ގޯލްޑަން ފުޓްސަލް ޗެލެންޖް 2025 ގައި ށ. އަތޮޅުގެ ސެމީ ފައިނަލުން އެންމެ ފަހުގެ ޗެމްޕިއަން، ކަނޑިތީމު, މިލަންދޫ އަދި ބިލެއްފަހިން ޖާގަ ހޯދައިފި އެވެ.
ކަނޑިތީމާއި މިލަންދޫ އަދި ބިލެއްފަހިން އަތޮޅު ސެމީން ޖާގަ ހޯދީ ކުޅުނު ދެ ވަނަ މެޗުތަކުން ވެސް މޮޅުވެގެންނެވެ.
ށ. އަތޮޅުގެ ފުރަތަމަ މެޗުގައި، ގްރޫޕް އޭގައި ކަނޑިތީމުން ނުކުތީ ފޭދޫއާ ދެކޮޅަށެވެ. ކަނޑިތީމުގެ ހަމައެކަނި ގޯލު ފުރަތަމަ ހާފުގައި އެ ޓީމަށް ޖަހާދިނީ ކެޕްޓަން އިބްރާހިމް ނަދާދް (ކުޑައްޓޭ) އެވެ. މިދިޔަ އަހަރު ކަނޑިތީމުން ށ. އަތޮޅު ތަށި ހޯދީ ފައިނަލުގައި ފޭދޫ ބަލިކޮށްފަ އެވެ. ފޭދޫ މި ވަނީ މި ފަހަރު ކުޅުނު ދެ މެޗުން ވެސް ބަލިވެ ކަޓައިފަ އެވެ.
މި ގްރޫޕްގެ އަނެއް މެޗުން، މިލަންދޫ އިން ނުކުތީ މަރޮށިއާ ދެކޮޅަށެވެ. މި މެޗު މިލަންދޫ އިން ކާމިޔާބުކުރީ 3-0 ގެ ނަތީޖާ އަކުންނެވެ. މިލަންދޫގެ ތިން ލަނޑުގެ ތެރެއިން ދެ ގޯލު އެ ޓީމަށް ޖަހާދިނީ އިބްރާހީމް ޒާހީ އެވެ. އަދި އަނެއް ގޯލު ޖެހީ އަހުމަދު ޝާނީ އެވެ.
ފޭދޫ ކުޅުންތެރިއަކު ކައިރިން ބޯޅަ ހިފައިގެންދާން ކުޑައްޓޭ މަސައްކަތް ކުރަނީ.--- ފޮޓޯ: އިމޭޖަސް.އެމްވީ
ގްރޫޕް ބީގައި، ބިލެއްފަހިން ނަރުދޫ ބަލިކުރީ 3-2 ގެ ނަތީޖާ އަކުންނެވެ. މި މެޗުގެ ހަތަރު ވަނަ މިނެޓުގައި ނަރުދޫ އިން ވަނީ ގޯލު ޖަހާ ލީޑުނަގައިފަ އެވެ. މި ގޯލު އެ ޓީމަށް ޖަހާދިނީ މުހައްމަދު ނާއިޒް އެވެ. އެކަމަކު، މެޗުގެ 11 ވަނަ މިނެޓުގައި ބިލެއްފަހީގެ އަހުމަދު އިބްރާހީމް ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. ފުރަތަމަ ހާފު ނިމުމުގެ ކުރިން ނަރުދޫގެ ވިޝާން އާރިފް ވަނީ ގޯލު ޖަހާ އެ ޓީމަށް އަލުން ލީޑު ނަގާދީފަ އެވެ.
ފުރަތަމަ ހާފުގެ ފަހު ސިކުންތުކޮޅުގެ ތެރޭގައި ބިލެއްފަހީގެ އިބްރާހީމް އިމާން ވަނީ ގޯލު ޖަހާ އަލުން ނަތީޖާ ހަމަހަމަ ކޮށްފަ އެވެ. މެޗުން މޮޅުކޮށްދިން ގޯލު ބިލެއްފަހި އަށް ޖަހާދިނީ އާދަމް ޝަފްރާޒް އެވެ.
ށ. އަތޮޅުގެ ފަހު މެޗުގައި ގޮއިދޫ އިން ޅައިމަގުގެ މައްޗަށް ކުރިހޯދީ 2-1 ގެ ނަތީޖާ އަކުންނެވެ. ގިނަ ކާޑުތަކެއް ފެނިގެންދިޔަ މި މެޗުގެ ފަސްވަނަ މިނެޓުގައި ގޮއިދޫ އިން ވަނީ ގޯލު ޖަހާ ލީޑު ނަގާފަ އެވެ. މިއީ ޅައިމަގުގެ މުހައްމަދު އިރުޝާދުގެ އަތުން ބައިކޮޅަށް ވަން ގޯލެކެވެ. އެކަމަކު ފުރަަތަމަ ހާފު ނިމުމުގެ ކުރިން އަބްދުލް ކަރީމް އަހުމަދު ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. މެޗުގައި ޅައިމަގަށް މައްސަލަތަކާ ދިމާވީ މެޗު ނިމެން މިނެޓަކަށް ވެފައި ވަނިކޮށް ކީޕަރު ސާލިމް އަޝްރަފް ކުރި ފައުލަކާ ގުޅިގެން އޭނާ އަށް ސީދާ ރަތް ކާޑު ދެއްކުމުންނެވެ. އޭގެ ފައިދާ ނަގާ ގޮއިދޫ މެޗުން މޮޅުކޮށްދިން ގޯލު އެ ޓީމަށް ޖަހާދިނީ ވިއާމް މުހައްމަދު ޝަރީފް އެވެ.
މިއީ މި ފަަހަރުގެ މުބާރާތުގައި، ފާތިމަތު ސާލިޔާގެ ކޯޗުކަމުގައި ކުޅޭ ގޮއިދޫން ހޯދި ފުރަތަމަ މޮޅެވެ.
މިއަދާއި މިރޭ ކުޅޭ މެޗުތައް:
16:00: އއ. ތޮއްޑޫ - އއ. ހިމަންދޫ
16:00: އއ. އުކުޅަސް - އއ. މަތިވެރި
17:00: އއ. ފެރިދޫ - އއ. ރަސްދޫ
17:00: އއ. މާޅޮސް - އއ. ބޮޑުފޮޅުދޫ
-------------------------------------
20:00: މ. ކޮޅުފުށި - މ. މުލި
20:00: -
21:00: ސ. ފޭދޫ - ސ. މަރަދޫފޭދޫ
21:00: ސ. ހިތަދޫ - ސ. މަރަދޫ
22:00: ފ. ނިލަންދޫ - ފ. ދަރަނބޫދޫ
22:00: ފ. ބިލެއްދޫ - ފ. މަގޫދޫ
23:00: ގދ. ތިނަދޫ - ގދ. މަޑަވެލި
23:00: ގދ. ފިޔޯރީ - ގދ. ވާދޫ
