ވިލާ ގްރޫޕުގެ ފައުންޑަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްއަކީ އަމިއްލަ ފައިދާއަށް މަސައްކަތް ކުރައްވާ ބޭފުޅެއް ނޫން ކަމަށާއި އެމަނިކުފާނަކީ އަބަދުވެސް އެހެން މީހުންނަށް ރަނގަޅު ގޮތް ހޯއްދަވައި ދެއްވަން މަސައްކަތް ކުރައްވާ ބޭފުޅެއް ކަމަށް ނިޝާން އިއްޒުއްދީންގެ ވެރިޔާ، އިލްޔާސް އިބްރާހިމް ވިދާޅުވެއްޖެ އެވެ.
ގާސިމް އިބްރާހިމްގެ ހަޔާތުނާމާ ނެރުމަށް މިރޭ ބޭއްވި ހާއްސަ ޖަލްސާގައި ވާހަކަދައްކަވަމުން އިލްޔާސް ވިދާޅުވީ ގާސިމްއަކީ އެންމެ ތުއްޕުޅު އިރުން ފެށިގެން ވެސް ވަރަށް ހިތްވަރު ގަދަ ބޭފުޅެއް ކަމަށެވެ. ފުރަތަމަ މާލެއަށް ފައިބާ ކިޔަވައި ވިދާޅުވީ ވެސް ވަރަށް ހިތްވަރާއެކު ވަރުގަދަ އަޒުމެއްގައި ހުންނަވައި ކަމަށް އޭނާ ވިދާޅުވި އެވެ.
އޭގެ ފަހުން މިއަދާ ހަމައަށް ވެސް އެކި ގޮތްގޮތުން އެކި ރޮނގޮރޮނގުން ގާސިމް ކޮށްދެއްވަމުން ގެންދަވާ ހިދުމަތްތައް އިލްޔާސް ފާހަގަ ކުރެއްވި އެވެ.
"ރާއްޖެއަށް މި ހެޔޮ ބަދަލުތަކެއް ގެނައުމުގެ ނިޔަތުގައި ރާއްޖެއިން އުފެދިގެން އައި މަދު މީހުންގެ ތެރޭގައި ގާސިމް ވަރަށް އިސް ދައުރެއް އަދާ ކުރެއްވި، މިހާރު އަޅުގަނޑުމެން މި ދެކޭ މިނިވަން ކަމާއި މި ޑިމޮކްރެސީ ގެނައުމުގައި ވަރަށް މުހިންމު ބައެއް އަދާ ކުރި، ކުރު ގޮތަކަށް ދަންނަވާ ނަމަ މި އިންތިހާބީ ރިޔާސަތު އުފެދިގެން އައިސް ފުރަތަމަ ދެ ފަހަރު ވެސް ތިން ފަހަރު ވެސް ދިޔައީ އޭގެ ތިންވަނަ ބާރަކަށް ގާސިމް އެ ފަރާތަކަށް ޖެހިވަޑައިގެން ފަރާތަކަށް ވެރިކަން ލިބުނީ،" އިލްޔާސް ވިދާޅުވި އެވެ.
ގާސިމްގެ ސިޔާސީ ކާމިޔާބީގެ ފަހަތުގައި ފޮރުވިފައި އޮތް ސިއްރަކީ ތެދުވެރިކަމާއި އިހުލާސްތެރިކަން ކަމަށް އިލްޔާސް ވިދާޅުވި އެވެ.
އިލްޔާސް ވިދާޅުވީ ގާސިމްއަކީ ރައްޔިތުންނަށް އެހީތެރިވުމުގަ އާއި ގައުމަށް ފައިދާ ހުރި ކަންކަން ކޮށްދިނުމުގައި ވެސް ނަމޫނާއެއް ކަމަށެވެ. އެގޮތުން އެމަނިކުފާނަކީ އަބަދުވެސް އެ އިރެއްގައި އަތުގައި ހުންނެވި މިންވަރަކުން މީހުންނަށް އެހީތެރިކަން ފޯރުކޮށްދެއްވި ބޭފުޅެއް ކަމަށާއި އެކަމަށް ހެކިވެވަޑައިގަންނަވާ ކަމަށް އިލްޔާސް ވިދާޅުވި އެވެ.
"ގާސިމްގެ ވިސްނުން، އެހެން މީހުންނަށް ފައިދާ ވާނެ، އެހެން މީހުންނަށް ރަނގަޅު ގޮތްތައް ހޯދައިދިނުމަށް ވަރަށް ބޮޑަށް ވެސް މަސައްކަތް ކުރައްވާ،" އިލްޔާސް ވިދާޅުވި އެވެ.
ގާސިމްގެ އެހީގައި ރާއްޖެއިންނާއި ރާއްޖެއިން ބޭރުން ތައުލީމު ހާސިލު ކުރި ދަރިވަރުންނަކީ އޭގެ ހެއްކެއް ކަމަށް އިލްޔާސް ވިދާޅުވި އެވެ.
އޭގެ އިތުރުން ރާއްޖޭގައި އާސަންދަ ފަދަ ހިލޭ ބޭސްފަރުވާގެ ނިޒާމެއް ނެތް ދުވަސްވަރެއްގައި އަމިއްލަ ހަރަދުގައި ދިވެހި އެތައް އާއިލާއަކަށް ރާއްޖެއިން ބޭރުން ބޭސްފަރުވާ ކުރެވޭނެ މަގު ގާސިމް ފަހި ކޮށްދެއްވިކަން އިލްޔާސް ފާހަގަ ކުރެއްވި އެވެ.
އޭނާ ވިދާޅުވީ ގާސިމްގެ ހިދުމަތްތަކަކީ އޭނާގެ ދުލުން އެކަނި ބަޔާން ނުކުރި ނަމަވެސް، މުޅި ރާއްޖޭގެ ރައްޔިތުންނަށް ފެންނާން ހުރި އަގުހުރި ހިދުމަތްތަކެއް ކަމަށެވެ.
