ގޯލްޑަން ފުޓްސަލް ޗެލެންޖް 2025 ގދ. އަތޮޅުގައި އިއްޔެ ހަވީރު ކުޅުނު މެޗުތަކުގެ ނަތީޖާ އަށް ފަހު، އެންމެ ފަހުގެ އަތޮޅު ޗެމްޕިއަން، ވާދޫ އާއި މަޑަވެލިން އަތޮޅު ސެމީ ފައިނަލުން ޖާގަ ހޯދައިފި އެވެ.
އިއްޔެ ހަވީރު ގްރޫޕް ދޭއްގައި ވާދޫ އިން ނުކުތީ ގައްދޫއާ ދެކޮޅަށެވެ. މި މެޗުގެ 20 ވަނަ މިނެޓުގައި ގައްދޫ އިން ވަނީ ގޯލު ޖަހާ ލީޑު ނަގައިފަ އެވެ. މި ގޯލު އެ ޓީމަށް ޖަހާދިނީ އަހުމަދު އަކްމަލް ނިޒާމް އެވެ. އެކަމަކު ދެ ވަނަ ހާފު ފަށައިގެން ހަތަރު ވަނަ މިނެޓުގައި ލިބުނު ހިލޭ ޖެހުމެއްގެ ފައިދާ ނަގާ ވާދޫގެ މުހައްމަދު ނާއިލް ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. އެކަމަކު އޭގެ އިރުކޮޅެއް ފަހުން ނާއިލް އަށް ރެފްރީ ވަނީ ސީދާ ރަތް ކާޑެއް ދައްކައިފަ އެވެ.
މި ނަތީޖާއާއެކު, ވާދޫ އަށް ދެ މެޗުން ހަތަރު ޕޮއިންޓް ވަނީ ލިބިފަ އެވެ. ތިން ޓީމު ހިމެނޭ ގްރޫޕުން ވާދޫ އަށް ހަތަރު ޕޮއިންޓާ އެކު، އަތޮޅު ސެމީ ފައިނަލުގެ ފުރުސަތު ލިބިފައިވާއިރު، އެ ޓީމަށް ގްރޫޕްގެ އެއް ވަނަ ލިބޭނެތޯ ޔަގީންވާނީ، ފިޔޯރީ އާއި ގައްދޫ ކުޅޭ މެޗުގެ ނަތީޖާއިންނެވެ.
މި އަތޮޅުގެ ގްރޫޕް އެކެއްގެ މަޑަވެލިން ފަރެސްމާތޮޑާ ބަލިކުރީ 3-2 ގެ ނަތީޖާއަކުންނެވެ.
މި މެޗުގެ 17 ވަނަ މިނެޓުގައި މަޑަވެލީގެ މުހައްމަދު މުއާދް ވަނީ ގޯލު ޖަހާ ލީޑު ނަގައިފަ އެވެ. އެކަމަކު ދެ ވަނަ ހާފު ފަށައިގެން ހަތް ވަނަ މިނެޓުގައި ފަރެސްމާތޮޑާގެ އަލީ ޝަހުމް ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. އަދި އޭގެ ދެ މިނެޓު ފަހުން އިބްރާހީމް ނަޒީމް ޖެހި ގޯލުން ފަރެސްމާތޮޑާ އިން ލީޑުނެގި އެވެ. އެކަމަކު މުއާދް ވަނީ އިތުރު ދެ ގޯލު ޖަހާ އޭނާގެ ހެޓްރިކް ފުރިހަމަކޮށް މަޑަވެލި މެޗުން މޮޅުކޮށްދީފަ އެވެ.
ގްރޫޕްގައި ކުޅުނު ދެ މެޗުން ވެސް މޮޅުވެ، މަަޑަވެލިން އަތޮޅު ސެމީ އަށް ދިޔައީ އެއް ވަނައިގެ ގޮތުގަ އެވެ. ސެމީގެ އަނެއް ޖާގަ ކަނޑައެޅޭނީ ތިނަދޫ އާއި ފަރެސްމާތޮޑާ ކުޅޭ މެޗުންނެވެ.
ގޯލްޑަން ފުޓްސަލް ޗެލެންޖުގައި މިއަދު ހަވީރާއި މިރޭ ކުޅޭ މެޗުތައް:
16:00: ބ. އޭދަފުށި - ބ. ތުޅާދޫ
17:00: ދ. ބަނޑިދޫ - ދ. މާއެނބޫދޫ
----------------------------------------
20:00: ހއ. ކެލާ - ހއ. ހޯރަފުށި
20:00: ހއ. ފިއްލަދޫ - ހއ. ބާރަށް
21:00: ހއ. އުތީމު - މުރައިދޫ
21:00: ހއ. އިހަވަންދޫ - ހއ. ދިއްދޫ
22:00: ހދ. ނޭކުރެންދޫ - ހދ. ނޮޅިވަރަންފަރު
22:00: ހދ. ފިނޭ - ހދ. މަކުނުދޫ
23:00: ހދ. ނައިވާދޫ - ހދ. ނެއްލައިދޫ
23:00: ހދ. ނޮޅިވަރަން - ހދ. ކުމުންދޫ
