މިފްކޯއިން 140 ގްރާމުގެ ކުޑަ މަސްދަޅެއް ބާޒާރަށް ނެރެފި އެވެ.
މިފްކޯއިން މިހާތަނަށް އެންމެ ކުޑަ ބަރުދަނެއްގައި ވިއްކަމުންދިޔައީ 180 ގްރާމުގެ މަސްދަޅެވެ. މިގޮތުން އަލަށް ބާޒާރަށް ނެރެފައި ވަނީ 40 ގްރާމު އުނިކޮށް 140 ގްރާމުގެ މަސްދަޅެވެ.
މިފްކޯއިން ބުނީ 140 ގްރާމުގެ މަސްދަޅު ބާޒާރަށް ނެރުނީ ކުދި ގޭބިސީތަކަށް އަމާޒުކޮށް އެއްފަހަރު ބޭނުން ކުރެވޭ އެއްޗެއް ގޮތުގައި ކަމަށެވެ.
"140 ގްރާމު ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި. މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ،" މިފްކޯއިން ބުންޏެވެ.
ނަމަވެސް ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ރޯދަ މަހު ކޮންމެ ގޭބިސީއަކަށް ހިލޭ ބަހާ މަސްދަޅުން 40 ގްރާމު އުނި ނުވާނެ ކަމުގެ ޔަގީންކަން މިފްކޯއިން ވަނީ ދީފަ އެވެ.
މިފްކޯއިން މަސްދަޅު ވިއްކަމުންދާ އަގުތައް:
- 140 ގްރާމުގެ މަސްދަޅެއް: 15ރ.
- 140 ގްރާމުގެ 48 ދަޅުގެ މަސްދަޅު ކޭހެއް: 700ރ.
- 180 ގްރާމުގެ މަސްދަޅެއް: 17.50ރ.
- 180 ގްރާމުގެ 48 ދަޅުގެ މަސްދަޅު ކޭހެއް: 760ރ.
އަލަށް ބާޒާރަށް ނެރުނު 140 ގްރާމުގެ ތެޔޮ 48 މަސްދަޅުގެ ކޭސް ހޯލްސޭލްކޮށް އަދި ރީޓެއިލްކޮށް މިހާރު ގަންނަން ލިބޭނެ ކަމަށް ވެސް މިފްކޯއިން ބުންޏެވެ.
މިފްކޯއިން މިހާރު ވިއްކަމުންދަނީ 140 ގްރާމުގެ މަސްދަޅާއި 180 ގްރާމުގެ މަސްދަޅު އެކަންޏެވެ.
