ސުލޫކީ އެކި މައްސަލަތަކާ ގުޅިގެން އިދިކޮޅު އެމްޑީޕީން މީގެ ކުރިން ފިޔަވަޅު އަޅާފައި ތިބި ހުރިހާ އެންމެންނަށް އެ ޕާޓީން މައާފު ދީފި ކަމަށް އިއްޔެ ރިޕޯޓުކުރި އެވެ.
އެކި މައްސަލަތަކާ ގުޅިގެން އެމްޑީޕީން ފިޔަވަޅު އަޅާފައި ތިބި މެންބަރުންނަށް މައާފު ދިނުމަށް ނިންމީ ބުދަ ދުވަހުގެ ރޭ އޮތް އެ ޕާޓީގެ ގައުމީ މަޖިލިސް ޖަލްސާގަ އެވެ. އެ ހުށަހެޅުން ހުށަހެޅީ އެމްޑީޕީގެ ނައިފަރު ދާއިރާގެ ރައީސް، އަބްދުﷲ ރަޝީދު ހަސަން އެވެ.
"އަދަދު" ނޫހަށް އެކަން ކަށަވަރު ކޮށްދެއްވައި އެމްޑީޕީގެ ޗެއާޕާސަންގެ ނައިބު، އިބްރާހިމް ވަހީދު ވިދާޅުވީ އެ ނިންމުމަކީ އެމްޑީޕީ އާއެކު މަސައްކަތް ކުރަން ބޭނުންވާ ހުރިހާ އެންމެންނަށް ވެސް އެ ފުރުސަތު ފަހިކޮށްދިނުމަށް ނިންމި ނިންމުމެއް ކަމަށެވެ.
"އެ ނިންމުމަކީ އެމްޑީޕީ މިވަގުތު އިދިކޮޅުގައި އޮތުމުން، މި ޕާޓީއާއެކު މަސައްކަތް ކުރަން ބޭނުންވާ ހުރިހާ އެންމެންނަށް ޕާޓީއާއެކު މަސައްކަތް ކުރުމުގެ ފުރުސަތު ފަހިކޮށްދިނުމަށް ނިންމި ނިންމުމެއް،" އިބްރާހިމް ވަހީދު ވިދާޅުވި އެވެ.
"މި ވަގުތު އެމްޑީޕީން ފިޔަވަޅު އަޅާފައި ހުރި އެއްވެސް މެންބަރެއް ނުހުންނާނެ،"
އިދިކޮޅު އެމްޑީޕީން އެ ނިންމުން ނިންމާފައި މިވަނީ، އެ ޕާޓީއާ ވަކިވެގެން ގޮސް ދަ ޑިމޮކްރެޓްސްގައި މަސައްކަތްތަކެއް ކުރަމުންދިޔަ ސިޔާސީ ބުރަދަންހުރި ބޭފުޅުންތަކެއް އެނބުރި އެމްޑީޕީއަށް ވަންނަމުންދާ ދަނޑިވަޅެއްގަ އެވެ.
އެމްޑީޕީގެ ބައެއް މެންބަރުންނަށް މީގެ ކުރިން އަޅާފައި ހުރި ފިޔަވަޅުތަކުގެ ތެރޭގައި އެ ޕާޓީގެ އެތެރޭގެ އެއްވެސް އިންތިހާބެއްގައި ވާދަ ނުކުރެވޭ ގޮތް ހެދުމާއި ޕާޓީން ވަކި ކުރުން ހިމެނެ އެވެ.
ޑިމޮކްރެޓްސްއިން ވަކިވެ، އެމްޑީޕީއަށް އިއްޔެ ސޮއިކުރި އަލީ އާޒިމް އަކީ ވެސް އެ ޕާޓީގެ އެތެރޭގެ އެއްވެސް އިންތިހާބެއްގައި ފަސް އަހަރުދުވަހުގެ މުއްދަތަކަށް ވާދަ ނުކުރެވޭނެ ގޮތަށް އެ ޕާޓީން ވަކި ކޮށްފައި ހުރި މެންބަރެކެވެ. ނަމަވެސް ގައުމީ މަޖިލީހުގެ ނިންމުމާއެކު އޭނާއަށް ވެސް އެމްޑީޕީގެ އެތެރޭގެ އިންތިހާބުތަކުގައި ވާދަ ކުރުމުގެ ފުރުސަތު ފަހިވާނެ އެވެ.
