ބާސެލޯނާ (ޖެނުއަރީ 5) - ބާސެލޯނާގެ މާލީ ހާލަތު ހުރި ގޮތުންނާއި ގަވާއިދުގެ ކަންކަމަށް ބަލާއިރު، ދެ ވަނަ ފަހަރަށް މި ސީޒަނުގެ ސްކޮޑުގައި ޑެނީ އޮލްމޯ އާއި ޕައު ވިކްޓޯ ރަޖިސްޓްރީ ނުކުރެވޭނެ ކަމަށް ލަލީގާ އާއި ސްޕެއިން ފުޓްބޯޅަ ފެޑެރޭޝަނުން ނިންމި ނިންމުމާ ދެކޮޅަށް ބާސެލޯނާ އިން ކޯޓަށް ހުށަހަޅަން ތައްޔާރުވެއްޖެ އެވެ.
މި މަހު އެއް ވަނަ ދުވަހުން ފެށިގެން، އޮލްމޯ އާއި ޕައު ވިކްޓޯ ވަނީ ބާސެލޯނާގެ ރެޖިސްޓްރޭޝަނުން އުނިވެފަ އެވެ. އެއީ، ބާސެލޯނާގެ މުސާރައިގެ ކެޕްގެ ކަންކަމާއި މާލީ ހާލަތަށް ބަލާއިރު، ކޮންޓްރެކްޓްގެ މުއްދަތާއި މުޅި ޓްރާންސްފާ އަށް ހިނގާ ހަރަދަށް ބަލާއިރު، ބާސެލޯނާ ގަވާއިދަށް ނުފެތޭތީ އެވެ.
އޮލްމޯ އާއި ޕައު ވިކްޓޯ ރަޖިސްޓްރީ ކުރަން ކުރަން ޖެހޭ އެކިއެކި ކަންކަން ނިންމައި، ބާސެލޯނާ އިން މާލީ ހާލަތު ރަނގަޅުކުރި ފަހުން، ލަލީގާ އާއި ސްޕެއިން ފުޓްބޯޅަ ފެޑެރޭޝަނުން ވަނީ ގަވާއިދަށް ބަލައި ގޮތެއް ނިންމައިފަ އެވެ.
އެ ގޮތުން، ސްޕެއިން ފުޓްބޯޅަ ފެޑެރޭޝަނާއި ލަލީގާ އިން ނިންމާފައިވަނީ، މާލީ މައްސަލަތަކެއްގައި އެއް ސީޒަނެއްގައި ކޮންޓްރެކްޓް އާއި ރަޖިސްޓްރޭޝަން ކެންސަލްވި ކުޅުންތެރިއަކަށް އެ ސީޒަނެއްގައި ދެ ވަނަ ފަހަރަށް ރަޖިސްޓްރޭޝަން ފުރިހަމަ ކުރަން ތަނެއް ނުދޭ ކަމަށެވެ. އަދި ދެން، އެ ކުޅުންތެރިންނަށް ރަޖިސްޓްރޭޝަން ފުރިހަމަކުރެވޭނީ، އާ ސީޒަނެއް ފެށުމުން ކަމަށެވެ.
މިއާ އެކު، އޮލްމޯ އާއި ޕައު ވިކްޓޯ އަށް ސީޒަނުގެ ބާކީ ބައިގައި ނުކުޅެ ހުންނަން ޖެހުމުގެ ފުރުސަތު އޮތީ ބޮޑުވެފަ އެވެ. އެހެންވެ، ބާސެލޯނާ އިން މި މައްސަލަ ކޯޓުގައި ކުރިއަށްގެންދަން ނިންމީ އެެވެ.
މި ސީޒަން ފެށުމުގެ ކުރިން، ބާސެލޯނާ އިން ވަނީ އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ޖުމްލަ އެކު ދައްކަން ނިންމައިފަ އެވެ. އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން، ބާސެލޯނާ އިން އެއްބަސްވީ އެ ކްލަބްގެ މާލީ ހާލަތަށް ބަލައިފަ އެވެ.
އެކަމަކު، ސްޕެނިޝް ލަލީގާގެ ގަވާއިދުގެ ތެރެއިން އޮލްމޯ ރަޖިސްޓްރީ ކުރަން ބާސެލޯނާ އަށް އެންމެ ފުރަތަމަ ދުވަހުން ވެސް މައްސަލަ ދިމާވި އެވެ. އެއީ، އޭނާގެ ކޮންޓްރެކްޓް ހިނގާ ހަ އަހަރުގެ މުއްދަދަށް އެކަށޭނެ މިންވަރަށް ބާސެލޯނާގެ މާލީ ހާލަތު އެ ވަގުތު ތަން ނުދޭތީ އެވެ. އެކަމަކު، ލަލީގާ އިން ވަނީ ކުޅުންތެރިއާގެ ހައްގަށް ވިސްނުމަށް ފަހު، ރަޖިސްޓްރޭޝަން ނިންމަން، އޮގަސްޓުން ފެށިގެން މިދިޔަ ޑިސެމްބަރު ނިޔަލަށް ފުރުސަތު ދީފަ އެެވެ. އެހެންނަމަވެސް އެ މުއްދަތު ތެރޭގައި ބާސެލޯނާ އަށް އެކަން ނުނިންމި މިހާރު ވަނީ ބޮޑު މައްސަލަތަކެއްގެ ތެރޭގައި ތާށިވެފަ އެވެ.
އޮލްމޯ ބޭނުންނަމަ މި ވަގުތު ހިލޭ ޓްރާންސްފާއެއްގައި އެހެން ޓީމަކާ ގުޅެވޭނެ އެވެ. އެކަމަކު، އޭނާގެ ވިސްނުމަކީ ބާސެލޯނާގައި މަޑުކުރުން ކަމަށް ވަނީ ބުނެފަ އެވެ. އޮލްމޯ ހޯދަން ޕްރިމިއާ ލީގުގެ ކްލަބްތަކުން ވަނީ ޝައުގުވެރިކަން ފާޅުކޮށްފަ އެވެ.
