ގޯލްޑަން ފުޓްސަލް ޗެލެންޖް 2025 ގައި ރޭ ކުޅުނު ގއ. އަތޮޮޅުގެ މެޗުތަކަށް ބަލާއިރު، ކޮލަމާފުށި އަތުން 14-1 އިން ދެއްވަދޫ މޮޅުވިއިރު، އެންމެ ފަހުގެ ޗެމްޕިއަން، ކަނޑުހުޅުދޫ 3-2 އިން ބަލިކޮށް، ދާންދޫ އަތޮޅު ސެމީގެ ފުރުސަތު ބޮޑުކޮށްފި އެވެ.
ރޭ ދެއްވަދޫން ކޮލަމާފުށި އަތުން ހޯދި މޮޅާ އެކު، ގއ. ގްރޫޕް ބީގެ އެއް ވަނައިގައި އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް މާމެންދޫ އާއި ތިން ވަނައިގައި އޮތް ވިލިނގިއްޔަށް ވަނީ ތިން ޕޮއިންޓް ލިބިފަ އެވެ. އަދި ފުލުގައި އޮތް ކޮލަމާފުށްޓަށް އަދި ޕޮއިންޓެއް ނުލިބެ އެވެ.
ރޭގެ މެޗުގައި ދެއްވަދޫގެ ހުޒައިފަތު ރަޝީދު (ހުޒޭ) ހަތަރު ގޯލު ޖެހިއިރު، އަހުނަފް ރަޝީދު (އަހުއްކޮ) އާއި ޝިފާޒް އަލީ (ތުއްތު) ވަނީ ކޮންމެ ކުޅުންތެރިއަކު، ތިން ގޯލު ޖަހައި ހެޓްރިކް ހަދާފަ އެވެ. މީގެ އިތުރުން ދެއްވަދޫގެ މިގްދާދް ސައީދު ދެ ގޯލު ޖެހިއިރު، މުހައްމަދު އިމްރާން (އިންމި) އަދި ނަސޫހް ސައީދު ވަނީ ގޯލެއް ޖަހައިފަ އެވެ.
މި މެޗުގައި ކޮލަމާފުށިން ޖެހި ހަމައެކަނި ގޯލު އެ ޓީމަށް ޖަހާދިނީ އިސްމާއިލް މުއްސަބް ނަޖީބް އެވެ.
މި ގްރޫޕްގެ އަނެއް މެޗުގައި، ވިލިނގިލިން މާމެންދޫ ބަލިކުރީ 2-0 ގެ ނަތީޖާ އަކުންނެވެ. މި މެޗުގެ ދެ ވަނަ މިނެޓުގައި ވިލިނގިލިން ވަނީ ގޯލު ޖަހާ ލީޑު ނަގައިފަ އެވެ. މި ގޯލު އެ ޓީމަށް ޖަހާދިނީ މުހައްމަދު ޝުހާން އެވެ. އަދި ވިލިނގިލީގެ ދެވަނަ ލަނޑަކީ މާމެންދޫގެ ފަސް ފައުލް ހަމަވެގެން ލިބުނު ދުރު ޕެނަލްޓީ އަކުން ހުސެއިން މިފްރާހް ވަހީދު ޖަހައިދިން ގޯލެކެވެ.
ދާންދޫން ލަނޑު ޖެހުމަށް ފަހު އުފާފާޅުކުރަނީ.---- ފޮޓޯ: އިމޭޖަސް.އެމްވީ
ގއ. އަތޮޅުގެ ގްރޫޕް އޭގައި ކަނޑުހުޅުދޫން ލީޑުނަގައިފައިވަނިކޮށް، ދާންދޫން ވަނީ ފަހަތުން އަރައި މޮޅުވެފަ އެވެ. ފޯރިގަދަކޮށް ދިޔަ މި މެޗުގައި ކަނޑުހުޅުދޫން ދެ ގޯލު ޖެހީ، އަހުނަފް ޒާހިރު އެވެ. ދާންދޫގެ ލަނޑުތައް ޖެހީ، މުހައްމަދު އަޒާން މައާދު، އަހުމަދު ހަސަން (އައްމަޑޭ) އަދި ޖާވިދު އަލީ އެވެ. މި މެޗުގައި، ކަނޑުުހުުޅުދޫގެ އަޒްވާން އަށް ވަނީ ރަތް ކާޑެއް ދައްކައިފަ އެވެ.
މި ގްރޫޕްގެ އަނެއް މެޗުން، ގެމަަނަފުށިން 2-0 އިން ނިލަންދޫ ބަލިކުރިއިރު، ދެ ގޯލު ވެސް ޖެހީ ނިލަންދޫގެ މުހައްމަދު ޒާހިލް އަހުމަދު އެވެ.
މި ގްރޫޕްގެ އެއް ވަނައިގައި އޮތީ ހަ ޕޮއިންޓާ އެކު ދާންދޫ އެވެ. ދެ ވަނައިގައި އޮތް ނިލަންދޫ އާއި ތިން ވަނައިގައި އޮތް ގެމަނަފުށްޓަށް ތިން ޕޮއިންޓް ލިބިފައިވާއިރު، ކަނޑުހުޅުދޫ ފުލުގައި އޮތީ ޕޮއިންޓެއް ނުލިބި އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
20:00: ހަނިމާދޫ - ނޮޅިވަރަންފަރު
20:00: ފިނޭ - ނޭކުރެންދޫ
21:00: ނެއްލައިދޫ - ވައިކަރަދޫ
21:00: ނައިވާދޫ - ނޮޅިވަރަން
22:00: ހޯރަފުށި - މާރަންދޫ
22:00: ކެލާ - ފިއްލަދޫ
23:00: މުރައިދޫ - ވަށަފަރު
23:00: އުތީމު - އިހަވަންދޫ
