ގޯލްޑަން ފުޓްސަލް ޗެލެންޖް 2025 ގެ ގއ. އަތޮޅު ބުރުގެ ފައިނަލުން ދެއްވަދޫ އާއި ވިލިނގިލި ޖާގަ ހޯދައިފި އެވެ.
މިއީ މި ދެ ޓީމު މި އަތޮޅުގެ ފައިނަލުން ޖާގަ ހޯދި ފުރަތަމަ ފަހަރެވެ.
ގއ. އަތޮޅުގެ ސެމީ ފައިނަލުގެ ފުރަތަމަ މެޗުގައި ވިލިނގިލިން ނުކުތީ ދާންދޫއާ ދެކޮޅަށެވެ. މި މެޗު ވިލިނގިލިން ކާމިޔާބުކުރީ 3-0 ގެ ނަތީޖާއަކުންނެވެ.
މެޗުގެ ލީޑު ވިލިނގިލިން ނެގީ 19 ވަނަ މިނެޓުގަ އެވެ. މި ގޯލު އެ ޓީމަށް ޖަހާދިނީ މުހައްމަދު މުސާވިރު ސައީދު އެވެ. އަދި ދެ ވަނަ ހާފުގެ ފަހު ވަގުތު ކޮޅު ވިލިނގިލީގެ މުސާވިރު އާއި ޝަޒްމީން މުހައްމަދު ވަނީ ކައިރިކައިރީ ގޯލު ޖަހާފަ އެވެ.
މި އަތޮޅުގެ ފައިނަލުން ދެއްވަދޫ ޖާގަ ހޯދީ ސެމީގައި ނިލަންދޫގެ މައްޗަށް 5-1 ގެ ނަތީޖާއަކުން ކުރިހޯދައިގެންނެވެ.
މި މެޗުގެ ނުވަވަނަ މިނެޓުގައި ދެއްވަދޫ އަށް ލީޑު ނަގައިދިނީ އަހްނަފް ރަޝީދު (އަހުއްކޮ) ޖެހި ގޯލުންނެވެ. އަދި ފުރަތަމަ ހާފު ނިމުމުގެ ކުރިން މުހައްމަދު އިމްރާން (އިއްމި) ވަނީ ގޯލު ޖަހާ އެ ޓީމުގެ ލީޑުފުޅާކޮށްދީފަ އެވެ.
ދެވަނަ ހާފު ފަށައިގެން 10 ވަނަ މިނެޓުގައި ދެއްވަދޫގެ ތިން ވަނަ ގޯލު އަހުއްކޮ ޖެހިއިރު, އޭގެ މިނެޓެއް ފަހުން ނިލަންދޫގެ މުހައްމަދު ޒާހިލް އަހުމަދު ވަނީ ގޯލު ޖަހާ ފަރަގު ކުޑަކޮށްފަ އެވެ. އެކަމަކު އޭގެ ދެ މިނެޓު ފަހުން އޭނާ އަތުން ބައިކޮޅަށް ގޯލެއް ވަނީ ވަދެފަ އެވެ. ދެއްވަދޫގެ ފަސްވަނަ ގޯލު ޖަހާދިނީ އިއްމި އެވެ.
ގޯލްޑަން ފުޓްސަލް ޗެލެންޖުގައި މިއަދު ހަވީރާއި މިރޭ ކުޅޭ މެޗުތައް:
16:00: ގދ. ސެމީ ފައިނަލް: މަޑަވެލި - ގައްދޫ
16:00: ގދ ސެމީ ފައިނަލް: ވާދޫ - ތިނަދޫ
17:00: އއ. ފައިނަލް: މަތިވެރި - ތޮއްޑޫ
------------------------------------------
20:00: ކ. ގާފަރު - ކ. ދިއްފުށި
20:00: ކ. މާފުށި - ކ. ހިންމަފުށި
21:00: ކ. ގުރައިދޫ - ކ. ތުލުސްދޫ
21:00: ކ. ކާށިދޫ - ކ. ގުޅި
22:00: އދ. ސެމީ ފައިނަލް: ދަނގެތި - މަންދޫ
22:00: އދ. ސެމީ ފައިނަލް: މަހިބަދޫ - ކުނބުރުދޫ
23:00: އައްޑޫ ސެމީ ފައިނަލް: މީދޫ - ފޭދޫ
23:00: އައްޑޫ ސެމީ ފައިނަލް: ހިތަދޫ - މަރަދޫފޭދޫ
