ރާއްޖޭގައި ބާއްވާ ކުޅިވަރުގެ އެންމެ ބޮޑު މުބާރާތް, ގޯލްޑަން ފުޓްސަލް ޗެލެންޖް 2025 ގެ ޒޯން ހަތެއްގެ މެޗުތައް ގއ. ޗެމްޕިއަން ދެއްވަދޫ އިން ބޮޑު މޮޅަކުން ފެށިއިރު, ގދ. ޗެމްޕިއަން ވާދޫ އިން ޒޯން ބުރުގައި ކުޅުނު ފުރަތަމަ މެޗުގައި ފުވައްމުލަކުގެ ދަނޑިމަގާ އެއްވަރުވެއްޖެ އެވެ.
ހުޅުމާލެ, ރެހެންދި ފުޓްސަލް ދަނޑުގައި ދެއްވަދޫ އިން ކުޅުނު މެޗުގައި ގއ. ގެ ރަނަރަޕް ވިލިނގިލި ބަލިކުރީ 4-0 ގެ ނަތީޖާ އަކުންނެވެ. މި ދެ ޓީމު، ގއ. ފައިނަލުގައި ކުޅުނު މެޗު ނިމުނީ 9-1 އިންނެވެ.
މި މެޗުގެ ހަތަރުވަނަ މިނެޓުގައި ދެއްވަދޫ އިން ވަނީ ގޯލު ޖަހައި ލީޑު ނަގާފަ އެވެ. މި ގޯލު އެ ޓީމަށް ޖަހާދިނީ ހުޒައިފަތު ރަޝީދު (ހުޒޭ) އެވެ. އަދި މެޗުގެ 10 ވަނަ މިނެޓުގައި އަހުމަދު ރާހީލް ރަޝީދު (ރާއްކޮ) ވަނީ އެ ޓީމުގެ ލީޑު ފުޅާކޮށްދީފަ އެވެ. ދެއްވަދޫ އިން ޖެހި ފަހު ދެ ގޯލު އެ ޓީމަށް ޖަހާދިނީ މުހައްމަދު އިމްރާން (އިއްމި) އެވެ.
މީގެ އިތުރުން މި ޒޯނުގައި ގދ. ޗެމްޕިއަން ވާދޫ އަދި ފުވައްމުލަކުގެ ދަނޑިމަގު ބައްދަލުކުރި މެޗު ނިމުނީ 0-0 ގެ ނަތީޖާ އަކުންނެވެ.
ގިނަ ކާޑުތަކެއް ފެނިގެންދިޔަ މި މެޗުގައި ވާދޫގެ އިބްރާހީމް ޝައުފް މުހައްމަދު އަށް ވަނީ ރަތް ކާޑެއް ވެސް ދައްކައިފަ އެވެ.
މިއީ މި އަހަރުގެ މުބާރާތުގައި ދަނޑިމަގު ކުޅުނު ފުރަތަމަ މެޗެވެ. ދަނޑިމަގަށް ޒޯން ބުރުގެ ޖާގަ ލިބުނީ ފުވައްމުލަކު ސިޓީ އިން އިތުރު ޓީމެއް ބައިވެރިނުވާތީ އެވެ.
ގޯލްޑަން ފުޓްސަލް ޗެލެންޖް (ފެބްރުއަރީ 2)
ދ. ކުޑަހުވަދޫ - މ. މުލަކު: ޒޯން 5 (20:00)
ފ. ދަރަނބޫދޫ - މ. ދިއްގަރު: ޒޯން 5 (20:00)
ނ. މިލަދޫ - ށ. މިލަންދޫ: ޒޯން 2 (21:00)
ރ. އިނގުރައިދޫ - ށ. ކަނޑިތީމު: ޒޯން 2 (21:00)
