ގޯލްޑަން ފުޓްސަލް ޗެލެންޖް 2025 ގެ ހއ. އަތޮޅު ފައިނަލަށް އެންމެ ފަހުގެ ޗެމްޕިއަން، ހއ. ދިއްދޫ އާއި ވަށަފަރު ދަތުރު ކޮށްފި އެވެ.
މި މުބާރާތުގެ ހއ. އަތޮޅުގެ ސެމީ ފައިނަލް މެޗުތައް ރޭ ކުރިއަށްދިޔައިރު, ސެމީ ފައިނަލް ފުރަތަމަ މެޗުގައި ދިއްދޫ އިން ނުކުތީ މާރަންދޫއާ ދެކޮޅަށެވެ. މި މެޗު ދިއްދޫ އިން ކާމިޔާބުކުރީ 3-1 ގެ ނަތީޖާ އަކުންނެވެ.
މި މެޗުގެ ހަވަނަ މިނިޓުގައި ދިއްދޫގެ ހައިޝަމް ރަޝީދު (ހައި) ވަނީ ގޯލު ޖަހާ އެ ޓީމަށް ލީޑު ނަގާދީފަ އެވެ. އެކަމަކު، އޭގެ ދެ މިނެޓު ފަހުން މާރަންދޫގެ ސަމްހާން އަބްދުލް ރަހުމާން ވަނީ ގޯލު ޖަހައި ނަތީޖާ ހަމަހަމަ ކޮށްފަ އެވެ.
މެޗުގެ ދެ ވަނަ ހާފު ފަށައިގެން ހަތަރު ވަނަ މިނިޓުގައި ދިއްދޫ އަށް އަލުން ލީޑު ނަގައިދިނީ ހުސެއިން ޝިފާހު (ޝިފަޓީ) އެވެ. އަދި ދެ ވަނަ ހާފުގެ 11 ވަނަ މިނެޓުގައި ޝިފާހު ވަނީ އިތުުރު ގޯލެއް ޖަހާ އެ ޓީމު މެޗުން މޮޅުކޮށްދީފަ އެވެ.
ވަށަފަރުން ފައިނަލުގެ ޖާގަ ކަށަވަރުކުރީ ރޭ ކުޅުން ދެ ވަނަ ސެމީގައި ކެލާގެ މައްޗަށް 4-3 ގެ ނަތީޖާ އަކުން ކުރިހޯދައިގެންނެވެ.
މި މެޗުގެ ތިން ވަނަ މިނިޓުގައި ވަށަފަރަށް ލީޑު ނަގައިދިނީ އިބްރާހީމް އަތީގު ހަސަން (އިއްބެ) ޖެހި ގޯލުންނެވެ. އަދި މެޗުގެ 11 ވަނަ މިނެޓުގައި ވަށަފަރުގެ އިބްރާހީމް ޝަނޫން (ޗަންނަ) ވަނީ ގޯލު ޖަހާ އެ ޓީމުގެ ލީޑު ފުޅާކޮށްފަ އެވެ.
ފުރަތަމަ ހާފު ނިމުމުގެ ކުރިން ވަށަފަރުގެ އަހުމަދު މާއިޝް ރަޝީދު (މާއި) ވަނީ އެ ޓީމުގެ ތިން ވަނަ ގޯލު ޖަހައިފަ އެވެ. އެކަމަކު އޭގެ ސިކުންތުކޮޅެއްގެ ތެރޭގައި ކެލާގެ މަމްދޫހް އަބްދުލް ގާދިރު ވަނީ ގޯލު ޖަހާ ފަރަގު ކުޑަކޮށްފަ އެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ ދެ ވަނަ ހާފު ފަށައިގެން ހަތަރު ވަނަ މިނިޓުގައި މަމްދޫހް ވަނީ އިތުރު ގޯލެއް ޖަހައިފަ އެވެ. އަދި މެޗުގެ 30 ވަނަ މިނިޓުގައި ކެލާގެ އަހުމަދު ޝަފަގު ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. މެޗުން ވަށަފަރު މޮޅުކޮށްދިން ގޯލު މެޗުގެ ފަހު މިނެޓުގައި ޖަހައިދިނީ އިއްބެ އެވެ.
މި ދެ ޓީމު ބައްދަލުކުރާ ފައިނަލް މެޗު ކުޅޭނީ އަންނަ ހޮނިހިރު ދުވަހުގެ ރެޔެވެ.
ގޯލްޑަން ފުޓްސަލް ޗެލެންޖް (28 ޖެނުއަރީ)
ކ. މާފުށި - ކ. ގުރައިދޫ: 20:00 (ސެމީ ފައިނަލް)
ކ. ކާށިދޫ - ކ. ގާފަރު: 20:00 (ސެމީ ފައިނަލް)
ގދ. ގައްދޫ - ގދ. ވާދޫ: 21:30 (ގދ. އަތޮޅު ފައިނަލް)
ރ. ދުވާފަރު - ރ. އިނގުރައިދޫ: 21:30 (ރ. އަތޮޅު ފައިނަލް)
ނ. ހޮޅުދޫ - ނ. މިލަދޫ: 22:30 (ނ. އަތޮޅު ފައިނަލް)
ސ. ފޭދޫ - ސ. ހިތަދޫ: 22:30 (ސ. އަތޮޅު ފައިނަލް)
