ގޯލްޑަން ޗެރިޓީ ޝީލްޑް ދިފާއުކުރި ލ. ގަމުން މި ފަހަރުގެ ފުޓްސަލް ޗެލެންޖްގައި އަތޮޅު ބުރުގައި ކުޅުނު ފުރަތަމަ މެޗުން 6-1 އިން މާވަށް ބަލިކޮށް ފެށުން ވަރުގަދަކޮށްފި އެވެ.
ގަމުން ވަނީ މިދިޔަ ދެ އަހަރު ވެސް ގޯލްޑަން ޗެރިޓީ ޝީލްޑް އުފުލާލައިފަ އެވެ. މިދިޔަ އަހަރުގެ ފައިނަލުގައި ތަށި ދިފާއުކުރަން ނުކުމެ، ބ. އޭދަފުށި އަތުން ބަލިވިއިރު، މި ފަހަރުގެ ޝީލްޑް ކާމިޔާބުކުރީ އެ ޓީމު ބަލިކޮށެވެ.
ލ. އަތޮޅުގެ ގްރޫޕް އޭގައި ރޭ ކުޅުނު މެޗުގައި ފުރަތަމަ ގޯލު ޖަހާ ލީޑު ނެގީ މާވަށުންނެވެ. މި ގޯލު އެ ޓީމަށް ޖަހާދިނީ އަހުމަދު މުހައްމަދު އެވެ. އެކަމަކު، ގަމުން ވަނީ މި ގޯލަށް ފަހު ކުޅުން ރަނގަޅުކޮށް ފުލުފުލުގައި މާވަށުގެ ގޯލަށް ނުރައްކާ ކޮށްފަ އެވެ. މި މެޗުގައި ގަމުން ހަ ގޯލު ޖެހިއިރު، އަހުމަދު ހަލީމް (އައްމަޑޭ) އާއި މުހައްމަދު މުސްލިހު (މުއްޓި) ވަނީ ކޮންމެ ކުޅުންތެރިޔަކު ދެ ގޯލު ޖަހައިފަ އެވެ. އަދި، އަނެއް ދެ ލަނޑު ޖެހީ، އަބްދުالله ޖުނައިދު (ޖެންނޭ) އާއި ހުސެއިން އަޒްމީ އެވެ.
ލ. އަތޮޅުގެ ގްރޫޕް ބީގައި މުންޑޫ އާއި ކަލައިދޫ ބައްދަލުކުރި މެޗު ވަނީ 3-3 އިން އެއްވަރުވެފަ އެވެ.
މި މެޗުގައި ފުރަތަމަ ގޯލު ޖަހާ ލީޑު ނެގީ މުންޑޫ އިންނެވެ. މި ގޯލު އެ ޓީމަށް ޖަހާދިނީ ކެޕްޓަން، އަހުމަދު ހާފިޒް އެވެ. އެކަމަކު މެޗުގެ 10 ވަނަ މިނެޓުގައި ކަލައިދޫގެ ކެޕްޓަން ހަސަން މާދު ވަނީ ގޯލު ޖަހާ އެ ޓީމަށް ނަތީޖާ ހަމަހަމަ ކޮށްދީފަ އެވެ.
ދެ ވަނަ ހާފު ފަށައިގެން ހަތަރު ވަނަ މިނެޓުގައި މުންޑޫގެ މުހައްމަދު ނިޝާހު ވަނީ އިތުރު ގޯލެއް ޖަހާ އެ ޓީމަށް ލީޑު ނަގާދީފަ އެވެ. އަދި ދެ ވަނަ ހާފުގެ 10 ވަނަ މިނެޓުގައި މުންޑޫގެ ކެޕްޓަން ހާފިޒް ވަނީ ގޯލު ޖަހާ އެ ޓީމުގެ ލީޑު ފުޅާކޮށްދީފަ އެވެ.
އެކަމަކު އޭގެ މިނެޓެއް ފަހުން ކަލައިދޫގެ ޖައުފަރު އަހުމަދު ވަނީ ގޯލު ޖަހާ ފަރަގު ކުޑަކޮށްފަ އެވެ. އަދި މެޗުގެ ނަތީޖާ ހަމަހަމަކުރި ގޯލު ކަލައިދޫ އަށް ޖަހާދިނީ މެޗު ނިމެން މިނެޓަކަށްވެފައި ހުއްޓައި އަހުމަދު އައްސަދު އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
20:00: ހަނިމާދޫ - ނޮޅިވަރަންފަރު
20:00: ފިނޭ - ނޭކުރެންދޫ
21:00: ނެއްލައިދޫ - ވައިކަރަދޫ
21:00: ނައިވާދޫ - ނޮޅިވަރަން
22:00: ހޯރަފުށި - މާރަންދޫ
22:00: ކެލާ - ފިއްލަދޫ
23:00: މުރައިދޫ - ވަށަފަރު
23:00: އުތީމު - އިހަވަންދޫ
