ސިޔާސީ ޕާޓީތަކުގައި ތިބި މެންބަރުންގެ އަދަދަށް ނުބަލައި، ހަރަކާތްތެރި ޕާޓީތަކަށް އެކަނި އިލެކްޝަންސް ކޮމިޝަނުން ފައިސާ ދޫކުރަން ފެންނަ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
"އަދަދު" ގައި ފައްޔާޒް ލިޔުއްވި ކޮލަމެއްގައި ވިދާޅުވީ ޕާޓީތަކަށް ފައިސާ ދިނުން ހަރުދަނާ ކުރަން ޕާޓީތަކަށް ފައިސާ ދިނުމުގައި ގައުމީ އިންތިހާބުތަކުގައި ޕާޓީތަކަށް ގޮނޑި އާއި ވޯޓު ލިބޭ ނިސްބަތަށް ބެލުން މުހިންމު ކަމަށެވެ.
އިންތިހާބުތަކުގައި ރަނގަޅު ނަތީޖާ ހޯދާ ޕާޓީތަކަށް ފައިސާ ދިނުމުން، ފައިސާ ލިބޭނީ ހަރަކާތްތެރި އަދި މީހުން ބަލައިގަންނަ ޕާޓީތަކަށް އެކަނިކަން ފައްޔާޒް ފާހަގަކުރެއްވި އެވެ.
"ޕާޓީގެ މެންބަރުންގެ އަދަދު ކިތަންމެ މަދު ނަމަވެސް، އެ ޕާޓީއިން ހުށަހަޅާ ސިޔާސަތުތަކާއި، އެ ޕާޓީގެ މަސައްކަތް ރައްޔިތުން ބަލައިގަންނަ ނަމަ، އެ ޕާޓީއަށް ގައުމީ އިންތިހާބުތަކުގައި ކާމިޔާބީ ލިބޭނެ. އެފަދަ ޕާޓީތައް މެދުވެރިކޮށް، ދިވެހިރާއްޖޭގެ ޑިމޮކްރެސީ ކުރިއެރުވުމަށްޓަކައި ދައުލަތުގެ ބަޖެޓުން ހޭދަކުރުން އެންމެ ރަނގަޅު،" އޭނާ ވިދާޅުވި އެވެ.
ސިޔާސީ ޕާޓީތަކަށް ދައުލަތުގެ ބަޖެޓުން ފައިސާ ދޫކުރުމަށް ތާއީދު ކުރައްވައި ފައްޔާޒް ވިދާޅުވީ އޭގެ ބޭނުމަކީ ރައްޔިތުންގެ ހައްގުތަކާއި ބާރުވެރިކަން ހިފެހެއްޓޭކަން ކަށަވަރުކުރުން ކަމަށެވެ.
"ސިޔާސީ ޕާޓީތަކަށް ފައިސާ ދިންނަމަވެސް އެ ފައިސާ ދޭއިރު ބަލަންވީ ޕާޓީގައި މެންބަރުން ތިބި އަދަދަކަށް ނޫން. އަމުދުން ސިޔާސީ ޕާޓީއެއް ރަޖިސްޓްރީކުރުމުގައި ވެސް އެ ޕާޓީއެއްގައި ތިބޭ މެންބަރުންގެ އަދަދަށް ބަލާނޭ ކަމެއް ނެތް. ޕާޓީއަކަށް ވުމުގެ ޝަރުތަކަށް ވާންވާނީ ގައުމަށް މޮޅުގޮތް ހޯދައިދޭ ސިޔާސީ ފިކުރެއް އޮތުން،" އޭނާ ވިދާޅުވި އެވެ.
އެކަމަކު ފައްޔާޒް ވިދާޅުވީ ޕާޓީތަކަށް ދައުލަތުގެ ބަޖެޓުން ފައިސާ ދޫކުރުމަކީ އެންމެ ރަނގަޅު ގޮތް ނޫން ކަމަށް ގިނަ ބަޔަކު ދެކެނީ އެ ފައިސާ ބޭނުން ކުރާ ގޮތް ރައްޔިތުންނަށް ސާފު ނުކޮށްދެވި، ސިޔާސީ ޕާޓީތަކުގެ ސަބަބުން މުޖުތަމައުއަށް އެކަށީގެންވާ ހެޔޮ ބަދަލުތައް އަންނާނެ ކަމަށް ރައްޔިތުން ގަބޫލު ނުކުރާތީ ކަމަށެވެ.
ގިނަ ސިޔާސީ ޕާޓީ އޮތުމުގެ އެންމެ ބޮޑު ފައިދާއަކީ ސަރުކާރު ޖަވާބުދާރީކުރެވުމާއި، ޑިކްޓޭޓާޝިޕަކަށް ޖާގަ ނުދިނުން ކަމަށާއި ފެންނަންހުރި ކުދިކުދި ގެއްލުންތަކާ އަޅާބަލާއިރު އެއީ ލިބޭ މާބޮޑު ފައިދާއެއް ކަމަށް އޭނާ ވިދާޅުވި އެވެ.
