މެންޗެސްޓާ (ޖެނުއަރީ 17) - މި ވަގުުތު އެންމެ ރަނގަޅު ފޯމެއްގައި ހުރި އެއް އެޓޭކަރު، ޖަރުމަނުގެ އައިންޓްރަކްޓް ފްރޭންކްފާޓްގެ މިސްރު ފޯވާޑް، އޮމަރު މާމޫޝް ގަންނަން މެންޗެސްޓާ ސިޓީން އެއްބަސްވުމަކަށް އަތުވެެފައިވާ ކަމަށް ރިޕޯޓްތައް ބުނެފި އެވެ.
މިސްރު ގައުމީ ޓީމަށް ކުޅޭ މާމޫޝް، 25، މީގެ ދެ އަހަރު ކުރިން ހިލޭ ޓްރާންސްފާއެއްގައި ފްރޭންކްފާޓަށް ބަދަލުވެ، މި ސީޒަނުގައި އަންނަނީ ތަފާތު ދައްކަމުންނެވެ. އެ ގޮތުން، މި ސީޒަނުގައި މިހާތަނަށް ޖަރުމަނު ލީގުގައި ވަނީ 15 ގޯލު ޖަހައިފަ އެވެ.
ޕްރިމިއާ ލީގުގެ ގިނަަ ޓީމުތަކަކުން ވާހަކަ ދެއްކި މާމޫޝް ސިޓީ އަށް ބަދަލުވަނީ، 30 މިލިއަން ޑޮލަރުގެ ފީ އަކަށް ކަމަށް ރިޕޯޓްތައް ބުނެ އެވެ.
މީގެ އިތުރުން، ލެންސަށް ކުޅޭ އުޒްބެކިސްތާންގެ ޑިފެންޑަރު، އަބްދުކޮދީރު ހުސާނޯވް އާއި ޕަލްމެއިރާސް އަށް ކުޅެމުން އަންނަ ޒުވާން ޑިފެންޑަރު، ވިޓޯ ރެއިސް ވެސް ސިޓީއާ މި މަހުގެ ޓްރާންސްފާގައި ގުޅޭނެ ކަމަށް ވެސް ރިޕޯޓްތައް ބުނެ އެވެ.
ސިޓީން ދެން ވާހަކަ ދައްކަމުން އަންނަނީ ޔުވެންޓަސްގެ ވާތު ބެކް، އަންޑްރެއާ ކަމްބިއާސޯ އަށެވެ. ސިޓީގެ ކެޕްޓަނެއް ކަމަށްވާ ކައިލް ވޯކާ ވަނީ އެ ކްލަބް ދޫކޮށްލަން ބޭނުންވާކަން އަންގައިފަ އެވެ. ވޯކާ ހޯދަން އިޓަލީގެ އޭސީ މިލާނުން މަސައްކަތްކުރެ އެވެ.
