ދަ ޑިމޮކްރެޓްސްގެ ވަގުތީ ރައީސް އަކަށް ރައްޔިތުންގެ މަޖިލީހުގެ މަޑަވެލީ ދާއިރާގެ ކުރީގެ މެންބަރު ހުސެއިން ފިރުޝާން އިންތިހާބުކޮށްފި އެވެ.
އެ ޕާޓީން ރޭ ބޭއްވި ޕާޓީގެ ނެޝަނަލް އެސެމްބްލީގައި ވަގުތީ ރައީސްގެ މަގާމަށް ފިރުޝާންއާ ވާދަކުރީ އެ ޕާޓީގެ ނައިބު ރައީސް އައިޝަތު އަލައިކާ އަދުނާން އެވެ.
ނެޝަނަލް އެސެމްބްލީގައި 130 މެންބަރުން ތިބޭއިރު، ރޭގެ ބައްދަލުވުމުގައި ބައިވެރިވެ ވޯޓުލީ 44 މެންބަރުންނެވެ.
ދަ ޑިމޮކްރެޓްސްގެ ވަގުތީ ރައީސް އަކަށް ފިރުޝާން އިންތިހާބު ކުރަން 29 މެންބަރުން ވޯޓު ދިންއިރު އަލައިކާ އަށް ލިބުނީ 14 ވޯޓެވެ.
ޑިމޮކްރެޓްސްގެ ރައީސްގެ މަގާމު ހުސްވީ އެ މަގާމުގައި ހުރި ހަސަން ލަތީފް އިސްތިއުފާ ދެއްވުމަށް ފަހު، އެމްޑީޕީއަށް ސޮއިކުރުމާ ގުޅިގެންނެވެ. އަދި ނައިބު ރައީސްކަމުގެ މަގާމު ހުސްވީ އެ މަގާމުގައި ހުރި މުހައްމަދު ޝިފާޒު އެމްޑީޕީއަށް ސޮއިކުރުމުންނެވެ.
ހުސްވެފައިވާ އެ ދެ މަގާމަށް މީހުން އިންތިހާބު ކުރުން ކުރިއަށް އޮތް 40 ދުވަސް ތެރޭގައި ކުރުމަށް ރޭ ފާސްކުރި އެވެ.
