ގޯލްޑަން ފުޓްސަލް ޗެލެންޖް 2025 ގެ ޒޯން ދޭއްގެ ފައިނަލުގެ ކުރިން އިނގުރައިދޫ އިން ދުވާފަރު 3-2 ގެ ނަތީޖާ އަކުން ބަލިކޮށްފި އެވެ.
މި މުބާރާތުގައި އިނގުރައިދޫ އިން ރ. އަތޮޅުގެ ގްރޫޕް ސްޓޭޖުގައި އަދި ރ. އަތޮޅު ފައިނަލުގައި ކުޅުނު މެޗުގައި ވެސް ދުވާފަރު އަތުން ވަނީ މޮޅުވެފަ އެވެ. އެހެންވެ ފައިނަލުގެ ކުރިން ކުޅުނު މި މެޗާއެކު ދުވާފަރުން މި ފަހަރުގެ މުބާރާތުގައި އިނގުރައިދޫ އަތުން ބަލިވި މިއީ ތިން ވަނަ ފަހަރެވެ.
މި ޒޯނުގެ ފައިނަލުގައި ވެސް ވާދަކުރާނީ މި ދެ ޓީމެވެ.
ރޭ ކުޅުނު މެޗުގެ ހަ ވަނަ މިނިޓްގައި އިނގުރައިދޫ އިން ވަނީ ލީޑު ނަގައިފަ އެވެ. މި ގޯލު އެ ޓީމަށް ޖަހައިދިނީ އަލީ ހާފިޒް (ހާއްޕެ) އެވެ. އަދި މެޗުގެ 12 ވަނަ މިނިޓްގައި އިނގުރައިދޫގެ ލީޑު ފުޅާކޮށްދިނީ ކެޕްޓަން އަހުމަދު އައިހަމް (އައިހު) ޖެހި ގޯލުންނެވެ.
އެކަމަކު، އޭގެ ދެ މިނިޓް ފަހުން ދުވާފަރުގެ ކެޕްޓަން މުހައްމަދު ޖުމާން އަހުމަދު ގޯލު ޖަހާ ފަރަގު ކުޑަކުރި އެވެ. މެޗުގެ ފަހު މިނިޓްގައި ހާއްޕެ ވަނީ އިތުރު ގޯލެއް ޖަހައި ލީޑު ފުޅާކޮށްދީފަ އެވެ. ދުވާފަރުގެ ފަރަގު ކުޑަކުރީ ހަސަން އަޒޫމް ޖެހި ގޯލުންނެވެ.
މި ޒޯނުގައި ކަނޑިތީމުން ނ. އަތޮޅު ޗެމްޕިއަން މިލަދޫގެ މައްޗަށް ކުރިހޯދީ 7-5 ގެ ނަތީޖާ އަކުންނެވެ.
މި މެޗުގައި ކަނޑިތީމުގެ އަހުމަދު ރިޒާން ދެ ގޯލު ޖެހިއިރު, ކީޕަރު އިބްރާހީމް ޒަމީން, ކެޕްޓަން އިބްރާހީމް ނަދާދް (ކުޑައްޓޭ), މުހައްމަދު ޝާން, އިސްމާއިލް ނިހާން އަދި ޒަޔާން އަހުމަދު ވާސިފް, މިއިން ކޮންމެ ކުޅުންތެރިޔަކު ގޯލެއް ޖެހި އެވެ.
މިލަދޫގެ ގޯލުތައް އެ ޓީމަށް ޖަހައިދިނީ މުހައްމަދު ޔައިޝް ނާއިޒް, އަބްދުالله ޝަމީމް, ހުސެއިން ޝާފީ, އަހުމަދު އިނާފް އަބްދުالله އަދި ހަސަން އަބްދުއް ސަމަދު އެވެ.
މި ޒޯނުގެ ފައިނަލް މެޗުގައި އިނގުރައިދޫ އިން ދުވާފަރާ ދެކޮޅަށް ނުކުންނާނީ އަންނަ ބުދަ ދުވަހުގެރޭ 08:00 ގަ އެވެ.
