ގޯލްޑަން ފުޓްސަލް ޗެލެންޖް 2025 ގައި ތ. އަތޮޅު ގްރޫޕް ސްޓޭޖުގައި ހިރިލަންދޫ އިން ކުޅުނު ތިން ވަނަ މެޗު ވެސް ކާމިޔާބުކޮށް ސެމީ ފައިނަލުން ޖާގަ ހޯދިއިރު, ތިމަރަފުށިން ކުޅުނު ދެ ވަަނަ މެޗު ވަނީ ކާމިޔާބުކޮށްފައި.
މި މުބާރާތުގައި ރޭ ކުޅުނު ތ. އަތޮޅުގެ ގްރޫޕް ދޭއްގައި ހިރިލަންދޫ އިން ނުކުތީ ބުރުނިއާ ދެކޮޅަށެވެ. މި މެޗު އެ ޓީމުން ކާމިޔާބުކުރީ 7-1 ގެ ނަތީޖާއަކުންނެވެ.
މި މެޗުގައި ހިރިލަންދޫގެ މުހައްމަދު ނިޝާހް ދެ ގޯލު ޖެހިއިރު, ކެޕްޓަން މުހައްމަދު ޝާން, އަބްދުالله އިޝާން, ރީހާން މޫސާ, މުހައްމަދު ޝަމްހާން އަދި މުހައްމަދު މުނީފް މިއިން ކޮންމެ ކުޅުންތެރިޔަކު ވަނީ ގޯލެއް ޖަހާފަ އެވެ. މި މެޗުގައި ބުރުނިން ޖެހި ހަމައެކަނި ގޯލު އެ ޓީމަށް ޖަހާދިނީ އުސްމާން ޝާން އެވެ.
ހިރިލަންދޫގެ މުފީދު ރޭގެ މެޗުގެ ތެރެއިން ބޯޅަ ހިފައިގެންދަނީ.---- ފޮޓޯ: އިމޭޖަސް.އެމްވީ
މި ގްރޫޕްގައި ގާދިއްފުށިން ކަނޑޫދޫގެ މައްޗަށް ކުރިހޯދީ 4-3 ގެ ނަތީޖާ އަކުންނެވެ.
މި މެޗުގެ ފުރަތަމަ ހާފު ނިމުމުގެ ކަނޑޫދޫގެ ހުސެއިން ސަނީ ވަނީ ގޯލު ޖަހާ ލީޑު ނަގާފަ އެވެ. އެކަމަކު ފުރަތަމަ ހާފު ނިމުމުގެ ކުރިން ގާދިއްފުށީގެ ކެޕްޓަން ހުސެއިން ޒާހިރު ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. އަދި އޭގެ ދެ މިނެޓު ފަހުން ޒާހިރު ވަނީ އިތުރު ގޯލެއް ޖަހާ ލީޑު ނަގާދީފަ އެވެ. އަދި އޭގެ ދެމިނެޓު ފަހުން އަހުމަދު އުނައިސް ވަނީ ގޯލު ޖަހާ އެ ޓީމަށް ލީޑު ފުޅާކޮށްދީފަ އެވެ.
އެކަމަކު މެޗުގެ ދެވަނަ ހާފުގެ 16 ވަނަ މިނެޓުގައި ކަނޑޫދޫގެ މުހައްމަދު މާއިސް އަދި ނާހިޒް އަލީ ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. މެޗުން ގާދިއްފުށި މޮޅުކޮށްދިން ގޯލު ޖަހާދިނީ މުހައްމަދު އައިހަމް އެވެ.
ގްރޫޕް ދޭއްގައި ކުޅުނު ތިން މެޗުން ވެސް މޮޅުވެ، ހިރިލަންދޫ އެއް ވަނައިގައި ނުވަ ޕޮއިންޓާ އެކު އޮތްއިރު، ދެ ވަނައިގައި އޮތް ބުރުންޏަށް ވަނީ ހަ ޕޮއިންޓް ލިބިފަ އެވެ. ގާދިށްފުށްޓަށް ތިން ޕޮއިންޓް ލިބިފައިވާއިރު، ވޭމަންޑޫ އާއި ކަނޑޫދޫ އަށް އަދި ޕޮއިންޓެއް ނުލިބެ އެވެ.
