ލަންޑަން (ޖެނުއަރީ 15) - އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން ލިވަޕޫލާއި ޗެލްސީ އަދި މެންޗެސްޓާ ސިޓީ ވެސް މޮޅެއް ނުލިބި އެއްވަރުވެއްޖެ އެވެ.
ލީގުގެ އެއް ވަނައިގައި އޮތް ލިވަޕޫލުން ރަށުންބޭރުގައި ލީގުގެ ތިން ވަނައިގައި އޭރު އޮތް ނޮޓިންހަމް ފޮރެސްޓާ ކުޅުނު މެޗު ވަނީ 1-1 އިން އެއްވަރުވެފަ އެވެ. ބްރެންޓްފޯޑް ދަނޑުގައި ސިޓީން ދެ ގޯލުގެ ލީޑެއް ނެގި ނަމަވެސް މެޗު ނިމުނީ 2-2 އިން އެއްވަރުވެގެންނެވެ. އަދި ބޯންމައުތުން ވަނީ ޗެލްސީ ދަނޑުގައި ކުޅެ، 2-2 އިން އެއްވަރުވެފަ އެެވެ.
ލީގުގެ އެއް ވަަނައިގައި އޮތް ލިވަޕޫލަށް ވަނީ 20 މެޗުން 47 ޕޮއިންޓް ލިބިފަ އެވެ. ދެ ވަނައިގައި އޮތް ފޮރެސްޓަށް 21 މެޗުން 41 ޕޮއިންޓް ލިބުނުއިރު، ތިން ވަނައިގައި އޮތް އާސެނަލަށް 20 މެޗުން ވަނީ 40 ޕޮއިންޓް ލިބިފަ އެވެ. ހަތަރެއްގައި އޮތް ޗެލްސީ އަށް ވަނީ 21 މެޗުން 37 ޕޮއިންޓް ލިބިފަ އެވެ. އަދި ފަސް ވަނައިގައި އޮތް ނިއުކާސަލް އާއި ހަ ވަނައިގައި އޮތް މެންޗެސްޓާ ސިޓީ އަށް ލިބިފައި އޮތީ 35 ޕޮއިންޓެވެ. ސިޓީން 21 މެޗު ކުޅުނުއިރު، ނިއުކާސަލް އިން ކުޅެފައިވަނީ 20 މެޗެވެ.
ކްރިސް ވުޑްގެ ގޯލުން ފޮރެސްޓުން ލީޑުނެގި މެޗުގައި ލިވަޕޫލަށް އެއްވަރުކޮށްދިނީ ބަދަލަކަށް ކުޅެން އެރި ގޮތަށް ފުރަތަމަ ބޯޅައިން ޑިއޯގޯ ޖޮޓާ ޖެހި ގޯލުންނެވެ. މެޗުން މޮޅުވާން ޖޮޓާ އާއި މުހައްމަދު ސަލާހު ފޮނުވާލި ހަމަލާތައް ފޮރެސްޓްގެ ކީޕަރު، މެޓްޒް ސެލްސް ވަނީ މަތަކޮށްފަ އެވެ.
ފިލް ފޯޑެންގެ ދެ ގޯލުން ސިޓީން ލީޑުނަގާފައިވަނިކޮށް، ފަހު އަށް މިނިޓް ތެރޭ ބްރެންޓްފޯޑުން އެއްވަރުކުރީ ޖޮއާން ވިއްސާ އާއި ކްރިސްޓިއަން ނޯގާޑް ޖެހި ގޯލުތަކުންނެވެ.
ޗެލްސީ ދަނޑުގައި އެ ޓީމުން ކޯލް ޕާމާގެ ގޯލުން ލީޑުނެގި ފަހުން، ބޯންމައުތުން ނަތީޖާ އަނބުރާލީ ޖަސްޓިން ކްލައިވަޓް އާއި އެންޓޮއިން ސެމެންޔޯ ޖެހި ގޯލުތަކުންނެވެ. އިތުރު ވަގުތުގެ ފަސް ވަނަ މިނިޓްގައި، ރީސް ޖޭމްސް ކާމިޔާބުކުރި ހިލޭޖެހުމުން ޗެލްސީ ބަލިނުވެ ސަލާމަތްވީ އެވެ.
ގްރަހަމް ޕޮޓާ ކޯޗުކޮށްދިން ފުރަތަމަ މެޗުގައި، ވެސްޓް ހޭމް ޔުނައިޓެޑުން ވަނީ 3-2 އިން ފުލަމް ބަލިކޮށްފަ އެވެ.
