ރަސްމީ ދުވަސްތަކުގެ އިތުރުން ހޮނިހިރު ދުވަހު ވެސް ޕާސްޕޯޓު ދޫކުރުމުގެ ހިދުމަތް ދިނުމަށް އިމިގްރޭޝަން އިން ނިންމައިފި އެވެ.
މީޑިއާ ޓީމު މެދުވެރިކޮށް ނޫސްތަކަށް ފޮނުއްވި މެސެޖެއްގައި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު ވިދާޅުވީ، މި ނިންމުމަށް އަމަލުކުރަން ފަށާނީ މާދަމާއިން ފެށިގެން ކަމަށެވެ.
އެގޮތަށް ނިންމީ ރައީސް ޑރ. މުހައްމަދު މުއިއްޒުގެ އިރުޝާދާ އެއްގޮތަށް ޕާސްޕޯޓު ހެދުމާއި ދޫކުރުމުގެ ހިދުމަތްދޭ ވަގުތު އިތުރުކޮށް، ރައްޔިތުންނާ ގާތުން އަވަސް އަދި ލުއިފަސޭހަ ހިދުމަތެއް ފޯރުކޮށްދިނުމަށް ކަމަށް ވެސް ޝައްމާން ވިދާޅުވި އެވެ.
"މީގެއިތުރުން، މެޑިކަލް އެމާޖެންސީގައި ރާއްޖެއިން ބޭރަށް ދާ ފަރާތްތަކަށް ކުރިއެކޭ ވެސް އެއްގޮތަށް 24 ގަޑިއިރު ހިދުމަތް ލިބިލައްވާނެ،" ޝައްމާނުގެ މެސެޖުގައި ވިދާޅުވި އެވެ.
މާދަމާއިން ފެށިގެން ހޮނިހިރު ދުވަސްތަކުގައި ޕާސްޕޯޓު ދޫކުރުމުގެ ހިދުމަތް ދޭނީ މާލޭގައި ހުންނަ އިމިގްރޭޝަންގެ އޮފީހާއި ހުޅުމާލެ ދެ ފިޔަވަހީގައި ހުންނަ އެ ހިދުމަތުގެ ދެ އޮފީހުންނެވެ.
އިމިގްރޭޝަނުން އާންމުކުރި މައުލޫމާތުގައިވާ ގޮތުން ހޮނިހިރު ދުވަސްތަކުގައި ޕާސްޕޯޓު ދޫކުރުމަށް ނަމްބަރު ދޫކުރާނީ ހެދުނު 9:00 އިން މެންދުރު 12:00 އާ ހަމައަށެވެ.
