ގޯލްޑަން ފުޓްސަލް ޗެލެންޖް 2025 ގެ ޒޯން ދޭއްގައި ދުވާފަރުން ކުޅުނު ދެ ވަނަ މެޗު ވެސް ކާމިޔާބުކޮށް ގަދަ 16 އާ ގާތައް ޖެހިލިއިރު، ށ. އަތޮޅު ޗެމްޕިއަން، މިލަންދޫ އަތުން އެ އަތޮޅު ރަނަރަޕް ކަނޑިތީމު މޮޅުވެ، ކުރިއަށް ދިއުމަށް އުންމީދެއް ހޯދައިފި އެވެ.
މި މުބާރާތުގެ ޒޯން ދޭއްގެ މެޗުތައް ރޭ ކުރިއަށްދިޔައިރު، ފުރަތަމަ މެޗުގައި ކަނޑިތީމުން މިލަންދޫ ބަލިކުރީ 5-1 ގެ ނަތީޖާއަކުންނެވެ. މިއީ މި ފަހަރުގެ ގޯލްޑަން ފުޓްސަލް ޗެލެންޖުގައި މި ދެ ޓީމު ބައްދަލުކުރި ތިން ވަނަ މެެޗެވެ. މީގެ ކުރިން ދެ މެޗުގައި މިލަންދޫ ވަނީ މޮޅުވެފަ އެެވެ. އެއީ، ށ، އަތޮޅު ގްރޫޕް ސްޓޭޖާއި އެ އަތޮޅު ފައިނަލުގަ އެވެ.
މި މެޗުގައި ކަނޑިތީމުގެ އަހުމަދު ޒަމީމް އަދި އިސްމާއިލް ނިހާން މިއިން ކޮންމެ ކުޅުންތެރިޔަކު ދެ ގޯލު ޖެހި އެވެ. އަނެއް ގޯލަކީ ކަނޑިތީމުގެ ހުސެއިން ނިހާލް ޖެހި ގޯލެވެ.
މި މެޗުގައި މިލަންދޫ އިން ޖެހި ހަމައެކަނި ގޯލު އެ ޓީމަށް ޖަހާދިނީ އަލީ އީނާސް އެވެ.
މީގެ އިތުރުން މި ޒޯނުގައި ދުވާފަރުން ނ. މިލަދޫގެ މައްޗަށް ކުރިހޯދީ ވެސް 5-1 ގެ ނަތީޖާ އަކުންނެވެ.
މި މެޗުގައި ދުވާފަރުގެ މުހައްމަދު އިސާމް (ޝަންޓޭ) އާއި ކެޕްޓަން، މުހައްމަދު ޖުމާން އަހުމަދު, މިއިން ކޮނެމް ކުޅުންތެރިޔަކު ދެ ގޯލު ޖެހިއިރު، ދުވާފަރުން ދެން ޖެހި ގޯލަކީ މިލަދޫގެ މޫސާ ހުމެއިދު އަތުން ބައިކޮޅަށް ވަން ގޯލެކެވެ.
މި މެޗުގައި މިލަދޫ އިން ޖެހި ހަމައެކަނި ގޯލު އެ ޓީމަށް ޖަހާދިނީ އަހުމަދު އިނާފް އަބްދުالله އެވެ.
މި ނަތީޖާއާ އެކު, ޒޯން ދޭއްގެ އެއް ވަނައިގައި އޮތް ރ. އިނގުރައިދޫ އާއި ދެވަނައިގައި އޮތް ދުވާފަރަށް ދެ މެޗުން ހަ ޕޮއިންޓް ވަނީ ލިބިފަ އެވެ. އިނގުރައިދޫ އަށް ކުރި ލިބެނީ ގޯލުގެ ތަފާތުންނެވެ. ތިންވަނައިގައި ކަނޑިތީމު އޮތީ ތިން މެޗުން ތިން ޕޮއިންޓް ހޯދައިގެންނެވެ. މިލަންދޫ އާއި މިލަދޫ އަށް ވަނީ ޕޮއިންޓެއް ލިބިފަ އެވެ.
ގޯލްޑަން ފުޓްސަލް ޗެލެންޖް (6 ފެބްރުއަރީ):
ބ. އޭދަފުށި - ކ. މާފުށި: ޒޯން ތިނެއް (20:00)
ކ. ކާށިދޫ - ކ. ކުރެންދޫ: ޒޯން ތިނެއް (20:00)
މ. މުލަކު - ފ. ދަރަނބޫދޫ: ޒޯން ފަހެއް (21:00)
މ. ދިއްގަރު - ދ. ކުޑަހުވަދޫ: ޒޯން ފަހެއް (21:00)
ވިލިމާލެ - މައްޗަންގޯޅި: ޒޯން އަށެއް (22:00)
މާފަންނު - ހުޅުމާލެ: ޒޯން އަށެއް (22:00)
ލ. އިސްދޫ - ލ. ގަން: ޒޯން ހައެއް (23:00)
ތ. ތިމަރަފުށި - ތ. ހިރިލަންދޫ: ޒޯން ހައެއް (23:00)
