެމީ ފައިނަލަށް ދަތުރުކޮށްފި އެވެ.
މި މުބާރާތުގެ ސެމީ ފައިނަލުގައި ވިދިވިދިގެން ގަމުން ކުޅޭ މިއީ ތިން ވަނަ ފަހަރެވެ. ގަމުން މީގެ ކުރިން ސެމީ ފައިނަލު ކުޅުނީ 2023 ވަނަ އަހަރު އަދި 2024 ވަނަ އަހަރުގަ އެވެ. އެ ދެ ފަހަރު ވެސް ގަމުން ވަނީ ފައިނަލުގައި ވާދަކޮށްފަ އެވެ.
މި މެޗުގެ ހަތްވަނަ މިނިޓްގައި އޭދަފުށިން ގޯލު ޖަހައި ލީޑު ނެގި އެވެ. މި ގޯލު އެ ޓީމަށް ކާމިޔާބު ކޮށްދިނީ ނިޝާމް މުހައްމަދު ރަޝީދު (ޕޮގްބާ) އެވެ. އަދި އޭގެ ފަހުން މެޗުގެ 14 ވަނަ މިނިޓްގައި އޭދަފުށިން ވަނީ އިތުރު ގޯލެއް ޖަހައި ލީޑު ފުޅާކޮށްފަ އެވެ. މިއީ، އޭރިއާތެރެއިން ހަމަޖެހިލައިފައި ގޯލަށް ބޯޅަ ފޮނުވާލައިގެން، މުއާޒް އަލީ ޖެހި ގޯލެކެވެ.
އެކަމަކު، މެޗުގެ ދެވަނަ ހާފުގައި ގަމުން ވަނީ ކުޅުން ރަނގަޅުކޮށް އޭދަފުށި ހާފަށް ބާރުބޮޑު ކޮށްފަ އެވެ. އެ ގޮތުން, މެޗުގެ 26 ވަނަ މިނިޓްގައި ގަމުގެ ހަސަން ފަވާޒް (ފައްވަ) ގޯލު ޖަހައި ފަރަގު ކުޑަކޮށްފަ އެވެ. އަދި އޭގެ މިނިޓް އެއް ފަހުން ފައްވަ ވަނީ އިތުރު ގޯލެއް ޖަހައި ނަތީޖާ ހަމަހަމަ ކޮށްފަ އެވެ.
މެޗުގެ ފުރިހަމަ ވަގުތު 2-2 ގެ ނަތީޖާ އަކުން ނަތީޖާ ހަމަހަމަވުމުން ނަތީޖާ ނެރުނީ ޕެނަލްޓީ ޖަހައިގެންނެވެ.
ގަމާއި އޭދަފުށި ބައްދަލުކުރި ކުއާޓާ ފައިނަލް މެޗުގެ ތެރެއިން - ފޮޓޯ: އަތޫގް އާތިފް / އަދަދު ސްޕޯޓްސް
މެޗުގައި ޕެނަލްޓީގައި ދިޔައީ މައްސަލަ ބޮޑުކޮށެވެ. އެ ގޮތުން، ގަމުގެ އަހުމަދު ހަލީމް (އައްމަޑޭ) ފޮނުވާލި ޕެނަލްޓީއެއް، އޭދަފުށީގެ ގޯލަށް ޕެނަލްޓީގައި އެރި، މުހައްމަދު އަޖުފާން މަތަކޮށް، ބޯޅަ ހިފައިގެން ރޮނގުމަތިން ވެއްޓުނެވެ. ލައިނުގައި ހުރި ރެފްރީ ފުރަތަމަ ނިންމީ އަޖުފާން އެ ޕެނަލްޓީ ހުއްޓުވީ ކަަމަށެވެ. އެކަމަކު، އެ ނިންމުމާ ދެކޮޅަށް ގަމުގެ އޮފިޝަލުންނާއި ކުޅުންތެރިން ހިތްހަމަނުޖެހުން ފާޅުކޮށް އެޕީލްކުރަން ރެފްރީ ވަށާލި އެވެ.
އޭގެ ފަހުން، ޕެނަލްޓީ ޖެހިއިރު، ދެ ފަޅީގައި ތިބި ރެފްރީންނާއި މެޗުގެ ހަތަރު ރެފްރީންގެ ލަފާ އެހުމަށް ފަހު، އައްމަޑޭ ޖެހި ޕެނަލްޓީ ގޯލަށް ވަން ކަމަށް ނިންމުމާ އެކު، ރެފްރީގެ ނިންމުން ބަދަލުކުރީ ކަމަށް ބުނެ، އޭދަފުށީގެ ކުޅުންތެރިންނާއި އޮފިޝަލުން ހިތްހަމަނުޖެހުން ފާޅުކުރި އެވެ. އަދި ފަހުން، ޕެނަލްޓީ ކުރިއަށް ގެންދަން، ކުރި މަސައްކަތަށް އޭދަފުށީ ޓީމުގެ ތިން އޮފިޝަލަކު ހުރަސް އެޅި ކަމަށް، އެެ ތިން އޮފިޝަލުންނަށް ރަތް ކާޑު ދައްކައި، ދަނޑުން ބޭލީ ޕޮލިހުންގެ އެހީގަ އެވެ.
