ބާސެލޯނާ (ޖެނުއަރީ 19) - ސްޕެނިޝް ލީގުގައި ރޭ ގެޓަފޭއާ ދެކޮޅަށް ކުޅުނު މެޗުން ބާސެލޯނާ 1-1 އިން އެއްވަރުވިއިރު، ލެގަނޭސް އަތުން 1-0 އިން ބަލިވެ، އެތުލެޓިކޯ މެޑްރިޑުން މޮޅުވެގެން ދަމަހައްޓަމުން އައި ރެކޯޑް ނިމުމަކަށް އަތުވެއްޖެ އެވެ.
ރޭގެ މެޗާ ހަމައަށް އެތުލެޓިކޯ އިން ވަނީ އެންމެ ފަހުން ކުޅުނު 15 މެޗުން ވެސް މޮޅުވެފަ އެވެ. މިއީ، އެ ކްލަބްގެ ތާރީހުގަައި ވެސް ހާއްސަ ރެކޯޑެކެވެ. އެކަމަކު، ލެގަނޭސް އިން ވަނީ އެ ރެކޯޑް ނިމުމަމަކަށް ގެނެސްފަ އެވެ. ލީގުގެ އެއް ވަނައިގައި އެތުލެޓިކޯ އޮތީ 20 މެޗުން 44 ޕޮއިންޓާ އެކު އެވެ. ދެ ވަނައިގައި އޮތް ރެއާލަށް 19 މެޗުން ވަނީ 43 ޕޮއިންޓް ލިބިފަ އެވެ.
ތިން ވަނައިގައި އޮތް ބާސެލޯނާ އަށް ވަނީ 20 މެޗުން 39 ޕޮއިންޓް ލިބިފަ އެވެ.
ރަށުންބޭރުގައި ކުޅުނު ބާސެލޯނާ އިން މެޗުގެ ކުރީކޮޅުގައި ޖޫލްސް ކޫންޑޭގެ ގޯލުން ލީޑުނެގިއިރު، ގެޓަފޭ އަށް އެއްވަރުކޮށްދިން ގޯލު ފުރަތަމަ ހާފުގައި ޖަހައިދިނީ، މައުރޯ އަރަމްބަރީ އެވެ.
މި މެޗުގައި ބާސެލޯނާގެ ފުލްބެކް، އަލެހަންޑްރޯ ބާލްޑޭއާ ނަސްލީ ގޮތުން ދިމާކުރި މައްސަލައެއް ކުރިމަތިވިއިރު، ބާސެލޯނާ އިން ވަނީ އެކަން ރަސްމީކޮށް ކަމާބެހޭ އިދާރާތަކަށް ހުށަހަޅައިފަ އެެވެ. ބާސެލޯނާގެ ކޯޗު ހަންސީ ފްލިކް ވަނީ މެޗަށް ފަހު އޮތް ނޫސްވެރިންގެ ބައްދަލުވުމުގައި ވެސް އެކަން ފާހަގަކޮށްފަ އެވެ.
ލެގަނޭސްގެ މަޓާއިޖާ ނަސްޓާސްޓިޗްގެ ގޯލުން އެ ޓީމު މޮޅުވި މި މެޗުގައި އެއްވަރުކުރަން އެތުލެޓިކޯގެ އަންޓުއާން ގްރީޒްމަން އަށް ލިބުނު ޕެނަލްޓީން އޭނާ ޖެހި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ކުރިން ވެސް ގްރީޒްމަންގެ ހަމަލާއެއް ދަނޑިއަށް އަމާޒުވި އެވެ.
