މިއުނިކް (ފެބްރުއަރީ 2) - ޖަރުމަނު ލީގުގައި ރޭ ބަޔާން މިއުނިކުން ފަހު ވަގުތު ޕްރެޝަރަށް ވެއްޓުނު މެޗުން ހޯލްސްޓަން ކިއެލް އަތުން 4-3 އިން މޮޅުވެއްޖެ އެވެ.
މި މޮޅާ އެކު، ޖަރުމަނު ފުޓްބޯޅައިގެ އެންމެ ކާމިޔާބު ޓީމު ކަމަށްވާ ބަޔާން އޮތީ ލީގުގެ އެއް ވަނައިގައި 20 މެޗުން 51 ޕޮއިންޓާ އެކު އެވެ. ދެ ވަނައިގައި އޮތް އެންމެ ފަހުގެ ޗެމްޕިއަން، ބަޔާ ލެވަކޫސަނަށް ވަނީ 19 މެޗުން 42 ޕޮއިންޓް ލިބިފަ އެވެ.
އަމިއްލަ ދަނޑުގައި ކުޅުނު ބަޔާނުން ވަނީ މި މެޗުގެ ފުރަތަމަ 54 މިނިޓް ތެރޭގައި ހަތަރު ގޯލު ޖަހައިފަ އެެވެ. އެ ޓީމުން ލީޑުނެގީ، 19 ވަނަ މިިނިޓްގައި ޖަމާލް މުސިއާލާ ޖެހި ގޯލުންނެވެ. އަދި ފުރަތަމަ ހާފުގެ އިތުރު ވަގުތުގައި ހެރީ ކޭން ވަނީ ބަޔާންގެ ލީޑުުފުޅާކޮށްދިނުމުގެ އިތުރުުުން، ދެ ވަނަ ހާފު ފެށުނުތަނާ ބަޔާންގެ ތިން ވަނަ ގޯލު ޖަހައިދީފަ އެވެ. މި ލަނޑުތަކާ އެކު، ކޭން ވަނީ މި ސީޒަނުގައި 27 މެޗުން 26 ގޯލު ޖަހައިފަ އެވެ.
މެޗުގެ 54 ވަނަ މިނިޓްގައި ބަޔާންގެ ހަތަރު ވަަނަ ގޯލު ޖެހީ ސާޖް ގްނަބްރީ އެވެ.
ކިއެލް އިން މެޗުގެ ތެރެއަށް އައުމަށް ކުޑަ އުންމީދެއް ހޯދީ، މެޗުގެ 64 ވަނަ މިނިޓްގައި ފިން ޕޯރާތު ޖެހި ލަނޑުންނެވެ. އޭގެ ފަހުން، އިތުރު ވަގުތުގެ ފުރަތަމަ ތިން މިނިޓްތެރޭ ސްޓީވެން ސްކީބާސްޒީ ގާތްގާތުގައި ދެ ގޯލު ޖަހައި، ބަޔާންގެ ލީޑު އެންމެ ގޯލަކަށް ހެދި އެވެ. އެކަމަކު، ފަހު ގަޑީގައި ރަނގަޅަށް ޑިފެންސްކޮށް ބަޔާނުން ކޮޅު ހިފެހެއްޓި އެވެ.
ލެވަކޫސަނުން އާދިއްތަ ދުވަހުގެރޭ ކުޅޭ މެޗުގައި ހޮފެންހައިމްއާ ބައްދަލުކުރާނެ އެވެ.
