ގަވާއިދާ ހިލާފަށް ރާއްޖެ ސަރަހައްދަށް ވަދެ އުޅުނު ބޭރުގެ މަސްބޯޓެއް ކޯސްޓުގާޑުން އަތުލައިގެންފި އެވެ.
އެމްއެންޑީއެފުން ބުނީ އެ ބޯޓު އެމްއެންޑީއެފް ކޯސްޓުގާޑުގެ ބެލުމުގެ ދަށަށް މިހާރު ގެންގޮސްފައިވާ ކަމަށެވެ. ނަމަވެސް އެއީ ކޮން ގައުމެއްގެ ބޯޓެއްކަމެއް ވެސް އަދި އެ ބޯޓު އަތުލައިގަތީ ކިހައި ހިސާބަކުން ކަމެއް ވެސް އެމްއެންޑީއެފުން ހާމައެއް ނުކުރެ އެވެ.
ރާއްޖެ ސަރަހައްދަށް ބޭރުގެ މަސްބޯޓުފަހަރާއި އެ ނޫން ވެސް އުޅަނދުފަހަރު ގަވާއިދާ ހިލާފަށް ވަދެ އުޅޭ މައްސަލަ ދޭތެރެދޭތެރެއިން ބޮޑުވެ އެވެ.
އެ ގޮތުން މިދިޔަ ޑިސެމްބަރު މަހު ވެސް ފުވައްމުލަކު ބޭރުން ޑިންގީއެއްގައި ބެހިގެން އައި ބަޔަކު ސިފައިން ވަނީ އަތުލައިގެންފަ އެވެ. އޭގެ އިތުރުން މިދިޔަ އަހަރުގެ ތެރޭގައި ރާއްޖެ ސަރަހައްދަށް ގަވާއިދާ ހިލާފަށް ވަދެ އުޅުނު ލަންކާގެ މަސް ބޯޓަކުން ބިލިއަން ރުފިޔާއަށް ވުރެ އަގު ހުރި މަސްތުވާތަކެތި އަތުލައިގެންފައިވެ އެވެ.
ރާއްޖެއަކީ އެއްގަމަށް ވުރެ ކަނޑުގެ ސަރަހައްދު ބޮޑު ގައުމަކަށް ވާތީ، ރާއްޖޭގެ ކަނޑުގެ ސަރަހައްދު އަމިއްލައަށް ބެލެހެއްޓުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިދިޔަ އަހަރު ތިން ޑްރޯން ވެސް ގަނެފަ އެވެ.
