އިއްޔެ ފެށި 59 ވަނަ ގައުމީ ކްރިކެޓް މުބާރާތުގައި، އެމްއެސް ހެލްޕިން ހޭންޑް އެކަޑަމީން ފުރަތަމަ މޮޅު ހޯދައިފި އެވެ.
ކްރިކެޓް ބޯޑް އޮފް މޯލްޑިވްސް (ސީބީއެމް) އިން މި އަަހަރު ބާއްވާ ފުރަތަމަ މުބާރާތުގައި ޖުމްލަ ހަތަރު ޓީމެއް ވާދަކުރެ އެވެ. އެއީ، އެމްއެސް ހެލްޕިން ހޭންޑް އެކަޑަމީގެ އިތުރުން، މާލެ ސްޕޯޓްސް، މިލާން ކްރިކެޓް އެކަޑަމީ އަދި ސީބީއެލް ސްޕޯޓްސް އެވެ.
ކުޅިވަރު އެކުވެނި ކްރިކެޓް ދަނޑުގައި އިއްޔެ ފެށި މުބާރާތުގެ ފުރަތަމަ މެޗު އެމްއެސް ހެލްޕިން ހޭންޑް އެކަޑަމީން ކާމިޔާބުކުރީ ހަތް ވިކެޓުންނެވެ.
ޓޮސް ދިމާވުމުން މާލޭ ސްޕޯޓްސް އިން ނިންމީ ކުޅެން އެރުމަށެވެ. އެ ގޮތުން، އެ ޓީމުން ކުޅެން އަރައި، 50 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދިފައިވަނީ 191 ލަނޑެވެ. އެންމެ ރަގަޅަށް ކުޅުނީ 39 ލަނޑުހެދި މުހަންމަދު ރިސްވާން އާއި 23 ލަނޑުހެދި މުއާވިއަތު ޢަބްދުލްޤަނީ އެވެ. މި އިނިންގްސްގައި އެމްއެސްޓީމުން ލަހިރު ވަނީ 10 އޯވަރުގެތެރޭގައި 19 ލަނޑަށް ދެ ވިކެޓް ނަގައިފަ އެވެ.
ޖަވާބުގައި އެމްއެސް ކުޅެންއަރައި ތިން ކުޅުންތެރިން ނުބައިވެގެން 194 ލަނޑު ހަދައި މެޗުން މޮޅުވި އެވެ. އެ ޓީމުގެ، އަށާޔާޕާ ނުބައިނުވެ 102 ލަނޑު ހެދިއިރު، ސަވިންދަ ވަނީ 31 ލަނޑު ހަދައިފަ އެވެ. މި އިނިންސްގައި، ރަސްއާމް، ފައިސަލް އަދި އަދުނާން ވަނީ ކޮންމެ އުކުންތެރިއެއް އެއް ވިކެޓް ނަގައިފަ އެވެ.
މިމެޗްގެ އެންމެ މޮޅު ކުޅުންތެރިއަކަށް ހޮވުނީ އެމްއެސްގެ އަށާޔާޕާ އެވެ.
މުބާރާތުގައި މިއަދު ކުޅޭ މެޗުގައި މިލާން ބައްދަލުކުރާނީ ސީބީއެލްއާ އެވެ.
ކޮންމެ ހަފްތާ ބަންދެއްގައި ކުޅޭ މި މުބާރާތުގައި، ލީގު ބުރެއް ކުރިއަށްދިއުމަށް ފަހު، ސެމީ ފައިނަލެއް ކުޅޭނެ އެވެ. އެ ގޮތުން، ސެމީ ފައިނަލްގެ އެއް މެޗުގައި ލީގު ބުރުގެ އެއް ވަނަ ކުޅޭނީ ހަަތަރު ވަނައާ އެވެ. އަދި އަނެއް ސެމީ ފައިނަލުގައި ލީގު ބުރުގެ ދެ ވަނަ އާއި ތިން ވަނަ ބައްދަލުކުރާނެ އެވެ. ދެ ސެމީން މޮޅުވާ ޓީމެއްގެ މެދުގައި ފައިނަލް އޮންނާނީ އަންނަ މަހުގެ 21 ވަނަ ދުވަހު އެވެ.
