ކުންފުނި ނަންމަތީ ސައިކަލު ދޫނުކުރެވޭ ގޮތަށް ޓްރާންސްޕޯޓް މިނިސްޓްރީން ނިންމުމުން، ރާއްޖޭގައި އިންސްޓޯލްމަންޓަށް ސައިކަލު އެންމެ ގިނައިން ދޫކުރަމުންދާ ޝީޝާއިން ސައިކަލު އިންސްޓޯލްމަންޓަށް ދޫކުރުން ވަގުތީ ގޮތުން ހުއްޓާލައިފި އެވެ.
ޓްރާންސްޕޯޓް މިނިސްޓްރީއަށް ލިބިދޭ ބާރުގެ ދަށުން އެ މިނިސްޓްރީން ވަނީ ސައިކަލު އެތެރެ ކުރާ ކުންފުނިތައް ހިމެނޭ ގޮތަށް ހުރިހާ ކުންފުންޏަކުން ވެސް ސައިކަލު ރަޖިސްޓްރީ ކުރެވޭނީ އެ ކުންފުންޏަކަށް ބޭނުންވާ އަދަދަށް ކަމަށް ކަނޑައަޅައި ގަވާއިދު ބަދަލުކޮށްފަ އެވެ. އެ ގަވާއިދަށް އަމަލު ކުރަން ފެށި ޑިސެމްބަރު މަހެވެ.
އެ ބަދަލާ ގުޅިގެން މީގެ ފަހުން "ސީ" ބޯޑުގައި ސައިކަލުތައް ދޫކުރަމުން އައި އައުން ނިމުމަކަށް އައިސް، ސައިކަލު ދެން ދޫކުރެވޭނީ "ޕީ" ބޯޑުގައި އެކަންޏެވެ.
ޝީޝާގެ އިސް އޮފިޝަލަކު "އަދަދު" އަށް ވިދާޅުވީ ޓްރާންސްޕޯޓް މިނިސްޓްރީން ކުންފުނިތަކަށް ކުރީބައިގައި އެންގުމެއް ނެތި ކުއްލި ގޮތަކަށް ކުންފުނިތައް ނަން މަތީގައި ސައިކަލު ދޫނުކުރެވޭނެ ކަމަށް ނިންމުމުން، ކުންފުނީގެ ޕޮލިސީއަށް ގެންނަން ޖެހޭ ބަދަލުތައް ގެނައުމަށް އިންސްޓޯލްމަންޓަށް ސައިކަލު ދޫކުރުން މިވަގުތަށް ހުއްޓާލާފައިވާ ކަމަށެވެ.
ނަމަވެސް ޕޮލިސީއަށް ބަދަލުތައް ގެނެސް ގާނޫނީ ގޮތުން ފުރިހަމަ ކުރަން ޖެހޭ ކަންކަން ފުރިހަމަ ކުރުމަށްފަހު، ކުރިއަށް އޮތް ދުވަސްތަކުގައި އަލުން އިންސްޓޯލްމަންޓަށް ސައިކަލު ދޫކުރުމުގެ މަސައްކަތް ފަށާނެ ކަމަށް ވެސް އެ އޮފިޝަލް ވިދާޅުވި އެވެ.
"ވަރަށް ފަހުން ވެހިކަލް ރަޖިސްޓްރޭޝަންގެ ގަވާއިދަށް ގެނައި ބަދަލާ ގުޅިގެން ކުންފުނީގެ ނަން މައްޗަށް ސައިކަލު ވިއްކުމަށް ނޫނީ ހަޔާ ޕާޗޭސްއަށް ދޫކުރުމަށް ކުންފުނީގެ ނަން މައްޗަށް ރަޖިސްޓާ ނުކުރެވޭ. އެކަމާ ގުޅިގެން އަޅުގަނޑުމެން ވެސް ކުއްލިއަކަށް އެ އައި ބަދަލެއް. އަޅުގަނޑުމެންނާ މަޝްވަރާ ކޮށްފައި ގެނައި ބަދަލެއް ނޫން. އެހެންވީމަ ކުންފުނީގެ ޕޮލިސީތަކާއި ލީގަލީ ވެސް ބަދަލުތަކެއް ގެންނަން ޖެހޭނެ. އެކަމާ ގުޅިގެން ވަގުތީ ގޮތުން އެ ބަދަލުތައް ގެނެވެންދެން ހުއްޓާލީ،" އޭނާ ވިދާޅުވި އެވެ.