ޕެނަލްޓީ ކުރިއަށް ގެންދިޔައިރު، އޭދަފުށީގެ އަލީ ނަޝީމް (ދިއްލި) ފޮނުވައިލި ޕެނަލްޓީ ގަމުގެ ކީޕަރު އަހުމަދު ހުޝާމް ވަނީ ދިފާއު ކޮށްފަ އެވެ. މީގެ އިތުރުން އޭދަފުށީގެ ހައްފާފް ސިދުގީ ފޮނުވާލި ޕެނަލްޓީ ގޯލާ އަމާޒުނުވެ ދިޔައީ ބޭރަށެވެ.
ގޯލްޑަންގެ ތަށި ދިފާއުކުރަން މިދިޔަ އަހަރު ފައިނަލަށް ނުކުމެ އޭދަފުށި އަތުން ބަލިވިއިރު، އޭގެ ފަހުން، ގަމުން މި ވަނީ މި ފަހަރުގެ ޗެރިޓީ ޝީލްޑް މެޗާއި ކުއާޓާ ފައިނަލުގައި އޭދަފުށި އަތުން މޮޅުވެފަ އެވެ.
ނައިވާދޫ އާއި މަހިބަދޫ ބައްދަލުކުރި މެޗުގެ ތެރެއިން - ފޮޓޯ: އަތޫފް އާތިފް / އަދަދު ސްޕޯޓްސް
މީގެ އިތުރުން މިރޭ ކުޅުނު ދެވަނަ ކުއާޓާ ފައިނަލުގައި ނައިވާދޫ އިން ވަނީ 7-4 ގެ ނަތީޖާ އަކުން މަހިބަދޫ ބަލިކޮށް ސެމީ ފައިނަލުގެ ޖާގަ ކަށަވަރުކޮށްފަ އެވެ.
މި މެޗުގެ ފުރަތަމަ ހާފުގައި ނައިވާދޫ ތަފާތު މޮޅުކޮށް ފެނިގެންދިޔައިރު, މި ހާފުގައި ނައިވާދޫ އިން ވަނީ ފަސް ގޯލު ޖަހާފަ އެވެ.
ނައިވާދޫ އިން މެޗުގެ ލީޑު ނެގީ ކެޕްޓަން އަހުމަދު ހަމީދު (އައްމަޑޭ) ޖެހި ގޯލުންނެވެ. އަދި އޭގެ ހަތަރު މިނިޓް ފަހުން ނައިވާދޫގެ އަބްދުالله ވިސާމް އެ ޓީމުގެ ލީޑު ފުޅާކޮށްދިންއިރު, އޭގެ ތިން މިނިޓް ފަހުން އައްމަޑޭ ވަނީ ނައިވާދޫގެ ތިންވަނަ ގޯލު ޖަހާފަ އެވެ. އަދި ނައިވާދޫން ފުރަތަމަ ހާފުގައި ޖެހި ފަހު ދެ ގޯލު ކައިރި ކައިރީގައި އެ ޓީމަށް ޖަހައިދިނީ މުހައްމަދު ޝާއިން އެވެ.
އެކަމަކު ފުރަތަމަ ހާފު ނިމުމުގެ ކުރިން މަހިބަދޫގެ އާދަމް ނާއިލް ވަނީ ގޯލު ޖަހައި ފަރަގު ކުޑަކޮށްފަ އެވެ.
ދެވަނަ ހާފުގައި މަހިބަދޫ އިން ވަނީ ކުރިއަށް ޖެހި ތިން ގޯލު ޖަހައިފަ އެވެ. މި ތިން ގޯލު ވެސް އެ ޓީމަށް ޖަހައިދިނީ އާދަމް ފަހުމާން އެވެ. ނައިވާދޫގެ ހަވަނަ ގޯލު އެ ޓީމަށް ޖަހައިދީ ޝާއިން ވަނީ އޭނާގެ ހެޓްރިކް ފުރިހަމަ ކޮށްފަ އެވެ.
މި މުބާރާތުގެ ސެމީ ފައިނަލުގައި އަންނަ ހުކުރު ދުވަހުގެރޭ ގަމުން ނުކުންނާނީ ނައިވާދޫއާ ދެކޮޅަށެވެ.
