ޕީއެންސީގެ ސެކްރެޓަރީ ޖެނެރަލްގެ މަގާމުގައި ހުންނެވި ޒީނާޒު އަދުނާން އެ މަގާމުން ވަކިކުރީ ވަގު ފޯމު ފުރައިގެން އެ ޕާޓީއަށް މީހުން ވެއްދި މައްސަލަ އޮއްބައިލުމަށް ކަތިލާ ފުރަތަމަ ކަންބަޅީގެ ގޮތުގައި ކަމަށް ގަލޮޅު އުތުރު ދާއިރާގެ އެމްޑީޕީ މެންބަރު، މީކާއިލް އަހުމަދު ނަސީމް ވިދާޅުވެއްޖެ އެވެ.
އެކްސްގައި މީކާއިލް ކުރެއްވި ޕޯސްޓުގައި ވަނީ ވަގު ފޯމު ފުރައިގެން ޕީއެންސީއަށް މީހުން ވެއްދި މައްސަލަ އޮއްބައިލަން ޒީނާޒު ވަކިކުރިއިރު، ވަގު ފޯމުތަކެއް ފުރައިގެން ޕާޓީއަށް މީހުން ވެއްދުމުގެ ފުރުސަތު ފަހި ކޮށްދިން މީހުން ކޮބައިތޯ ސުވާލު އުފައްދައިފަ އެވެ.
"ވަގު ފޯމު މައްސަލަ އޮއްބައިލަން ކަތިލި ފުރަތަމަ ކަންބަޅިއަށް މިވީ ޕީއެންސީގެ އަންހެން އެސްޖީ، ޑީއެންއާރުގެ ވަސީލަތްތައް ބޭނުން ކޮށްގެން މި ބޮޑު ޖަރީމާ ހިންގާނެ މަގުފަހިކޮށްދިން ރައީސުލްޖުމްހޫރިއްޔާ އާއި މިނިސްޓަރުން ކޮބައިތޯ؟ ކޮބައިތޯ ހެކިންގެ ގޮތުގައި ސޮއިކުރި ވެރިކަން ކުރާ ޕީއެންސީގެ މަޖިލިސް މެންބަރުން؟،" މީކާއިލްގެ ޕޯސްޓުގައި ލިޔެފައިވެ އެވެ.
ޕީއެންސީގެ އެސްޖީގެ މަގާމުގައި ހުންނެވި ޒީނާޒު އެ މަގާމުން ވަކިކުރުމަށްފަހު އެ މަގާމަށް މިއަދު އައްޔަނު ކޮށްފައި ވަނީ މުއާޒު ހަލީމް އެވެ.
ޕީއެންސީގެ އަސާސީ ގަވާއިދުގައިވާ ގޮތުން ޕާޓީގެ ސެކްރެޓަރީ ޖެނެރަލް އައްޔަން ކުރަންޖެހޭނީ ޕާޓީގެ މެންބަރުންގެ މަޖިލީހުންނެވެ. ޕާޓީގެ މެންބަރުންގެ މަޖިލީހަކީ ޕާޓީ ހިންގުމުގެ މަސައްކަތް ކުރާ މަޖިލީހެވެ.
އަސާސީ ގަވާއިދުގައިވާ ގޮތުން ޕާޓީގެ އިދާރީ ގޮތުން ހިންގަންޖެހޭނީ ޕާޓީގެ ސެކްރެޓަރީ ޖެނެރަލެވެ. އަދި ޕާޓީގެ ސެކްރެޓަރީ ޖެނެރަލަކީ ޕާޓީގެ މެންބަރުންގެ މަޖިލީހުގެ ވެސް މެންބަރެކެވެ.
ޒީނާޒު އެ މަގާމުން ވަކިކުރި ސަބަބެއް އަދި ސާފެއް ނުވެ އެވެ. މަގާމުން ވަކިކުރުމާއެކު އެކްސްގައި ޒީނާޒު ކުރި ޕޯސްޓެއްގައި ވަނީ ޕީއެންސީގެ އެސްޖީގެ މަގާމުގައި ހުރެ ހިދުމަތް ކުރުމުގެ ފުރުސަތު ފަހި ކޮށްދެއްވީތީ ރައީސް މުއިއްޒުއަށް ވަރަށް ބޮޑަށް ޝުކުރު އަދާ ކޮށްފަ އެވެ.
"ޕީއެންސީގެ ސެކްރެޓަރީ ޖެނެރަލްގެ މަގާމުގައި ހިދުމަތް ކުރުމުގެ ފުރުސަތު ދެއްވައި އަޅުގަނޑަށް ވަރަށް ބޮޑަށް އިތުބާރު ކުރެއްވީތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ނުހަނު އިހުލާސްތެރިކަމާއެކު ޝުކުރު ދަންނަވަމެވެ،" ޒީނާޒުގެ ޕޯސްޓުގައި ލިޔެފައިވެ އެވެ.
އޭނާ ވަނީ ރައީސް މުއިއްޒުއަށާއި ޕީއެންސީއަށް ބާއްޖަވެރި މުސްތަގުބަލެއް ލިބުމަށް އެދޭ ކަމަށް ބުނެފަ އެވެ.
