ސަތޭކަ ރުފިޔާގެ ފައިސާ ނޫޓުގެ ޑިޒައިނަށް ބަދަލުތަކެއް ގެނެސް އާ ނޫޓުތަކެއް ޗާޕު ކޮށްފައިވާކަން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިއުލާނުކޮށްފި އެވެ.
އެމްއެމްއޭ އިން ސޯޝަލް މީޑިއާގައި މިރޭ ކުރި އިއުލާނެއްގައި ބުނީ، މިއީ ސްޓޮކް މަދުވުމުގެ ސަބަބުން ޗާޕުކޮށްގެން ގެނައި ފައިސާގެ ތެރޭގައި ހިމެނޭ ނޫޓުތަކެއް ކަމަށެވެ. ޑިސެމްބަރު 15، 2024 ގައި ގެނައި ފައިސާ ނޫޓުތަކުގެ ތެރެއިން އާ ޑިޒައިނުގެ 100ރ. ގެ ނޫޓުތައް ދައުރުކުރަން ފަށާނީ އަންނަ ހަފުތާއިން ފެށިގެންނެވެ.
އައު ޑިޒައިނުގައި އެންމެ ބޮޑަށް ފާހަގަވަނީ ދިވެހި ރުފިޔާގެ ނިޝާން ހިމަނާފައިވުމެވެ. މައިގަނޑު ގޮތެއްގައި ނޫޓުގެ ޑިޒައިނަށް ބަދަލެއް ނާދެ އެވެ.
ކުރީގެ ގަވަރުނަރު އަލީ ހާޝިމް ސޮއިކުރައްވާފައިވާ މި ނޫޓުތަކުގައި ތާރީހެއްގެ ގޮތުގައި ހުންނާނީ ޖުލައި 7، 2024 އެވެ. އައު ޑިޒައިނާއެކު މިހާރުގެ ޑިޒައިނުގެ ނޫޓުތައް ދައުރުވާނެ ކަމަށްވެސް އެމްއެމްއޭ އިން ބުނެ އެވެ.
ޗާޕުކޮށް އަލަށް ދައުރުކުރަން ފަށާ ފައިސާގެ ޖުމްލަ އަދަދެއް އެމްއެމްއޭ އިން ހާމައެއް ނުކުރެ އެވެ. އިތުރު ތަފުސީލަށް އެދުމުން އެމްއެމްއޭގެ އޮފިޝަލުން ވިދާޅުވީ އިއުލާނުގައިވާ މައުލޫމާތުގެ އިތުރަށް މިކަމާ ގުޅޭގޮތުން އެ އިދާރާއިން ބަހެއް ބުނަން ނެތް ކަމަށެވެ.
