މިއުނިކް (ޖެނުއަރީ 12) - ދެ ވަނަ ހާފުގައި ހެރީ ކޭން ކާމިޔާބުކުރި ޕެނަލްޓީން 1-0 އިން ބޮރޫޝިއާ މުންޗެންގްލަޑްބެކް ބަލިކޮށް ބަޔާން މިއުނިކުން ޖަރުމަނު ލީގުގެ އެއް ވަނައިގައި ހަތަރު ޕޮއިންޓުގެ ލީޑު ދަމަހައްޓައިފި އެވެ.
ލީގުގެ އެއް ވަނައިގައި އޮތް ބަޔާނަށް 16 މެޗުން 39 ޕޮއިންޓް ލިބިފައިވާއިރު، ދެ ވަނައިގައި އޮތް ބަޔާ ލެވަކޫސަން އަށް ވަނީ 16 މެޗުން 35 ޕޮއިންޓް ލިބިފަ އެވެ.
ފުރަތަމަ ހާފުގައި ލަނޑެއް ޖެހޭތޯ ބަޔާންގެ ލެއޯން ގޮރެޓްޒްކާ އާއި ތޯމަސް މުލާ ކުރި މަސައްކަތް ކާމިޔާބެއް ނުވި އެވެ. މެޗުގައި ފެނިގެންދިޔަ ހަމައެކަނި ލަނޑު ޖެހީ 68 ވަނަ މިނިޓްގައި ޕެނަލްޓީ އަކުން ކޭން އެވެ. މިއީ، މުންޗެންގްލަޑްބެކްގެ އޭރިއާތެރެއިން، އެ ޓީމުގެ ލޫކަސް އުލްރައިޗް ބޯޅަ ހޯދަން އުޅުމުގެ ތެރޭގައި ބަޔާންގެ މައިކަލް އޮލީސޭ އަށް ފައުލުކުރުމުން ރެފްރީ ދިން ޕެނަލްޓީ އެކެވެ.
މި މެޗުގައި، މުންޗެންގްލަޑްބެކްގެ ކީޕަރު މޮރިޓްޒް ނިކޮލަސް ވަނީ ބަޔާނުން ލީޑުފުޅާކުރަން ފޮނުވާލި ހަމަލާތައް ހުއްޓުވައިފަ އެވެ. އެ ގޮތުން، ބަޔާންގެ ގޮރެޓްޒްކާ އާއި ސާޖް ގްނަބްރީ އަދި އަލްފަންސޯ ޑޭވިސް ޖެހި ބޯޅަތައް ކީޕަރު ނިކޮލަސް ވަނީ މަަތަކޮށްފަ އެވެ.
