ރަމަލު ޖަހައިގެންނާއި އަތް ބަލައިގެން ގައިބުގައިވާ ކަންކަން ހޯދައި ފަރުވާދޭ ކަމަށް ދައުވާ ކުރާ އިންޑިއާގެ ކަހީނަކު ރާއްޖޭގައި ހިދުމަތްދޭ މައްސަލައެއް ފުލުހުން ބަލަން ފަށައިފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މާސްޓާ ދުރްގާ ރާއޯ ގުރޫޖީ ނަމަކަށް ކިޔާ މީހަކު ރާއްޖޭގައި ރޫހާނީ ހިދުމަތް ދޭ ކަމަށް ބުނެ ސޯޝަލް މީޑިއާގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ.
"މި މައްސަލައާ ގުޅިގެން ގާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތް ކަމާބެހޭ އިދާރާތަކާ ގުޅިގެން ފުލުހުން ދަނީ ކުރަމުން،" ފުުލުހުން ފޮނުވި މެސެޖުގައި ބުންޏެވެ.
މާސްޓާ ދުރްގާ ރާއޯ ގުރޫޖީ ހިދުމަތްތައް ޕްރޮމޯޓު ކުރަމުން ދަނީ އޭނާގެ ނަމުގައި ފޭސްބުކްގައި ހިންގާ ޕޭޖެއްގަ އެވެ. އެ ޕޭޖުގައި އޭނާއާ ގުޅޭ ނަންބަރާއެކު އޭނާ ދޭ ހިދުމަތްތައް ވެސް ޖަހާފައިވެ އެވެ.
އޭނާ ދޭ ހިދުމަތްތަކުގެ ތެރޭގައި ސިހުރުގެ ވަބާއިން ސަލާމަތް ކޮށްދިނުމާއި އެކިއެކި ސިއްހީ މައްސަލަތަކަށް ފަރުވާ ހޯދައިދިނުމުގެ އިތުރުން ވަރިކައިވެނީގެ މައްސަލަތައް ހައްލު ކޮށްދިނުމަށް އިސްތިރި ހަދައިދިނުން ހިމެނެ އެވެ.
ފުލުހުން ބުނީ ދިވެހީންގެ ސަގާފަތާއި ދީނާ ހިލާފު އެފަދަ ކަންކަމުގެ މައުލޫމާތު އެކަކު އަނެކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލު ކަމަށް ގެނެސް އެކަމަށް ގާނޫނީ ފިޔަވަޅު އެޅުމުގެ މަސައްކަތް ކުރުމަކީ މުހިންމު ކަމެއް ކަމަށެވެ.
އެހެންކަމުން އެފަދަ އިޝްތިހާރެއްގެ މައުލޫމާތު ލިބިއްޖެ ނަމަ ލަސްނުކޮށް ފުލުހުންނަށް ރިޕޯޓު ކުރުމަށް އެ އިދާރާއިން އެދިފައިވެ އެވެ.
މީގެ ކުރިން 2023 ވަނަ އަހަރު ވެސް ހިންދޫ ދީނުގެ ކަހީނަކު ރާއްޖެއަށް އައިސް "ސްޕިރިޗުއަލް ހީލިން" ކްލާސްތަކެއް ބާއްވަން އުޅުނު މައްސަލައެއް ފެންމަތިވި އެވެ.
އެފަހަރު އެ ކްލާސްތައް ފެށުމުގެ ކުރިން ފުލުހުން ވަނީ އޭނާ ހައްޔަރުކޮށް ޑިޕޯޓު ކޮށްލައިފަ އެވެ.
