އިއްޔެ ބޭއްވި ބައި އިލެކްޝަންތަކުގެ ތެރެއިން ނ. މިލަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު ގެއްލުމާއެކު އެ ރަށު ފެނަކަ އޮފީހުގައި މަސައްކަތްކުރާ އިދިކޮޅު އެމްޑީޕީއަށް ނިސްބަތްވާ ތިން މުވައްޒަފަކު ސަސްޕެންޑުކޮށްފި އެވެ.
އިއްޔެގެ އިންތިހާބުގައި ޕީއެންސީ ބަލިކޮށް މިލަދޫ ޑަބްލިއުޑީސީގެ ގޮނޑި ކާމިޔާބުކުރީ އެމްޑީޕީގެ ކެންޑިޑޭޓު، އާމިނަތު އަޒުމާ އެވެ.
މި ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި މިލަދޫ ފެނަކައިގެ ބައެއް މުވައްޒަފުން ދެ ހަފުތާ (14 ދުވަސް) އަށް ސަސްޕެންޑުކުރީ އެ މީހުންނާ ގުޅޭ މައްސަލައެއް ބަލަމުންދާ ކަމަށް ބުނެ އެވެ. ސަސްޕެންޑުކުރި ކަމުގެ ލިޔުން ތައްޔާރުކޮށްފައިވަނީ މިއަދު އެވެ.
މިކަމާ ގުޅިގެން އެމްޑީޕީން ވަނީ ސަރުކާރު ކުންފުނީގެ އަމަލު ކުށްވެރިކޮށް މިއީ އިއްޔެގެ އިންތިހާބާ ގުޅުވާ ހިނގި ކަމެއް ކަމަށް ބުނެފަ އެވެ.
އެ ޕާޓީން މިރޭ ނެރުނު ބަޔާނެއްގައި އެ ޕާޓީއަށް ތާއީދުކުރާ މުވައްޒަފުން ސަސްޕެންޑު ކޮށްފައިވަނީ އެއްވެސް ސަބަބެއް ބަޔާން ކުރުމެއް ނެތި އެއްވެސް އަސާސެއްގެ މައްޗަށް ބިނާކޮށެއް ނޫން ކަމަށެވެ.
"ސަރުކާރުން ތާއީދު ނުކުރުމަކީ އެ މީހަކު އަދާކުރަމުންދާ ވަޒީފާއިން އެކަހެރިކޮށް ސަސްޕެންޑު ކުރުމަށް އޮތް ހުއްޖަތެއް ނޫން،" އިދިކޮޅު އެންމެ ބޮޑު ޕާޓީގެ ބަޔާނުގައި ބުނެފައިވެ އެވެ.
އަދި، އިންތިހާބުތަކުގައި ވާދަކުރުމާއި ވޯޓުލުމަކީ ގާނޫނުއަސާސީން ކޮންމެ ރައްޔިތަކަށްވެސް ކަށަވަރުކޮށްދޭ ހައްގެއް ކަމަށާއި އެ ހައްގުގެ ބޭނުންކުރާ މީހުންނާ ދެކޮޅަށް އެ މީހަކު ނިސްބަތްވާ ސިޔާސީ ފިކުރަށް ބަލައި ފިޔަވަޅު އެޅުމަކީ މި ސަރުކާރުގެ ވަރަށް ފިނޑި އަމަލެއް ކަމަށްވެސް އެ ޕާޓީން ބުނެފައިވެ އެވެ.
އޭގެއިތުރުން، އިއްޔެ އިންތިހާބު އެމްޑީޕީން ކާމިޔާބުކުރީ ސަރުކާރުން އެކި ގޮތްގޮތުން ނުފޫޒުފޯރުވަމުން ދަނިކޮށް ކަންވެސް އެމްޑީޕީން ފާހަގަކުރި އެވެ.
މިލަދޫ އަކީ އިއްޔެ އިންތިހާބު ބޭއްވި 11 ރަށުގެ ތެރެއިން އިދިކޮޅުން ކާމިޔާބުކުރި ދެވަނަ ރަށެވެ. އެހެން ރަށްތަކުގެ އިންތިހާބުތައް ކާމިޔާބުކުރީ ސަރުކާރުންވެ.
