އާދަޔާހިލާފަށް މި ދުވަސްވަރު މާލެ ސަރަހައްދުގެ ވައި ނުސާފުވުމުން އެކަމަށް ސަމާލުވާން ހެލްތު ޕްރޮޓެކްޝަން އޭޖެންސީން އިލްތިމާސްކޮށްފި އެވެ.
އެކްސްގައި އެޗްޕީއޭއިން ކުރި ޕޯސްޓެއްގައި ބުނީ ވައި ނުސާފު ވަގުތުތަކުގައި ފުއްޕާމޭގެ ބަލިތަކާއި ހިތުގެ ބަލި ނުވަތަ އެލާޖީގެ މައްސަލަތައް ހުންނަ މީހުންގެ އިތުރުން ކުޑަކުދިންނާއި ދޮށީ އުމުރުން މީހުން ބޭރުގައި ގިނަ ވަގުތު ހޭދަ ނުކުރަން އިލްތިމާސް ކުރާ ކަމަށެވެ.
އޭގެ އިތުރުން، މި ދުވަސްވަރު ވައި ނުސާފުވުމުން ތުއްތު ކުދިން ގެއިން ބޭރަށް ނުނެރުމަށާއި ގޭގޭގެ ދޮރުތައް ލައްޕާފައި ބެހެއްޓުމާއި ގެއިން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން ކުޑަ ދުވަސްކޮޅަކަށް މަޑު ޖައްސައިލަން އެޗްޕީއޭއިން އިލްތިމާސް ކޮށްފައިވެ އެވެ.
ވިލިމާލޭގައި ހުންނަ އެއާ ކޮލިޓީ މިނީޓަރިން ސިސްޓަމުން ދައްކާ ގޮތުން މިވަގުތު ވެސް މާލެ ސަރަހައްދުގެ ވައިގެ ކޮލިޓީ ހުރީ 102 ގަ އެވެ. އެއީ ސިއްހީ މައްސަލަތައް ހުންނަ މީހުންނާއި ދިފާއީ ނިޒާމު އެހައި ވަރުގަދަ ނޫން މީހުންގެ ސިއްހަތަށް ނުރަނގަޅު މިންގަނޑެކެވެ.
ކޮންމެ އަހަރެއްގެ ވެސް ޑިސެމްބަރު މަހުން ފެށިގެން މާޗް މަހާ ހަމައަށް ރާއްޖޭ ސަރަހައްދަށް ވައި ނުސާފުވެއެވެ. ވައި ނުސާފުވާން މެދުވެރިވާ އެންމެ މައިގަނޑު އެއް ސަބަބަކީ އަވައްޓެރި އިންޑިއާއިން އަންނަ ދުމާއި ހިރަފުހެވެ.
