އައްޑޫ ސިޓީގެ އެކި ސަރަހައްދުތަކުން ކަރަންޓު ކެނޑެމުންދާ މައްސަލަ ހައްލު ނުވެ އޮތީ އެ ސިޓީއަށް ކަރަންޓުގެ ހިދުމަތް ދެމުންދާ ފެނަކަ ކޯޕަރޭޝަންގެ އިސްވެރިންގެ ފަރުވާ ކުޑަކަމުން ކަމަށް ބުނެ އައްޑޫ ހިތަދޫ މެދު ދާއިރާގެ މަޖިލިސް މެންބަރު، އަހުމަދު އަޒާން މަރުޒޫގު މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް އެ މައްސަލަ ހުށަހަޅައިފި އެވެ.
ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ އަށް އެޑްރެސް ކުރައްވައި އަޒާން މިއަދު ފޮނުވި ސިޓީގައި ވިދާޅުވެފައި ވަނީ އައްޑޫއަށް ކުރިމަތިވެފައިވާ ކަރަންޓުގެ މައްސަލައަށް އެއް އަހަރު ވެގެންދިޔައިރު، އަދިވެސް ބައެއް އިންޖީނުތަކުގެ ސްޕެއާ ނުލިބޭ ކަމަށެވެ.
"އައްޑޫ ސިޓީގެ ރައްޔިތުންނަށް ދިމާވެފައިވާ ކަރަންޓުގެ މައްސަލައަށް ހައްލު ނުލިބި ދިގުލައިގެން ދިޔުމުގައި ފެނަކަ ކޯޕަރޭޝަންގެ އިސްވެރިންގެ އިހުމާލާއި ފަރުވާ ކުޑަކަން އޮތްކަމުގައި ދެކެމެވެ،" އަޒާންގެ ސިޓީގައި ލިޔުއްވާފައިވެ އެެވެ.
އަޒާން އެދިފައި ވަނީ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ފެނަކަ އިސްވެރިންގެ ގޮތުގައި ތިބި ހަ ބޭފުޅަކު ހާޒިރު ކުރުމަށެވެ. އެއީ:
- މުހައްމަދު ނަޖާހު - މެނޭޖިން ޑިރެކްޓަރު
- އަބްދުލް ވާހިދު - ކުރީގެ ޕްރޮކިއުމެންޓް ހެޑް
- މަރިޔަމް ޝަހުލާ - ޕްރޮކިއުމެންޓް ހެޑް
- އަބްދުﷲ ވަހީދު - ޗީފް ފައިނޭންޝިއަލް އޮފިސަރު
- މުހައްމަދު މަސްއޫދު - ކުރީގެ ޗީފް ފައިނޭންޝިއަލް އޮފިސަރު
- އަބްދުﷲ ނާޝިދު - ޗީފް ޓެކްނިކަލް އޮފިސަރު
މަޖިލީހުގެ ކޮމިޓީއަށް އެ ބޭފުޅުން ހާޒިރުވާއިރު، އައްޑޫގެ ކަރަންޓު މައްސަލައަށް ހައްލު ހޯދުމަށް ފެނަކައިން އެކުލަވާލައިފައިވާ ޓައިމްލައިނެއް ނުވަތް ޕްލޭނެއް އޮތް ނަމަ އެ މައުލޫމާތު ވެސް ގެނައުމަށް އަޒާންގެ ސިޓީގައި އެދިފައިވެ އެވެ.
އައްޑޫގެ ކަރަންޓު މައްސަލައާ ގުޅިގެން އެ ސިޓީގެ ފެނަކަ އޮފީހުގައި މަސައްކަތް ކުރާ ބައެއް މުވައްޒަފުންނާ ބައްދަލުކޮށް ހޯދި މައުލޫމާތުން، އައްޑޫ ފެނަކައިން ހިންގާ އިންޖީނުގޭގައި ހުރި 17 އިންޖީނުގެ ތެރެއިން މިވަގުތު މަސައްކަތް ކުރަނީ އެންމެ 13 އިންޖީނުކަން އެނގިފައިވާ ކަމަށް އަޒާންގެ ސިޓީގައި ލިޔުއްވާފައިވެ އެވެ.
ހަތަރު އިންޖީނަކަށް ބޮޑެތި މައްސަލަ ދިމާވެފައިވާއިރު، އޭގެ ތެރެއިން ތިން އިންޖީނަކީ މަރާމާތު ނުކުރެވޭ ހާލަތުގައި ހުރި އިންޖީނުތަކެއް ކަމަށް ވެސް ފެނަކައިގެ މުވައްޒަފުންނާ ހަވާލާދީ އަޒާންގެ ސިޓީގައި ލިޔުއްވާފައިވެ އެވެ.
"އިންޖީނުތަކަށް މައްސަލަ ދިމާވާ މައިގަނޑު ސަބަބެއްގެ ގޮތުގައި މުވައްޒަފުން ފާހަގަކުރައްވަނީ ސްޕެއާ ހޯދުމަށް ރިކުއެސްޓް ކުރާތާ ގިނަ ދުވަސްތަކެއް ފާއިތުވެގެން ދާއިރު ވެސް ސްޕެއާތައް ނުލިބި އިންޖީނުތަކުގެ މެއިންޓެނަންސް އަދި މަރާމާތުގެ މަސައްކަތް ނުކުރެވުމެވެ،" އަޒާންގެ ސިޓީގައި ލިޔުއްވާފައިވެ އެވެ.
އަޒާން ވިދާޅުވެފައި މި މައްސަލައިގައި އައްޑޫގެ ބައެއް އެހެން ދާއިރާތަކުގެ މަޖިލިސް މެންބަރުންނާއެކު ފެނަކައިގެ މެނޭޖިން ޑިރެކްޓަރު، މުހައްމަދު ނަޖާހު ވެސް ހިމެނޭހެން އިސްވެރިންނާ މި މަހު 14، ގައި ބައްދަލުކުރުމުން އެ މައްސަލަ ހައްލު ކުރުމަށް ބޭނުންވާ ސްޕެއާ ހަތް ދުވަސް ތެރޭގައި އައްޑޫއަށް ފޮނުވާނެ ކަމުގެ ޔަގީންކަން ދިން ކަމަށެވެ.
ނަމަވެސް އެ ބައްދަލުވުމަށްފަހު އެތައް ދުވަހެއް ފާއިތުވެގެން ދިޔައިރު ވެސް އައްޑޫއަށް ބޭނުންވާ ސްޕެއާ އެކޮޅަށް ފޮނުވާފައި ނުވާކަން އަޒާންގެ ސިޓީގައި ފާހަގަ ކުރައްވާފައިވެ އެވެ.
