ބިންވެރިޔާ ސްކީމުގެ ދަށުން މާލެ ރައްޔިތުންނަށް ގޯތި ދޫކޮށްފައިވާ ކ. ގުޅީފަޅުގެ މަގުތަކާއި އެ ރަށުގެ ހިދުމަތްތައް ދިނުމަށް ބޭނުންވާ މުނިސިޕަލް އިމާރާތްތައް އަޅަން ޗައިނާގެ ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާ މިއަދު ހަވާލު ކޮށްފި އެވެ.
ގުޅީފަޅުގެ މަގުތައް ހެދުމާއި މުނިސިޕަލް ހިދުމަތްތައް ދޭން ބޭނުން ކުރާނެ އިމާރާތްތައް އަޅަން ސީއެމްއީސީ އާ ހަވާލު ކުރީ ރައީސް އޮފީހުގައި މިއަދު ބޭއްވި ހާއްސަ ރަސްމިއްޔާތެއްގަ އެވެ.
އެ މަސައްކަތްތައް ހަވާލު ކުރުމުގެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ ހައުސިން މިނިސްޓަރު އަބްދުﷲ މުއްތަލިބު އެވެ. ސީއެމްއީސީގެ ފަރާތުން ސޮއި ކުރެއްވީ އެ ކުންފުނީގެ ރީޖަނަލް ޖެނެރަލް މެނޭޖަރު، ޝެން ހައު ޖިން އެވެ.
އެއްބަސްވުމުގައި ސޮއިކުރަން ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ މިއަދު ސޮއި ކުރެވުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އަހަރު ޗައިނާއަށް ވަޑައިގެން ސޮއި ކުރެއްވި އެމްއޯޔޫތަކުގެ ދަށުން ވެވުނު އެއްބަސްވުމެއްގައި ކަމަށެވެ.
މި ޕްރޮޖެކްޓުގެ ތެރެއިން ކުރެވޭނެ މައިގަނޑު މަސައްކަތްތަކަކީ:
- އިލެކްޓްރިކްސިޓީ ޑިސްޓްރިބިއުޝަން ނެޓްވޯކް ގާއިމު ކުރުން
- ފެނާއި ނަރުދަމާގެ ނިޒާމު މުޅި ގުޅީފަޅުގައި ގާއިމު ކުރުން
- ޑިއު ވޯޓަރިން ސިސްޓަމް ގާއިމު ކުރުން
- މަގުތައް ޒަމާނީ ފެންވަރަށް ހެދުން
- ޖީޕޯން ޑަކްޓިން ސިސްޓަމް ގާއިމު ކުރުން
- ގޭސް ސްޓޮރޭޖާއި ޑިސްޓްރިބިއުޝަން ސިސްޓަމް ގާއިމު ކުރުން
މިއަދުގެ ރަސްމިއްޔާތުގައި ވާހަކަދައްކަވަމުން ޝެން ހައު ޖިން ވިދާޅުވީ ސީއެމްއީސީ އަކީ ރާއްޖޭގެ ދުވަސްވީ ރަހުމަތްތެރިއެއް ކަމަށާއި ރާއްޖޭގެ ތަރައްގީއާ ގުޅުން އޮތް ކުންފުންޏެއް ކަމަށެވެ.
އެގޮތުން އެ ކުންފުނިން ރާއްޖޭގައި އެކި މަޝްރޫއުތައް ހިންގުމުގެ 14 އަހަރުގެ ތަޖުރިބާ ހުރިކަން އޭނާ ފާހަގަ ކުރެއްވި އެވެ.