މި އަތޮޅުގެ ގްރޫޕް އެކެއްގައި އެންމެ ފަހުގެ ޗެމްޕިއަން ތިމަރަފުށިން ވަނީ ދިޔަމިގިލީގެ މައްޗަށް 9-1 ގެ ނަތީޖާ އަކުން ކުރިހޯދައިފަ އެވެ. މި މެޗުގައި ތިމަރަފުށީގެ އަހުމަދު އަފްލާޒް ތިން ގޯލު ޖަހާ ހެޓްރިކް ހެދިއިރު, އިބްރާހީމް ހަމްދާން ވަނީ ދެ ގޯލު ޖަހައިފަ އެވެ. އަދި ކެޕްޓަން އިބްރާހީމް އަސްވަދު (ގަބޭ), އާދަމް ނާސިހް އަދި އިސްމާއިލް މުނީޒް ވަނީ ގޯލެއް ޖަހާފަ އެވެ.
މި މެޗުގައި ދިޔަމިނގިލިން ޖެހި ހަމައެކަނި ގޯލު އެ ޓީމަށް ޖަހާދިނީ މައިސަމް މުހައްމަދެވެ.
މި ގްރޫޕްގައި ކިނބިދޫ އިން ވިލިފުށި ބަލިކުރީ 3-0 ގެ ނަތީޖާ އަކުންނެވެ. މި މެޗުގެ 14 ވަނަ މިނެޓުގައި ކިނބިދޫ އަށް ލީޑު ނަގާދިނީ ކެޕްޓަން އަހުމަދު ހަމްދާން ހުސެއިން ޖެހި ގޯލުންނެވެ. އަދި ދެ ވަނަ ހާފު ފަށައިގެން ފުރަތަމަ މިނެޓުގައި އިބްރާހީމް އިމްރާހް ވަނީ ކިނބިދޫގެ ލީޑު ފުޅާކޮށްދީފަ އެވެ. ކިނބިދޫގެ ތިންވަނަ ގޯލު އެޓީމަށް ޖަހާދިނީ މުހައްމަދު ޝާފިއު އެވެ.
މި ގްރޫޕްގެ އެއް ވަނައިގައި އޮތީ ދެ މެޗުން ވެސް މޮޅުވެ، ހަ ޕޮއިންޓް ހޯދާފައިވާ ތިމަރަފުށްޓެވެ. ދެ ވަަނައިގައި އޮތް ވިލުފުށްޓަށް ވެސް ހަ ޕޮއިންޓް ލިބިފައިވާއިރު، ތިން ވަނައިގައި އޮތް ކިނބިދޫ އަށް ވަނީ ހަތަރު ޕޮއިންޓް ލިބިފަ އެެވެ. ހަތަރެއްގައި އޮތް އޮމަދޫ އަށް ޕޮއިންޓެއް ލިބިފައިވާއިރު، ފުލުގައި އޮތް ދިޔަމިގިއްޔަށް އަދި ޕޮއިންޓެއް ނުލިބެ އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް
20:00: ށ. ކަނޑިތީމު - ށ. މިލަންދޫ
20:00: ށ. މަރޮށި - ށ. ފޭދޫ
21:00: ށ. ނަރުދޫ - ށ. ގޮއިދޫ
21:00: ށ. ބިލެއްފަހި - ށ. ޅައިމަގު
22:00: އއ. ތޮއްޑޫ - އއ. އުކުޅަސް
22:00: އއ. ހިމަންދޫ - އއ. މަތިވެރި
23:00: އއ. ރަސްދޫ - އއ. ބޮޑުފޮޅުދޫ
23:00: އއ. ފެރިދޫ - އއ. މާޅޮސް