ޓްރާންސްޕޯޓް މިނިސްޓަރު މުހައްމަދު އަމީން "އަދަދު" އަށް ވިދާޅުވީ އެ ނިންމުން މިނިސްޓްރީން ނިންމަން ޖެހުނީ އިންސްޓޯލްމަންޓަށް ކުންފުނިތަކުގެ ނަންމަތީގައި ސައިކަލު ދޫކޮށްގެން، އެ ސައިކަލެއް ދުއްވަނިކޮށް އެކްސިޑެންޓެއް ދިމާވެގެން ނުވަތަ ވައްކަމެއް ކޮށްގެން ވިޔަސް، ސައިކަލު ދުއްވި މީހާ އެކަމަށް ޒިންމާ ކުރުވަން ހުރަސްތަކެއް ދިމާވާތީ ކަމަށެވެ.
މިގޮތުން ސައިކަލު ކުންފުނިތައް ނަން މަތީގައި ދޫކުރަމުން އައި އުސޫލު ބަދަލުކޮށް، ކުރިއަށް އޮތް ތަނުގައި ދެން ސައިކަލު ދޫކުރެވޭނީ ހަމައެކަނި ކުންފުންޏަށް ބޭނުންވާ ވަރަށް ކަމަށާއި ވިއްކާ ސައިކަލުތައް ރަޖިސްޓްރީ ކުރަން ޖެހޭނީ ސައިކަލު ދުއްވާ މީހާގެ ނަން މައްޗަށް ކަމަށެވެ.
"މިނިސްޓްރީއަށް ލިބޭ ގާނޫނީ ބާރުގެ ދަށުން މި ނިންމީ ކުންފުނިތަކުގެ ނަމުގައި ވެހިކަލް ރަޖިސްޓްރީ ކުރެވޭނީ އެ ކުންފުނީގެ ވިޔަފާރިއަށް ބޭނުންވާ އަދަދަކަށް. އެހެންވީމަ މިހާރު ސީ ބޯޑު ޖަހައިގެން ރަޖިސްޓްރީކޮށްގެން ދޭ ދިނުން ނިމުމަކަށް އަންނާނެ."
ޝީޝާއިން ރާއްޖޭގައި އިންސްޓޯލްމަންޓަށް ސައިކަލު ދޫކުރަން ފެށިތާ 25 އަހަރުވެފައިވާއިރު، ރާއްޖޭގައި އިންސްޓޯލްމަންޓަށް ދޫކުރާ ސައިކަލުގެ 50 ޕަސަންޓަށްވުރެ ގިނަ ސައިކަލަކީ އެ ކުންފުނިން ދޫކުރާ ސައިކަލެވެ.
ޓްރާންސްޕޯޓް މިނިސްޓްރީގެ ގަވާއިދު ކުރިން އޮތް ގޮތުން ކުންފުނިތަކުގެ ނަމުގައި ސައިކަލުތައް ދޫކުރަން އެއްވެސް ހުރަހެއް ނޯވެ އެވެ. އެގޮތުން ސައިކަލު ވިއްކާ ކުންފުނިތަކުން ދިޔައީ އިންސްޓޯލްމަންޓަށް ކުންފުނިތަކުގެ ނަންމަތީގައި ސައިކަލުތައް ދޫކުރަމުންނެވެ.
ގަވާއިދަށް ގެނައި ބަދަލާ އެކު ޝީޝާއިން ސައިކަލު އިންސްޓޯލްމަންޓަށް ދޫކުރުން ވަގުތީ ގޮތުން ހުއްޓާލިއިރު، ބައެއް ކުންފުނިތަކުން އަންނަނީ ޕޮލިސީ ބަދަލުކޮށް އިންސްޓޯލްމަންޓަށް ސައިކަލު ދޫކުރަމުންނެވެ.
އަދި ބައެއް ކުންފުނިތަކުގެ ޕޮލިސީ އޮންނަ ގޮތުން ކުރިން ވެސް ސައިކަލު އިންސްޓޯލްމަންޓަށްދޫކުރަމުން އަންނަނީ އެ ދޫކުރާ މީހާގެ އަމިއްލަ ނަން މަތީގައި، ނަމަވެސް ސައިކަލުގެ ގެރެންޓާއެއްގެ ގޮތުގައި ސޮއިކުރާ މީހާ ނުދައްކާ ފައިސާއަކަށް ޒިންމާވާ ގޮތަށެވެ.
