އިންޓަނެޓާއި މީޑިއާތައް ރެގިއުލޭޓުކުރަން ކަމަށް ބުނެ ސަރުކާރުން ރައްޔިތުންގެ މަޖިލީހަށް ބިލެއް ހުށަހެޅުމަށް ތައްޔާރުވަމުންދާ ކަމަށް ވެރިކަންކުރާ ޕީއެންސީއަށް ނިސްބަތްވާ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.
"ސަން މީޑިއާ" އަށް ދެއްވި އިންޓަވިއުއެއްގައި ވާހަކަދައްކަވަމުން ނާޒިމް ވިދާޅުވީ، މީޑިއާތަކާއި އިންޓަނެޓުގެ ޕްލެޓްފޯމުތައް ރެގިއުލޭޓުކުރަން ހުށަހަޅާ ބިލުގެ މަސައްކަތް މިހާރު އޮތީ ވަރަށް ފަހުގެ މަރުހަލާއެއްގައި ކަމަށެވެ.
މަސައްކަތް ކުރަމުންދަނީ މީޑިއާތަކަށް ވެސް އެއްބަސްވެވޭ ފަދަ ބިލެއް ގެނައުމަށް ކަމަށް ވެސް ނާޒިމް ވިދާޅުވި އެވެ.
"މީޑިއާ ވެސް އެބަޖެހޭ ޒިންމާދާރުވާން. މީޑިއާއިން ބުނަނީ މީޑިއާއިން އަމިއްލައަށް ރެގިއުލޭޓް ކުރެވޭނެއޭ. އެކަމު އެކަން ވެފައެއް ނެތް. ވާތަނެއް ފެންނާކަށްވެސް ނެތް. ހަމަ އެ މީހަކު ދައްކަން ބޭނުންވާ އެއްޗެއް ހަމަ ޓީވީތަކުންވެސް ދައްކަނީ. ލިޔަން ބޭނުންވާ އެއްޗެއް ލިޔަންވެސް ލިޔަނީ،" ނާޒިމް ވިދާޅުވި އެވެ.
އޭނާ ފާހަގަ ކުރެއްވީ މިހާރު އޮތް މީޑިއާ ކައުންސިލާއި ބްރޯޑްކާސްޓިން ކޮމިޝަން ވަކިން މަސައްކަތް ކުރާތީ ދައުލަތުން ބޮޑު ހަރަދެއް ވެސް ހިނގާ ކަމަށެވެ. އަދި، އެ ދެ މުއައްސަސާއިން ވެސް ކުރަނީ އެއް މަސައްކަތެއްކަން އޭނާ ފާހަގަކުރެއްވި އެވެ.
ރެގިއުލޭޓަރީ ބިލުގެ މަސައްކަތް ކުރައްވާ ކަމަށް ވިދާޅުވި ނާޒިމްގެ ވިސްނުން ހުރީ މެލޭޝިއާ ފަދައިން މި ދެ މުއައްސަސާ އެއްކޮށްލާ މަލްޓި މީޑިއާ ކައުންސިލެއް އުފެއްދުމާ ދިމާލަށެވެ. އަދި، މި ބިލުގެ ދަށުން އެ ކޮމިޝަނުން އިންޓަނެޓުގެ ޕްލެޓްފޯމުތައް ވެސް ރެގިއުލޭޓު ކުރެވިގެންދާނެ ކަމަށް ވެސް އޭނާ ފާހަގަކުރެއްވި އެވެ.
ނާޒިމްގެ އިންޓަވިއުގައި މީޑިއާތަކަށް ވަނީ ވަރަށް ބޮޑަށް ފާޑުވިދާޅުވެފަ އެވެ. އެގޮތުން މީޑިއާތަކަށް އަމިއްލައަށް ރެގިއުލޭޓު ނުކުރެވޭ ކަމަށާއި ޒިންމާދާރު ނޫސްވެރިކަމެއް ރާއްޖެއިން ނުފެންނަ ކަމަށް ވެސް އޭނާ ވިދާޅުވި އެވެ.
"ވަރަށް ބޮޑަށް ޒާތީވެގެން ގޮސް ވިޔާނުދާ ކޮންޓެންޓާ އެއްޗެހި ޓީވީތަކުން ދައްކާތަން އެބަފެނޭ ދެއްތޯ. މައިންބަފައިންނާ ދަރިންނާ އެއްކޮށް ތިބެގެން ނުބެލޭ ވަރުގެ އެއްޗެހިވެސް އެބަ ދައްކާ. އެއްވެސް އަސްލެއް ހަގީގަތެއް ނެތް ކަންކަމުގަ ބުނިބުންޏަށްގޮސް އެބަދައްކާ،" ނާޒިމް ވިދާޅުވި އެވެ.
މި ބިލާއެކު ސޯޝަލް މީޑިއާ ޕްލެޓްފޯމުތައް ކަމަށްވާ ޓުވިޓާ (އެކްސް)، އިންސްޓަގްރާމް، ޓެލެގްރާމް އަދި ޓިކްޓޮކްވެސް ރާއްޖޭގައި ރެގިއުލޭޓް ކުރެވިގެންދާނެ ކަން ދޭހަވާ ފަދަ މޭރުމަކުން ނާޒިމް ވަނީ ވާހަކަދައްކަވާފަ އެވެ.
"ޓުވިޓަރާއި، އިންސްޓަގްރާމާއި، ޓިކްޓޮކާއި މިހެން ގޮސް މި އެއްޗެހިތައްވެސް ރެގިއުލޭޓުކުރެވެންޖެހޭ. މިހާރު ޓިކްޓޮކް އެމެރިކާގަ ބަންދުކުރާ ހިސާބަށްވެސް އެދަނީ ހަމަ ސަބަބެއް އޮވެގެން ދެއްތޯ،" ނާޒިމް ވިދާޅުވި އެވެ.
އެކުލަވާލުމުގެ މަސައްކަތް ނިމުމަކާ ހަމައަށް ގޮސްފައިވާ ބިލުގައި އިންޓަނެޓުގެ މި ވަސީލަތްތަކާއި މީޑިއާތައް އެއް ފުރާޅެއްގެ ދަށުން ރެގިއުލޭޓްކުރެވޭނެ ފްރޭމްވޯކެއް ހުށަހެޅޭނެ ކަމަށް މީގެ ކުރިން ވެސް މީޑިއާތަކަށާއި ނޫސްވެރިންނަށް ފާޑުވިދާޅުވެފައިވާ ނާޒިމް ވިދާޅުވި އެވެ.
އަންނަ މަހު ފެށޭ މަޖިލީހުގެ މި އަހަރުގެ ފުރަތަމަ ދައުރު ފެށުމާއެކު މި ބިލު މީޑިއާތަކަށް ހިއްސާކޮށް، ނޫސްވެރިން ވެސް އެއްބަސްވާ ގޮތެއް ހޯދުމަށް މަސައްކަތް ކުރެވޭނެ ކަމަށް ނާޒިމް ވިދާޅުވި އެވެ. ނަމަވެސް، ސަރުކާރަށް ބާރުދީ މީޑިއާތައް ކޮންޓްރޯލް ކުރުމާ ދިވެހި ނޫސްވެރިން ވަނީ އެތައް ފަހަރެއްގެ މަތިން ދެކޮޅު ހަދާފަ އެވެ.
