މިއުނިކް (ފެބްރުއަރީ 15) - ޔޫރަޕްގެ ވަރުގަދަ ކްލަބްތަކުން ލިބުނު އޮފާތަކަށް ނޫނެކޭ ބުނެ، ޖަރުމަނުގެ މިޑްފީލްޑަރު، ޖަމާލް މުސިއާލާ، ބަޔާން މިއުނިކާ އެކު ހަދާފައި އޮތް ކޮންޓްރެކްޓް އާކޮށްފި އެވެ.
ހުނަރުވެރި ތަރި، މުސިއާލާ، 21، އޭނާގެ އުމުރުން 18 އަހަރު ފުރުނުތަނާ، ބަޔާނާ އެކު ހެދި ކޮންޓްރެކްޓް އޮތީ، 2026 ވަނަ އަހަރުގެ ސީޒަނުގެ ނިޔަލަށެވެ.
އެހެންވެ، ބަޔާނުން މިދިޔަ އަހަރު ފެށިގެން އައީ މުސިއާލާގެ ކޮންޓްރެކްޓް އާ ކުރެވޭތޯ މަަސައްކަތް ކުރަމުންނެވެ. އެކަމަކު، އެ މަޝްވަރާތަކަށް އަލިމަގެއް ނުފެނި ދިގުލައިދާތީވެ، ގިނަ ކްލަބްތަކުން އައީ މުސިއާލާ ހޯދުމުގެ ރޭހަށް ވަންނަމުންނެވެ.
ބަޔާނުން މުސިއާލާއާ އެކު ބޭއްވި މަޝްވަރާތަކުން ހައްލެއް ހޯދައި، އޭނާގެ އެއްބަސްވުން އާ ކުރީ، 2030 ވަނަ އަހަރުގެ ޖޫން މަހުގެ ނިޔަލަށެވެ.
މުސިއާލާ ބުނީ ބަޔާނަކީ އޭނާގެ ފުރަތަމަ ޕްރޮފެޝަނަލް ކޮންޓްރެކްޓް ސޮއިކުރި ކްލަބް ކަމަށާއި މިހާތަނަށް އައިއިރު ވެސް އެ ކްލަބްގައި ހުރެ އޭނާ އަށް މުސްތަގުބަލާ މެދު ކުރެވުނު އުންމީދުތަކާ އެއްގޮތަށް ކަންކަން ހާސިލްކުރެވުނު ކަމަށެވެ. އަދި، ކޮންޓްރެކްޓް އާ ކުރީ، ކުރިއަށް އޮތް އަހަރުތަކުގައި، އޭނާ އަށް އެ ކްލަބްގައި ހުރެ އެހެން ލެވަލަކަށް ދެވޭނެ ކަމުގެ ޔަގީންކަން އޮތުމުން ކަމަށެވެ.
ޖަރުމަނުގެ ސްޓުޓްގާޓަށް، ނައިޖީރިއާ އާއިލާ އަކަށް އުފަންވި، މުސިއާލާ ފަހުން، އިންގްލެންޑަށް ބަދަލުވެ، ޔޫތު ލެވަލްގައި އިންގްލެންޑް ގައުމީ ޓީމަށް ވެސް ކުޅުނެވެ.
މީގެ ހަ އަހަރު ކުރިން، މުސިއާލާގެ ސޮއި ބަޔާނުން ހޯދީ އޭނާގެ އުމުރުން 16 އަހަރުގަ އެވެ. ޗެލްސީ އެކަޑަމީގައި ނުވަ ވަރަކަށް އަހަރު ހޭދަކުރި، މުސިއާލާ، ސީނިއާ ޕްރޮފެޝަނަލް ލެވަލްގައި ޖަރުމަނު ޓީމަށް ކުޅެން ނިންމީ 2021 ވަނަ އަހަރުގެ ފެބްރުއަރީ މަހުގަ އެވެ. އޭނާ ވަނީ ޖަރުމަނަށް މިހާތަނަށް 38 މެޗު ކުޅެދީފަ އެވެ.
