އަނިޔާގެ ސަބަބުން 2023 ވަނަ އަހަރުގެ ބޮޑުބައި ފުޓްސަލް ނުކުޅެ ހުރުމަށް ފަހު، މިދިޔަ އަހަރުގެ ކުރީކޮޅު އެނބުރި ކުޅުމަށް އައިސް, ކާމިޔާބު އަހަރަކަށް ފަހު، މަޝްހޫރު ފުޓްސަލް ކުޅުންތެރިޔާ، އަޔާޒް އަހުމަދު (އަޔާ)ގެ ފޯކަސް މި ވަގުތު ހުރީ އަމިއްލަ ރަށް ގދ. ވާދޫއާ އެކު، މި މަހު ފަށާ ގޯލްޑަން ފުޓްސަލް ޗެލެންޖުގައި ކާމިޔާބު ހޯދުމަށް ކަމަށް ބުނެފި އެވެ.
އަޔާ އަށް އަނިޔާވީ، 2023 ވަނަ އަހަރުގެ މެދުތެރޭގައި ރަށެއްގައި ކުރިއަށްދިޔަ ފުޓްސަލް މުބާރާތެއްްގެ ތެރެއިންނެވެ.
އެ އަނިޔާއާ ގުޅިގެން ކަކުލުގެ އޮޕަރޭޝަނެއް އަޔާ ކުރަން ޖެހުނުއިރު، އަނިޔާއިން ސަލާމަތްވެ، އޭނާ ކުޅުނު ފުރަތަމަ ބޮޑު މުބާރާތަކީ "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024" އެވެ. އެކަމަކު އެ ފަހަރުގެ މުބާރާތުގައި އަޔާ އަށް ވާދޫއާ އެކު މާ ބޮޑު ކާމިޔާބެއް ހޯދިފަ އެއް ނުވެ އެވެ.
އެހެން ނަމަވެސް އަޔާގެ ކެރިޔަރުގައި ނިމިދިޔައީ ނިސްބަތުން ބަލާއިރު ކާމިޔާބު އަހަރެކެވެ. އެމްޕީއެލް ޓީމާއެކު މި އަހަރުގެ ކްލަބް މޯލްޑިވްސް ކަޕްގެ ސެމީ ފައިނަލް އަޔާ ކުޅުނުއިރު، ރާއްޖޭގެ އެކި ކަންކޮޅުތަކުގައި ކުރިއަށްދިޔަ މުބާރާތްތަކުގެ ތެރެއިން 16 މުބާރާތް އޭނާ ވަނީ ކާމިޔާބު ކޮށްފަ އެވެ. އަދި އޭގެ ތެރެއިން ގިނަ މުބާރާތްތަކުގެ ކިންގް އޮފް ޓޯނަމެންޓް ވެސް ވަނީ ކާމިޔާބު ކޮށްފަ އެވެ.
"އޭސީއެލްގެ ބޮޑު އޮޕަރޭޝަނަކަށްފަހު ރާއްޖޭގެ އެކި ކަންކޮޅުތަކުގައި ބޭއްވި 24 މުބާރާތުގެ ތެރެއިން 16 މުބާރާތް ކާމިޔާބުކުރެވުން އެއީ ލިބުނު ބޮޑު ކާމިޔާބީއެއް" އަޔާ އޭނާގެ ފޭސްބުކް ޕޭޖުގައި ކުރި ޕޯސްޓެއްގައި ބުންޏެވެ.
އަޔާ ބުނީ މި ކާމިޔާބީތަކާ އެކު މި ވަގުތު އޭނާގެ އަމާޒު ހުރީ މި މަހު ފަށާ ގޯލްޑަން ފުޓްސަލް ޗެލެންޖުގައި ރަށު ޓީމާއެކު ކާމިޔާބު ހޯދަން ކަމަށެވެ.
ޓީމު ފެނަކައާ އެކު، ކްލަބް މޯލްޑިވްސް ކަޕްގެ ޗެމްޕިއަންކަން ހޯދި އަޔާ ވަނީ މީގެ ކުރިން ގޯލްޑަން ފުޓްސަލް ޗެލެންޖުގެ ފައިނަލުގައި، 2023 ވަނަ އަހަރު ކުޅެފަ އެވެ. އެކަމަކު އެ ފަހަރު ލ. ގަން އަތުން ވަނީ ބަލިވެފަ އެވެ.
