މ. ލަކީހެވަން ގޭގައި ރެނދު އަޅައި އަޑިއަށް ގަނބަމުންދާތީ، އެ ގޭގައި ތިބި މީހުން އެހެން ތަނަކަށް މާލެ ސިޓީ ކައުންސިލުން މިއަދު މީހުން ބަދަލުކޮށްފި އެވެ.
ލަކީހެވަން ގޭގައި ޖުމްލަ ހަތަރު ކޮޓަރީގައި ހަތަރު އާއިލާއެއް އުޅޭއިރު، އެ ގޭގައި 18 އަހަރުން ދަށުގެ ތިން ކުދިންނާއި ހަ މީހުން ދިރިއުޅެ އެވެ. އަދި ދެ ބައެއްގައި ބޭރު މީހުން ވެސް އުޅެ އެވެ.
އެ ގޭގައި ތިބި މީހުންނަށް ވަގުތީ ބޯހިޔާވަހިކަން ހަމަޖައްސައިދިނީ މާލެ ސިޓީ ކައުންސިލުންނެވެ.
މާލެ ސިޓީ ކައުންސިލުން ބުނީ އެ ގޭގައި ރެނދުލައި ގަނބަން ފެށި ޖެހިގެން ހުރި މ. ކާނިލައިޓް އިމާރާތް ކުރަމުންދިޔައިރު ޝީޓް ޕައިލް ނުކޮށް ހުރުމުގެ ސަބަބުން ކަމަށެވެ.
"އަދަދު" އަށް އެނގިފައިވާ ގޮތުގައި ލަކީހެވަން ގޭގައި އުޅުނު މީހުންނަށް ޝީޓް ޕައިލް ނުކޮށް އިމާރާތް ކުރި ނުގާ ކޮންސްޓްރަކްޝަން ކޮމްޕެނީން އެއްވެސް އެހީތެރިކަމެއް ފޯރުކޮށްދީފައެއް ނުވެ އެވެ.
މިގޮތުން އެ ގޭގައި އުޅޭ މީހުން މަސައްކަތް ކުރިއަށް ގެންދިޔަ ކުންފުންޏާ މަޝްވަރާކޮށް ގޮތްތަކެއް ހޯދަން މަސައްކަތް ކުރި ނަމަވެސް، އެ ކުންފުނީގެ ފަރާތުން އެއްވެސް އެއްބާރުލުމެއް ދީފައެއް ނުވެ އެވެ.
